¹ MuSizaria waiyamwo munhu waizwi Khoneriusi, nduna yezana yechikwata chemajoni chaizwi cheItaria. ² Waiya munhu unodira nounotya Mwari pamwepo nevemhatso yake yeshe, wakakovera zvipo ngenyasha kuvanhu nokugara echikumbira kunaMwari. ³ Zvino nguva yooda kuita awa rechipfumbamwe rezuva, wakanasa kuona muchioniso ngirosi yaMwari yechipotera, yechiti kwaari: “Khoneriusi.” ⁴ Wakaringisisa ngirosi echitya, akati: “Chiinyi, Mambo?” Nayo yakati kwaari: “Mikumbiro yako nokukovera zvipo kwako zvakakwira kuita mucherechedziso pamberi paMwari. ⁵ Zvino tuma vanhu kuJopa vaunze munhu unozwi Simoni, uwo unozwi Petro. ⁶ Iye unogara nomunhu unozwi Simoni, musukuti, mhatso yake iri pasinde poruandhle. ⁷ Apo ngirosi yakaereketa kwaari yaenda, wakadaidza vairi vevaranda vemhatso yake, nejoni raidira reavo vaigara vechimushandira. ⁸ Naapo aronza kwavari zveshe, wakavatuma kuenda Jopa. ⁹ Zvino nechimangwani, avo vachahamba vechikwedzera kudhorobha, Petro wakakwira padenga remhatso rakaterama kookumbira, rooda kuita awa rechitanhatu. ¹⁰ Wakazwa nzara, echidisisa kuti adye chiro; asi vachanasirira, wakabatwa ndimweya. ¹¹ Naye wakaona denga rakabeuka, nechiro chaidzaka chakadai ngejira gurutu rakadzaswa panyika rakasungwa marupande aro marongomuna. ¹² Mukati mwaro mwaiya nembeu dzeshe dzemhuka dzine mirenje mirongomuna nezvipuka zveshe zvinotamanda zvomunyika neshiri dzomudenga. ¹³ Neizwi rakauya kwaari rechiti: “Miruka, Petro; uraya, wechidya.” ¹⁴ Asi Petro wakati: “Haiwa, Mambo! Ngokuti andizi kumbodya chiro chisina shwiro nechakasvipiswa.” ¹⁵ Neizwi rakauyazve kwaari ngokwechipiri rechiti: “Chaakachenesa Mwari, usati achina shwiro.” ¹⁶ Ichi chakaitika mikuwo mitatu, jira rakaashirwazve mudenga. ¹⁷ Zvino Petro achakangaidzwa mukati mwake kuti chinoronzenyi chioniso icho chaaiya aona, penya, avo vanhu vakatumwa ndiKhoneriusi, vaiya vechibvunza mhatso yaSimoni, vakaema pamusiwo. ¹⁸ Navo vakadaidzira, vakabvunza kuti, Simoni unozwi Petro unogarapo here. ¹⁹ NaPetro achapinimidza ngechioniso, Mweya wakati kwaari: “Ringira, vanhu vatatu vanokutsvaka. ²⁰ Asi muruka udzake, uende navo usikagonondi; ngokuti ndini ndakavatuma.” ²¹ Petro wakadzaka kune vanhu avo, akati: “Ndini uwo womunotsvaka; mwahambirenyi?”. ²² Navo vakati: “Khoneriusi, nduna yezana, munhu wakarurama nounotya Mwari, unembiri yakanaka kudzinza reshe revaJudha, wakapangwa ngengirosi yakachena kukudaidza kuti uuye kumhatso yake, nokuzwa mazwi anobva kwouri.” ²³ Ndizvo Petro wakavadaidza kuti vapotere mukati, wakavapa zvokudya. Nechimangwani wakamuruka, akaenda navo, nehama dzimweni dzeJopa dzakaendawo naye. ²⁴ Nechimangwani vakapotera muSizaria, naKhoneriusi waivagarira, waiya adaidza pamwepo hama dzake neshamwari dzake dzinodikanwa. ²⁵ Naapo Petro apinda, Khoneriusi wakashongana naye, akawira patsoka dzake, akamudira. ²⁶ Asi Petro wakamumirudza echiti: “Miruka; neniwo ndiri munhu. ²⁷ Naapo achaereketa naye, wakapotera mukati, akaona vazhinji vakaungana. ²⁸ akati kwavari: “Imwimwi munozia kuti azvitenderwi ngemipango kuti muJudha ashonganiswe nokuti auye kunomunhu wedzinza rimweni. Asi inini Mwari wakandipangidzira kuti ndisazoronza kuti munhu chiro chisina shwiro nokuti wakasvipiswa. ²⁹ Ndizvo apo ndadaidzwa, ndauya ndisikarambi. Ndizvo ndinobvunza mwakandidaidzirenyi?” ³⁰ NaKhoneriusi wakati: “Aamazuva marongomuna akapinda, metsa kuguma awa iri, ndaingwarira awa rokukumbira rechipfumbamwe mumhatso yangu; ndakaona munhu wakaema pamberi pangu anezvokufuka zvinonanikira. ³¹ Naye wakati: ‘Khoneriusi, mikumbiro yako yakazwika, nokukovera zvipo kwako kwakakarakadzwa pamberi paMwari. ³² Ndizvo tuma kuJopa, udaidze Simoni, uwo unozwi Petro; unogara mumhatso yaSimoni, musukuti, pasinde poruandhle.’ ³³ Ndizvo paripo ndakatuma vanhu kwouri, newe ngokuuya wanasa; ndizvo tiri pano teshe pamberi paMwari kuzwa zveshe zvakapangwa kwouri ndiMwari.” ³⁴ NaPetro ashama muromo wake, wakati: “Ngegwinyiso ndinoona kuti Mwari andiyepi mutsananguri wevanhu. ³⁵ Asi kumadzinza eshe, weshe unomutya nokuita zvakarurama unoashirika kwaari. ³⁶ Munorizia izwi iro raakatuma kunavana vaIsuraeri, echichumaira mashoko akanaka okunyarara ndiJesu Kristu ndiye Mambo wavo veshe. ³⁷ Imwimwi munorizia izwi rakachumairwa munyika yeshe yeJudhia, kubvira ngomuGarire ngesure kworubhabhatidzo rwaakachumaira Johani. ³⁸ Ngenjira iyo Mwari yaakamudzodza ndiyo Jesu weNazaretha ndiMweya Wakachena nesimba; uwo waihamba echiita zvakanaka, echiponesa avo veshe vaitambudzwa ndiDhiabhorosi, ngokuti Mwari waiya naye. ³⁹ Nesu tiri zvapupu zveizvo zveshe zvaakaita kweshe munyika yevaJudha nomuJerusarema. Ndiye wevakauraya ngokumuturika pamuti. ⁴⁰ Uyu Mwari wakamumusa kubva murufu ngezuva rechitatu, akamupa simba kuti aoneke pamhene. ⁴¹ Asi haiwa kuoneka ngevanhu veshe, asi kwetiri isusu, takatsanangurwa karetu ndiMwari kuita zvapupu, avo vakadya nokumwa naye ngesure kwokumuka kwake kubva kwevakafa. ⁴² Wakatipanga kuchumaira kuvanhu nokupupura kuti uyu ndiye wakaemeswa ndiMwari kuita Mutongi wevanozwa nevakafa. ⁴³ Kwaari vaprofeti veshe vanoita chapupu ndiye, kuti ngezina rake, munhu weshe unotenda kwaari unozorekererwa zvishaishi.” ⁴⁴ Naapo Petro achaereketa aya mazwi, Mweya Wakachena wakadzaka padera pavo veshe vakazwa izwi. ⁴⁵ Naavo vatendi vevakachekwa avo vakauya naPetro vakashamiswa ngokuti chipo choMweya Wakachena chakadururwawo padera pevemadzinza. ⁴⁶ Ngokuti vaivazwa vechiereketa ngendimi nokukurisa Mwari. Naapo Petro wakapingura, akati: ⁴⁷ “Pane ungarambidza mvura here kuti ava vasabhabhatidzwa, avo vakaashira Mweya Wakachena kudai tisu?” ⁴⁸ Naye wakapanga kuti vabhabhatidzwe ngezina raJesu Kristu. Vorovomupota kuti agarepo mazuva amweni.