¹ Zvino vapostori nehama dzaigara muJudhia vakazwa kuti vemadzinza navo vaiya vaashira izwi raMwari. ² Naapo Petro akwira Jerusarema, vatendi avo vevakachekwa vakaita hasha naye, ³ vechiti: “Iwewe wakapotera kunevanhu vasikazi kuchekwa, ukadya navo!” ⁴ Asi Petro wakatanga kuvaronzera zveshe ngokuteererana kwazvo echiti: ⁵ “Ndaiya ndiri mudhorobha reJopa ndechikumbira; ndakabatwa ndimweya, ndakaona muchioniso chiro chakadai ngejira guru, rechidzaswa rakasungwa marupande marongomuna kubva mudenga; chakauya kwendiri. ⁶ Apo ndaningisisa, ndakaona mhuka dzine mirenje mirongomuna nezvikara zvomushango nezvinotamanda neshiri dzomudenga. ⁷ Ndakazwawo izwi rechiti kwendiri, ‘Miruka, Petro; uuraye, udye!" ⁸ Asi ndakati: ‘Haiwa, Mambo! Ngokuti apana chiro chisina shwiro nokuti chakasvipiswa chakambopotera mumuromo mwangu.’ ⁹ Asi izwi rakapingura ngokwechipiri rechibva mudenga rechiti: ‘Chaakachenesa Mwari, usati chiro chisina shwiro". ¹⁰ Izvi zvakaitika katatu; nazvo zveshe zvakaashirwazve kuhwirira mudenga. ¹¹ Panguvayo vanhu vatatu vakaguma pamhatso petaigara, avo vaiya vatumwa kwendiri vechibva Sizaria. ¹² NoMweya wakandironzera kuti ndiende navo, pasina muketo pakati pavo nesu. Nehama idzi nhanhatu dzakaendawo neni; nesu takapotera mumhatso yomunhuwo. ¹³ Naye wakaerengudza kwetiri ngenjira yeyakaoneka ndiyo ngirosi yechiema mumhatso mwake yechiti, ‘Tumira izwi kuJopa, uunze Simoni uwo unozwi Petro. ¹⁴ Naye unozoereketa kwouri mazwi ounozoponeswa ndiwo, iwewe nevemhatso yako veshe. ¹⁵ Naapo ndichatanga kureketa, Mweya Wakachena wakadzaka padera pavo, kudai ngezvewakadzaka padera pedu pakutanga. ¹⁶ Neni ndakakarakadza izwi raMambo raakaereketa echiti: ‘Johani wakabhabhatidza ngemvura, asi imwimwi munozobhabhatidzwa ndiMweya Wakachena". ¹⁷ Ndizvo, kudai Mwari akavapa chipo chimwecho icho chaakapawo kwetiri, apo petakatenda kunaMambo Jesu Kristu, inini ndirianani kuti ndingarwisana naMwari?” ¹⁸ Naapo vazwa izvi, vakanyarara. Vakakudza Mwari vechiti: “Ndizvo Mwari wakapawo kunevemadzinza kutenderuka kuti vapone.” ¹⁹ Ndizvo avo vakapararira kundau dzeshe ngendaa yokutambudzwa ukwo kwakaitika ngendaa yaStefano, vakahamba metsa kuguma Foenisia neSaipurasi neAntiokhi, vasikaereketi izwi kumunhu, asi kwega kuvaJudha. ²⁰ Asi vaiyapo vamweni vaiya vanhu veSaipurasi neveKurene, avo vakati vaguma muAntiokhi, vaiereketawo kuvaGiriki, vechichumaira ndiMambo Jesu. ²¹ Nenyara yaMambo yaiya navo, vazhinji vakatenda, vakatenderukira kunaMambo. ²² Mbiri yavo yakazwika munzee dzechiara chaiya muJerusarema, navo vakatuma Bhanabhasi kuenda Antiokhi. ²³ Naapo aguma nokuona nyasha dzaMwari, wakadakara; akavapanga veshe kuti varambe vakagondeka munaMambo ngomwoyo unogwinyisira. ²⁴ Ngokuti waiya munhu wakanaka, wakazara ndiMweya Wakachena nokugonda. Vanhu vazhinji vakatutsirwa kunaMambo. ²⁵ Bhanabhasi wakaenda Tarsusi kootsvaka Sauri. ²⁶ Naapo amuona, wakamuunza Antiokhi. Bhanabhasi naSauri vakapedza gore reshe vechiungana pamwepo nechiara, vechidzidzisa vanhu vazhinji; muAntiokhi vadzidzi vakatanga kududzwa kuti vaKristu. ²⁷ Mazuva awo vaprofeti vakadzaka Antiokhi vechibva Jerusarema. ²⁸ Umwe wavo waizwi ndiAgabhusi wakamiruka, akavaronzera kubudikidza ndiMweya kuti nzara huru inozogumira nyika yeshe; iyo yakaitika ngemazuva aKraudhiusi. ²⁹ Nevadzidzi vakatenderana, munhu weshe kudai ngezvaaikona, kuti atumire zvingadetsera hama dzaigara muJudhia. ³⁰ Naavo vakaita kudaro, vakazvitumira kunevakuru ngenyara dzaBhanabhasi naSauri.