¹ NaSauri waiya mubangano rokuurawa kwake. Kwakabuda ngeiro zuva kutambudzwa kukurutu kwechiara chaiya muJerusarema; navo veshe vakapararira munyika yeJudhia neSamaria, kwakasara vapostori vega. ² Nevanhu vaidira vakaika Stefano, vakamuchema kakurutu. ³ Asi Sauri waiparadza chiara, echipotera mumhatso ngemhatso, nokubata ngesimba veshe vamuna nevakadzi nokuvakonyera mutirongo. ⁴ Ndizvo avo vakapararira vakahambira ndau dzeshe vechichumaira izwi. ⁵ Firipu wakadzaka kudhorobha reSamaria, wakachumaira kwavari ndiKristu. ⁶ Vanhu vazhinji vakapurutana ngechisungo chimwe kune izvo zvaironzwa ndiFiripu, apo vazwa, vaona zvioniso zvaakaita. ⁷ Ngokuti kwakabuda mweya yetsvina kubva muvazhinji vaiya nayo, yechidaidzira ngeizwi guru; nevazhinji vaiya vakaoma muiri nezvirema vakaponeswa. ⁸ Kwakaapo kudakara kukuru mudhorobha iro. ⁹ Asi waiyapo munhu umweni, zina rake raizwi Simoni, waikamba mudhorobha iro, echishamisa dzinza revaSamaria, echironza kuti iye waiya mukuru. ¹⁰ Vakamupurutana veshe, kubvira kuvadoko metsa kuvakuru vechiti: “Uyu munhu isimba guru raMwari.” ¹¹ Navo vakamupurutana ngokuti kubvira mukuwo wakareba iye waiya avashamisa ngokukamba kwake. ¹² Asi apo vakatenda Firipu waiya echichumaira mashoko akanaka ngendaa youmambo hwaMwari nezina raJesu Kristu, vakabhabhatidzwa, veshe vamuna nevakadzi. ¹³ Kunyazwi naye Simoni wakatenda. Abhabhatidzwa wakaangira kugara naFiripu; wakashamiswa kakuru echiona zvioniso nemishamiso mikuru yechiitwa. ¹⁴ Naapo vapostori vaiya muJerusarema vazwa kuti vaSamaria vaiya vaashira izwi raMwari, vakatuma kwavari Petro naJohani. ¹⁵ Avo vairi vadzakayo, vakavakumbirira kuti vaashire Mweya Wakachena. ¹⁶ ngokuti waiya usati wadzaka padera poumwe wavo, asi vaiya vakabhabhatidzwa ngezina raMambo Jesu. ¹⁷ Naapo vakaisa nyara dzavo padera pavo, vakaashira Mweya Wakachena. ¹⁸ Zvino apo Simoni aona kuti Mweya wakapuwa kubudikidza ngokuiswa kwenyara dzevapostori padera pavo, iye wakada kuvapa mare. ¹⁹ Echiti: “Ndipeiwo iri simba kuti kunyazwi ndiani wendinozoisa nyara yangu padera pake, unozoashira Mweya Wakachena.” ²⁰ Asi Petro wakati kwaari: “Mare yako ngaipere pamwepo newe, ngokuti wapinimidza kuti chipuwo chaMwari chingatengwa ngemare. ²¹ Iwewe auna rupande nokuti chikoaniswa kuiyi ndaa, ngokuti mwoyo wako auzi kururama pamberi paMwari. ²² Ndizvo tenderuka ubve mukushaisha kwako uku, ukumbire kunaMambo, kuti pamweni kungarekererwa kwouri kupinimidza kwomwoyo wako. ²³ Ngokuti ndinoona kuti uri muchanduru chinovava nomukusungwa ngemaketani okushaisha.” ²⁴ NaSimoni wakapingura, akati: “Ndikumbirirei kunaMambo kuti ndisazogumirwa ngechimwe cheizvo zvemwaereketa.” ²⁵ Ndizvo apo vaiya vaita chapupu nokuereketa izwi raMambo, vakapetuka Jerusarema, vechichumaira vhangeri mumizi mizhinji yevaSamaria. ²⁶ Asi ngirosi yaMambo yakaereketa kunaFiripu yechiti: “Miruka, uende kubani ngenjira inodzaka kubva Jerusarema kuenda Gaza. Iyi injira yomushango.” ²⁷ Naye wakamiruka, akaenda. Ringira, munhu weEthiopia, muthenwa, nduna huru yaKhandase mambokadzi weEthiopia, waingwarira upfumi hwake hweshe, waiya akauya Jerusarema koodira. ²⁸ Iye waipetuka; akagara mungoro yake, naye waifunda bhuku romuprofeti Isaya. ²⁹ NoMweya wakati kunaFiripu: “Kwedzera ushongane nengoro iyi.” ³⁰ Firipu wakarumba kuenda kwaari, wakamuzwa echifunda bhuku raIsaya muprofeti, wakabvunza akati: “Unozwisisa here izvi zvounofunda. ³¹ Naye wakapingura akati: “Ndingaita mazwisisirenyi, asi kuti umwe anditungamirira?” Naye wakapota Firipu kuti akwire, agare naye. ³² Norupande rwezvinyorwa rwaaifunda rwaiya urwu: “Iye wakakweiwa kudai ngegwai koourawa, nokudai ngemwana wegwai rinonyarara pamberi pounorigunda, ngokudaro aabeuri muromo wake. ³³ Mukutsverudzwa kwake kutonga kwakarurama kwakabviswa kwaari. Ndiani unozoronza mibarirwana yake? Ngokuti kupona kwake kwakatorwa kubva munyika.” ³⁴ Nomuthenwa wakapingura kunaFiripu, akati: “Ndinokupota, muprofeti unoereketa izvi ndiani, ndiye emene here nokuti unoereketa ngoumweni?” ³⁵ Naapo Firipu wakabeura muromo wake, akatanga kubvira pachinyorwa ichi, wakachumaira kwaari ndiJesu. ³⁶ Vachahamba munjira, vakaguma pamvura; nomuthenwa wakati: “ningira, mvura iri pano. Chiinyi chinondirambidza kuti ndisabhabhatidzwa?” ³⁷ Firipu wakapingura, akati: “Kudai wechitenda ngomwoyo wako weshe, kunotenderwa.” Naye wakapingura echiti: “Ndinotenda kuti Jesu Kristu Mwana waMwari.” ³⁸ Naye wakapanga kuti ngoro iemeswe. Navo veshe vakadzaka mumvura, Firipu nomuthenwa, naye wakamubhabhatidza. ³⁹ Naapo vabuda kubva mumvura, Mweya waMambo wakabvisa Firipu; nomuthenwa aazi kuchamuona, ngokuti iye wakaenda munjira yake echidakara. ⁴⁰ Asi Firipu wakaoneka ari muAzotusi; echihamba, wakachumaira vhangeri mumadhorobha eshe metsa wakaguma Sizaria.