¹ Zvino mupristi mukuru wakati: “Izvi zvine gwinyiso here?” ² Naye wakati: “Hama nemadzibaba, purutanai kwendiri. Mwari wouthende wakaoneka kunababa edu Abrahama, apo pevaigara muMesopotamia, vasati vagara muHarani, ³ wakati kwaari: ‘Buda munyika yako nokubva kuhama dzako, uende munyika yendinozokupangidzira. ⁴ Naapo wakabuda kubva munyika yevaKharadhea, akagara muHarani. Ngesure kwokufa kwababa ake, Mwari wakamuthuthisa kubveyo kuti auye munyika iyi yomunogara zvinopano imwimwi. ⁵ naye aazi kumupa nhaka mukati mwayo, haiwa kunyazwi nepanokwana kutsikwa ngetsoka, asi wakamugondisa kuti unozoipa kwaari kuti iite nhaka yake neyorudzi rwake runozouya sure kwake, apo paaiya asati abara mwana. ⁶ NaMwari wakareketa ngenjira iyi kuti: ‘Mibarirwana yake inozoita vanhu vapara munyika yevamweni, avo vachavaita hloko dzavo, vechivabata ngenjira yakashata metsa kupera kwemakore mazana marongomuna. ⁷ Asi ndinozoritonga iro dzinza revanozoitwa ndiro hloko,’ wakaronza Mwari, ‘Nangesure kweizvo vanozobuda, vandidire mundau iyi. ⁸ Naapo wakamupa chitenderano chokuchekwa. Ndizvo Abrahama abara Isaka, wakamucheka ngezuva rechisere; naIsaka wakabara Jakobe naJakobe wakabara madzibaba mukuru gumi navairi. ⁹ “Nemadzibaba mukuru vakaita ndurumwa ndiJosefa, vakamutengesa Egipite; asi Mwari waiya naye,, ¹⁰ Naye wakamununurira kubva kumadambudziko ake eshe, wakamupa nyasha noungwaru pamberi paFaro, mambo weEgipite, uwo wakamuemesa kuti aite mutongi padera peEgipite nemhatso yake yeshe. ¹¹ Zvino nzara yakauya padera penyika yeshe yeEgipite neyeKhenani, nokutambudzika kukurutu; nemadzibaba edu avazi kuona zvokudya. ¹² Asi apo Jakobe azwa kuti yaiyamwo koroni muEgipite, wakatuma madzibaba edu panguva yokutanga. ¹³ Parwendo rwechipiri, Josefa wakaita pachake kuti aziikanwe kuvakoma vake, nehama dzaJosefa dzakaziikanwa kunaFaro. ¹⁴ NaJosefa wakavatuma koodaidza kuti vauye kwaari baba ake Jakobe nehama dzake dzeshe, vanhu makumi manomwe navashanu. ¹⁵ ndizvo Jakobe wakadzaka kuenda Egipite. Naye wakafa, iye namadzibaba edu. ¹⁶ navo vakatwarwa kupetudzwa Shekemi, vakaikwa muiba raakatenga Abrahama ngesirivha kubva kuvakororo vaHamori muShekhemu. ¹⁷ "Naapo wakwedzera mukuwo wechigondiso, chaakapika Mwari kuna Abrahama, vanhu vakaangira kuwanda nokuita vazhinji muEgipite ¹⁸ metsa ‘Kwagadzwa mambo umweni kutonga padera peEgipite, uwo waiya asikazii Josefa.’ ¹⁹ Wakabata dzinza redu ngourimbwi, wakaangiridza madzibaba edu kuti varashe vana vavo, kuti vasapona. ²⁰ Panguva iyi Mosi wakabarwa, naye waiya akanaka kakurutu pamberi paMwari. Wakarerwa mwedzi mitatu mumhatso yababa ake. ²¹ naapo aiswa pabanze, mwanasikana waFaro wakamutonha, akamurera kuti aite mwana wake. ²² NaMosi wakadzidziswa ungwaru hweshe hwevaEgipite, waiya akagwinya mumazwi ake nomumishando yake. ²³ “Naapo aguma makore makumi marongomuna okubarwa, wakada mumwoyo mwake kuti ahambire hama dzake vana vaIsuraeri. ²⁴ Naapo echiona umwe wavo echishaishirwa, wakarwira uwo waitsikirirwa, akauraya muEgipite. ²⁵ Asi wakapinimidza kuti hama dzake dzaizwisisa kuti Mwari waida kuvaponesa kubudikidza ngenyara yake, asi avazi kuzwisisa. ²⁶ Ngezuva raiteera, wakaguma kwavari vechiambana, naye wakaereketa kwavari kuti avaiyanise echiti, ‘Vamuna, muri hama; munoshaishirana ngenyi?’ ²⁷ Asi iye waishaishira muakirwana wake wakamututumidza echiti, ‘Ndiani wakakuemesa kuita mambo nomutongi padera pedu? ²⁸ Iwewe unoda kundiuraya here kudai ngezvewakauraya muEgipite zuro? ²⁹ Naapo Mosi azwa izwi iro wakatiza, akaita chigarandimo munyika yeMidhiani, apo paakabara vakororo vairi. ³⁰ “Naapo makore makumi marongomuna apera, ngirosi yakaoneka kwaari ari mushango roMutunhu weSinai, iri mumirazvu yomuriro. ³¹ Naapo Mosi echiona, wakashamiswa ngechioniso; achakwedzera kuringira, izwi raMambo Mwari rakazwika rechiti: ³² ‘Inini ndini Mwari wemadzibaba ako, Mwari waAbrahama, waIsaka nowaJakobe.’ NaMosi wakahuta, akatya kuringira. ³³ Mambo Mwari wakati kwaari, ‘Dusa magwada kubva patsoka dzako, ngokuti pandau pewakaema pamavhu akachena. ³⁴ Ngegwinyiso ndakaona kutambudzwa kwevanhu vangu vari muEgipite, ndakazwa kugomera kwavo, ndadzaka kuti ndivanunure. Zvino uya, ndinozokutuma Egipite.’ ³⁵ “Ndiye uyu Mosi wevakaramba vechiti: ‘Ndiani wakuita mambo nomutongi?’ Ndiye wakatumwa ndiMwari kuti aite mambo nomusunhuri kubudikidza ngengirosi yakaoneka kwaari mupfiba. ³⁶ Uyu munhu wakavatungamirira kubuda, aita mishamiso nezvioniso munyika yeEgipite nomuRuandhle Rwakatsvuka nomushango kwemakore makumi marongomuna. ³⁷ Uyu ndiye Mosi uwo wakati kuvana vaIsuraeri: ‘Mwari unozomumirudzira Muprofeti kubva muhama dzenyu, wakadai ndini.’ ³⁸ Uyu ndiye waiya mumbungano mushango nengirosi yakaereketa kwaari paMutunhu weSinai, anemadzibaba edu; uwo wakaashira mazwi okupona kuti aape kwetiri. ³⁹ Madzibaba edu akaramba kumupurutana, asi vakamututumidza parutii kubva kwavari, vakakunukudzira mwoyo yavo kuhwirira Egipite. ⁴⁰ vechiti kunaAroni, ‘Tiitire zvimwari zvinozotitungamirira; ngokuti uyu Mosi wakatibudisa kubva kunyika yeEgipite, atizii chakaitika kwaari.’ ⁴¹ Navo vakaumba konyana ngaawo mazuva, vakaita mudiro kunouwo muedzaniso, vakadakara ngomushando wenyara dzavo. ⁴² Asi Mwari wakavafuratira, akavarekera kuti vadire hondo dzomudenga, kudai ngezvakanyorwa mubhuku revaprofeti kuti, “Mwakapira kwendiri here mhuka dzakaurawa nemidiro kwemakore makumi marongomuna muri mushango, imwimwi vemhatso yaIsuraeri? ⁴³ Nemwi mwakatora tende raMorekhi nenyeredzi yechimwari chenyu Refani, miedzaniso yemwakaita kuti muidire; neni ndinozomututisa kuenda mberi kweBhabhuroni. ⁴⁴ “Madzibaba edu vaiya netende rechapupu mushango, kudai ngezvaakaemesa uwo wakaereketa kunaMosi, kuti ariite kudai ngechionero chaakaona. ⁴⁵ Iro rakaashirwa ngemadzibaba edu vakapotera naro naJoshua, apo pevakapotera kugara nhaka yevemadzinza, aakadzinga Mwari kubva pamberi pehope dzemadzibaba edu. Naro rakaapo metsa kuguma kumazuva aDhavhidha, ⁴⁶ uwo wakaona nyasha pamberi paMwari, akadisisa kuti atsvakire mhatso yaJakobe ugaro. ⁴⁷ Asi ndiSoromoni wakazomuakira mhatso. ⁴⁸ Asi Uripadera pazveshe aagari muugaro hwakaitwa ngenyara; kudai ngezvaakaereketa muprofeti echiti. ⁴⁹ “Denga ndicho chigaro changu choumambo, nenyika ndicho chitambarariro chetsoka dzangu. Munozondiakira mhatso yakadini, unoronza Mambo Mwari, nokuti ngeiri ndau yokuzorora kwangu? ⁵⁰ Nyara yangu aizi kuita izvi zveshe here?. ⁵¹ “Imwimwi mune mitsipa yakakukutara, nevano mwoyo nenzee zvisikazi kuchekwa, munondogara mwechirwisana noMweya Wakachena; kudai ngezvevakaita madzibaba enyu, ndizvo zvomunoitawo imwimwi. ⁵² Ngouri wevaprofeti usikazi kutambudzwa ngemadzibaba enyu? Navo vakauraya avo vakavaronzera ngepamberi ngokuuya kwoUmwe Wakarurama, zvinopano imwimwi mwakamupira nokumuuraya. ⁵³ Imwimwi mwakaashira Mipango yakaunzwa ngengirosi, nemwi amuzi kuingwarira.” ⁵⁴ Naapo vechizwa izvi vakanyangadzwa navo vakamukwetsera mazino. ⁵⁵ Asi iye azadzwa ngoMweya Wakachena, akaringira mudenga, akaona uthende hwaMwari naJesu akaema ngokumudyo kwaMwari. ⁵⁶ Akati :“Ringira, ndinoona mudenga mwakabeurwa, noMwana woMunhu akaema ngokumudyo kwaMwari.” ⁵⁷ Asi vakadaidzira ngeizwi guru, vakatsiira nzee dzavo, vakamutsotokera ngechisungo chimwe, ⁵⁸ Navo vakamubudisa kubanze kwedhorobha, vakamuponda ngemapuwe. Nezvapupu zvakaisa zvokufuka zvavo patsoka dzejaha raizwi Sauri. ⁵⁹ Navo vakaponda Stefano ngemapuwe; wakakumbira echiti: “Mambo Jesu, ashirai mweya wangu.” ⁶⁰ Naye wakagwadama pashi, akadaidzira ngeizwi guru echiti: “Mambo, usavaitira ndaa ngouku kushaisha.” Naapo aereketa izvi, wakafa.