¹ Zvino mumazuva aya, apo vadzidzi vaiangira kuwanzwa, vaJudha vaiereketa chiGiriki vakavhuruvhutira vaHebheru, ngendaa yokuti shirikadzi dzavo dzairekeredzwa mukukoanisirwa kwezuva ngezuva., ² Nevari gumi navairi vakadaidza kwavari chiunga chevadzidzi, vakati: “Akusisiri kuti isusu tisiye izwi raMwari, tishande pamatafura. ³ Ndizvo, hama dzangu, tsanangurai vamuna vanomwe kubva pakati penyu vanogondeka, vakazara ndiMweya nokungwara, vetingaemesa padera pouyu mushando ⁴ Asi isusu tinozoangira mukukumbira nomumushando weizwi.” ⁵ Neizwi iro rakadakadza chiunga cheshe, navo vakatsanangura Stefano, munhu wakazara ngokugonda noMweya Wakachena, Firipu, Prokhorusi, Nikano, Thimona, Phamenasi naNikorusi weAntiokhi waiya akatenderukira kuchiJudha. ⁶ Vakavaisa pamberi pevapostori, naapo vaiya vakumbira, vakaisa nyara dzavo padera pavo. ⁷ Neizwi raMwari rakaangira kupararira; chiunga chevadzidzi chakaangira kukura kakurutu muJerusarema; nevapristi vazhinji vakapurutana mukutenda. ⁸ Stefano azara ngenyasha nesimba, waiita mishamiso nezvioniso zvikuru pakati pevanhu. ⁹ Zvino vamweni veavo vemhatso yokudira vanozwi Vanhu Vakasununguka, nevaKurene, nevaArekizanda, neavo vanobva Sirisia, nevaAsia, vakamiruka vechiita hasha naStefano. ¹⁰ Navo avazi kukona kuemesedzana noungwaru noMweya zvaakaereketa ndizvo. ¹¹ Naapo ngokufishika vakanyengerera vanhu kuti vati: “Takamuzwa echireketa mazwi okutuka Mosi naMwari.” ¹² Navo vakavherudza vanhu nevakuru nevanyori, vakamutsotokera, vakamubata, vakamuunza kune vatongi. ¹³ Vakaemesa zvapupu zvokunyepa, izvo zvakati: “Munhu uyu aatongorekeri kuereketa mazwi okutuka iyi ndau yakachena neMipango; ¹⁴ ngokuti takamuzwa echironza kuti, uyu Jesu weNazaretha unozoparadza ndau iyi, nokupinduridza mitoo yaakapa kwetiri Mosi.” ¹⁵ Naavo veshe vaiya vakagara pavatongi, vechimuringisisa, vakaona hope yake yakadai ngehope yengirosi.