¹ Asi munhu waizwi Ananiasi, nomukadzi wake Safira, wakatengesa nhaka. ² Wakasara norupande rwomutengo, nomukadzi wake echizia naye, aunza rupande rwomutengo, wakaruisa patsoka ndzevapostori. ³ Asi Petro wakati: “Ananiasi, Sathani wazadza ngenyi mwoyo wako kuti unyepe kunoMweya Wakachena nokusara norupande rwomutengo womunda. ⁴ Ngenguva uchipo waiya usiri wako here? Nangesure kwokutengeswa kwawo, ausaiya uri pashi pesimba rako here? Wakapinimidza ngenyi izvi mumwoyo mwako? Auzi kunyepera vanhu, asi Mwari.” ⁵ Naapo Ananiasi echizwa aya mazwi, wakawa pashi, akafa. Nokutya kwakakura kwakagumira avo veshe vakazvizwa. ⁶ Majaha akamiruka, akamuputira, akamutwara kuenda kubanze koomuika. ⁷ Ngesure kwomukuwo unoda kuita maawa matatu, mukadzi wake, asikazii izvi zvakaitika, akapoteramwo. ⁸ Petro wakati kwaari: “Ndironzere kuti mwakatengesa munda here ngemare yakadai?” Naye wakati: “Eya, ngemare yakadaro.” ⁹ Asi Petro wakati kwaari: “Mwakatenderana ngenyi kuedza Mweya waMambo? Wona, tsoka dzaavo vaika mwamuna wako dziri pamusiwo, navo vanozokutwara kuenda kubanze.” ¹⁰ Paripo wakawa pashi patsoka dzake, akafa. Naapo majaha apotera akamuona afa, akamutwara kumubudisa kubanze, akamuika paiya nomwamuna wake. ¹¹ Nokutya kwakakura kwakagumira veshe vechiara nepadera peavo veshe vakazwa izvi. ¹² Zvino zvioniso nezvishamiso zvakawanda zvaiitwa ngenyara dzevapostori pakati pevanhu. Navo vaiyapo veshe ngechisungo chimwe muBerere raSoromoni. ¹³ Asi akuna naumwe wechikwata chimweni waishinga kuti apindire mukati mwavo, asi vanhu vakavaremeredza. ¹⁴ Nevatendi vakapinda kututsirwa kunaMambo, vazhinji vamuna nevakadzi, ndizvo vakabudisa mumapato avo vairwara, ¹⁵ vakavaradzika pamanhi nepamisengere, kuti apo Petro echipindapo, bvute rake ritibikire vamweni vavo. ¹⁶ Vakaunganawo vanhu vazhinji vechibva kumadhorobha aitendenedza Jerusarema, vechiunza vairwara ngomweya ine tsvina, navo veshe vakaponeswa. ¹⁷ Asi kwakamiruka mupristi mukuru, naavo veshe vaiya naye, venhengo yechikwata chevaSadhusi, navo vakazara ngendurumwa, ¹⁸ vakabata vapostori, vakavaisa mutirongo risina shwiro. ¹⁹ Asi usiku ngirosi yaMambo yakabeura misiwo yetirongo, ikavabudisa kubanze, nayo yakati: ²⁰ “Endai, mueme muTemperi mwechironzera vanhu mazwi eshe okupona uku.” ²¹ Naapo vazwa izvi, vakapotera muTemperi mangwanani maishi, vakadzidzisa. Naapo mupristi mukuru wakauya naavo vaiya naye, akadaidza pamwepo vatongi veshe nevakuru veshe vevanhu vaIsuraeri, vakatumira izwi kutirongo kuti vavaunze. ²² Asi apo vangwariri veTemperi vakatumwa vagumapo, avazi kuvaona mutirongo, navo vakapetuka vakavaronzera. ²³ vechiti: “Mhatso yetirongo taiona yakakonywa zvakanaka, nevangwariri vakaema pamisiwo; asi apo tabeura atizi kuona munhu mukati.” ²⁴ Zvino apo nduna yeTemperi nevapristi vakuru vazwa mazwi aya, vakakangaidzwa kakurutu ndivo, kuti izvi zvingazoita mapererenyi. ²⁵ Naapo pakauya munhu umweni akavaronzera echiti: “Wonai, vanhu vemwakakonyera mutirongo vanoema muTemperi vechidzidzisa vanhu.” ²⁶ Naapo nduna pamwepo nevangwariri veTemperi vakaenda, vakavaunza, asi avazi kuita zvokuvaangiridza, ngokuti vaitya kupondwa ngemapuwe ngevanhu. ²⁷ Naapo vaiya vavaunza, vakavaisa pamberi pevatongi. Nomupristi mukuru wakavabvunza: ²⁸ echiti, “Takamupangirisisa kuti musazodzidzisa ngeiri zina, zvino wonai, mwazadza Jerusarema ngorudzidziso rwenyu, nemwi munoda kuunza padera pedu ngazi yomunhu uyu.” ²⁹ kutenderuka kuvaIsuraeri nokukungurirwa zvishaishi. ³⁰ Asi Petro nevapostori vakapingura, vakati, “Tinosisira kuti tipurutane Mwari, haiwa kupurutana vanhu. ³¹ Mwari wemadzibaba edu wakamusa Jesu uwo wemwakauraya ngokumuturika pamuti.Iye Mwari wakamumirudza ngokumudyo kwake kuti aite Mutungamiriri noMuponesi, kuti ape. ³² Nesu tiri zvapupu zvaaya mazwi, noMweya Wakachena, uwo waakapa Mwari kwavari vanomupurutana.” ³³ Naapo vazwa izvi, vakazadzwa ngoushungu, vakada kuvauraya. ³⁴ Asi umwe wevaFarisi wakamiruka kubva pakati pevatongi, zina rake ndiGamarieri, mudzidzisi weMipango, uwo wairemeredzwa ngevanhu veshe, naye wakapanga kuti avo vanhu vambobudiswa kubanze kwomukuwo mudoko. ³⁵ Wakati kwavari: “Imwimwi vamuna vaIsuraeri, dzingwarirenyi ngeizvo zvomunoda kuita ngeava vanhu. ³⁶ Ngokuti ngemazuva ekaretu Theudhasi wakamiruka, echiti iye waiya mukuru. Vanhu vaida kuita mazana marongomuna vakamuteera; asi wakaurawa, naavo veshe vakamuteera vakaparadzwa, vakapera. ³⁷ Ngesure kwake Judhasi muGarire wakamiruka ngemazuva okunyorwa mazina, wakakweya vanhu vamweni kuti vamuteere; iye naye wakafa, naavo veshe vakapaukiswa ndiye vakapararira veshe. ³⁸ Ndizvo zvino ndinoti kwomuri, taraukai kubva kuneava vanhu, muvarekere vari vega; ngokuti kudai iri zano nouyu mushando zviri zvevanhu, zvinozoparadzwa. ³⁹ Asi kuti zviri zvaMwari, amuna simba rokuvanyisa. Ngokuti pamweni mungadai mwechirwisana naMwari!” Navo veshe vakatenderana naye. ⁴⁰ naapo vadaidza vapostori kwavari, vakavashwapura, vakapangirisisa kuti vasazoereketa ngezina raJesu, vakavarekera. ⁴¹ Ndizvo vakabva pamberi pevatongi, vechidakara ngokuti vakaerengwa kuita vanosisira kuitirwa zvinotsverudza ngendaa yezina rake. ⁴² Mazuva eshe muTemperi nomumakanyi avazi kurekera kudzidzisa nokuchumaira ndiJesu kuti ndiye Kristu.