¹ Apo Petro naJohani vachareketa kunevanhu, vapristi nenduna yeTemperi nevaSadhusi vakauya kwavari, ² Vakatsamwa maningi ngokuti vaidzidzisa vanhu nokuchumaira kumuka kwevakafa munaJesu. ³ Navo vakavabata, vakavaisa mujere metsa zuva rechimangwani, ngokuti aiya amadeekoni. ⁴ Asi vazhinji vakazwa izwi vakatenda; nouwandu hwevanhu hwaida kuguma makumi mashanu emazana. ⁵ Ngezuva rechimangwani, vatongi vavo, vakuru nevanyori, vakaungana muJerusarema. ⁶ naAnasi mupristi mukuru, Kaiafasi, Johani naArekizanda, naavo veshe vaiya vemhatso yomupristi mukuru. ⁷ Naapo vaiya vavaemesa pakati pavo, vakavabvunza kuti: “Imwimwi mwaita izvi zviro ngesimba nokuti ngezita raani?” ⁸ Zvino Petro, azadzwa ndiMweya Wakachena, wakati kwavari: “Imwimwi vatongi vevanhu nevakuru, ⁹ kudai isusu techibvunziswa nyamashi ngendaa yomushando wakanaka wakaitwa kunomunhu wakaremara, kuti waponeswa ngenjira yakaitawani. ¹⁰ Ngazviziikanwe kwomuri mweshe nokuvanhu veshe vaIsuraeri, kuti ngezita raJesu Kristu weNazaretha, uwo wemwakakohomera, uwo waakamusa Mwari kubva kwevakafa, kubudikidza ndiye, uyu munhu unoema pamberi penyu apona. ¹¹ Uyu ndiye ‘Buwe rakarambwa ndimwi vaaki, uwo wakaita soro repakona.’ ¹² Akunazve kuponeswa ngoumweni, ngokuti akuna zina rimweni pashi pomudenga rakapuwa kunavanhu kuti tiponeswe ndiro." ¹³ Zvino apo vaona kushinga kwaPetro naJohani, vaona kuti vaiwa vanhu vasikazi kudzidza, vanhutu vasina chevanozia, vakashama; navo vakazia kuti vaiya naJesu. ¹⁴ Vechiona munhu wakaponeswa echiema navo, avazi kukona kuramba chiro. ¹⁵ Asi apo vaiya vavapanga kuti vabve pakati pevatongi, vakapangana pakati pavo. ¹⁶ vechiti: “Tinozoitenyi ngevanhu ava? Ngokuti zvakaoneka pamhene ngevanhu veshe vanogara muJerusarema kuti ngegwinyiso mushamiso unembiri wakaitwa kubudikidza ndivo; nesu atikoni kuramba. ¹⁷ Asi kuti zvisachazopararira pakati pevanhu, ngativakohomedzise kuti vasachazoereketazve kunevanhu kunyazwi ngouri ngezina iri Naapo ¹⁸ vakavadaidza, vakavapangisisa kuti vasachazoereketa nokuti kudzidzisa ngezina raJesu. ¹⁹ Asi Petro naJohani vechipingura vakati kwavari: “Kuti kwakanaka mukuona kwaMwari kupurutana kwomuri kunokupurutana kunaMwari, gurai imwimwi. ²⁰ Ngokuti isusu atikoni kurekera kuereketa ngeizvo zviro zvetakaona nezvetakazwa.” ²¹ Ndizvo apo vaiya vavakohomedzisazve, vakavarekera kuti vaende, vasikaoni ndaa yokuti vavaorore ndiyo, ngendaa yevanhu, ngokuti vanhu veshe vaikudza Mwari ngeizvo zvakaitwa. ²² Ngokuti munhu uwo waiya nemakore anopinda makumi marongomuna okubarwa kwake, uwo chioniso ichi chokuponeswa chakaitwa kwaari. ²³ Naapo varekerwa kuti vaende, vakauya kunevanhu vavo, vakavarobuira zveshe izvo zvakarobuiwa kwavari ngevapristi vakuru nevakuru. ²⁴ Naapo vazvizwa, vakadaidzira kunaMwari ngechisungo chimwe, vakati: “A Mambo, iwewe ndiwe wakasika denga nenyika noruandhle nazvo zveshe zviri mukati mwazvo. ²⁵ iwewe wakaereketa ndiMweya Wakachena kubudikidza ngomuromo womuranda wako, baba edu Dhavhidha kuti: “ ‘Ngeyi madzinza akaita ushungu nevanhu vakapinimidza zvisina shwiro? ²⁶ Madzimambo enyika akadzinasirira pachavo nevatongi vakaungana pamwepo kumukira Mambo Mwari naKristu wake.’ ²⁷ Ngokuti ngegwinyiso vakaungana mudhorobha iri kumukira Muranda wako wakachena Jesu, uwo wemwakadzodza, veshe Herodhi naPhontiusi Piratu, nemadzinza nevanhu veshe vaIsuraeri. ²⁸ kuita zveshe izvo zvakaemeswa ngepamberi ngenyara yako nangokupanga kwako kuti zviitike ²⁹ Zvino, Mambo Mwari, ringira kukohomedzisa kwavo, upe kuvaranda vako kuti vaerekete izwi rako ngokushinga kweshe. ³⁰ Naapo mwechitambanudza nyara yenyu kuponesa, zvioniso nemishamiso zvinoitwa kubudikidza ngezina roMuranda wenyu wakachena Jesu.” ³¹ Naapo vaiya vakumbira, ndau yakazungunyiswa apo pevaiya vakaungana; navo veshe vakazadzwa ndiMweya Wakachena, vakaereketa izwi raMwari ngokushinga. ³² Zvino mbungano yeshe yeavo vakatenda vaiya nomwoyo umwe nomweya umwe, akuna naumwe wavo waironza kuti zviro zvaaiya nazvo zvaiya zvake; asi zveshe zvaiya zvavo veshe. ³³ Ngesimba guru vapostori vakaita chapupu chokumuka kwaMambo Jesu kubva kwevakafa; nenyasha huru dzaiya padera pavo veshe. ³⁴ Ngokuti paiya pasina naumwe pakati pavo waitama, ngokuti vazhinji vaiya neminda nokuti mhatso vakazvitengesa, vakaunza mitengo yeizvo zvakatengeswa ³⁵ vakaiisa patsoka dzevapostori; nazvo zvakakoanisirwa kunaumwe ngaumwe kudai ngokutama kwomunhu. ³⁶ NaJosefa, uwo wakadudzwa ngevapostori kuti, Bhanabhasi, zvinoronza kuti: “Mwana wokuembedzera,” muRevhi, munhu weSaipurasi, ³⁷ wakatengesa munda, naye wakaunza mare, akaiisa patsoka dzevapostori.