¹ Zuva rimweni Petro naJohani vaikwira kuTemperi ngeawa rokukumbira, awa rechipfumbamwe. ² Nomunhu waiya chirema kubvira mundani yamai ake waitwarwa, uwo wevaiisa zuva ngezuva pamusiwo weTemperi, unozwi Musiwo Wakanaka, kuti apemhe kunevaipotera muTemperi. ³ Naapo aona Petro naJohani vooda kupotera muTemperi wakapemha. ⁴ Petro echimuringisisa, naJohani, wakati, “Ringira kwetiri.” ⁵ Naye wakavaringira, echikarira kuti unozopuwa chiro ndivo. ⁶ Asi Petro wakati: “Andina sirivha nomukore; asi ndinokupa icho chendinacho. Ngezina raJesu Kristu weNazaretha, miruka uhambe.” ⁷ Naye wakamubata ngenyara yokumudyo, akamumirudza; paripo tsoka dzake nemadziso etsoka dzake zvakagwinyiswa. ⁸ Naye echinyanduka wakaema, akatanga kuhamba, akapotera navo muTemperi, echihamba nokunyanduka, echikudza Mwari. ⁹ Vanhu veshe vakamuona echihamba, echikudza Mwari. ¹⁰ Navo vakazia kuti ndiye uwo waigara echipemha zvipo pamusiwo weThemperi unozwi Musiwo Wakanaka. Vakashamiswa nokukangaidzwa ngeizvo zvaiya zvaitika kwari. ¹¹ Naapo achabata Petro naJohani, vanhu veshe vakarumba kuungana kwavari vari muBerere raSoromoni, vechishamiswa kakurutu. ¹² Naapo Petro azviona, wakaereketa : “Imwimwi vanhu vaIsuraeri, munoshamiswa ngenyi ngeizvi? Nokuti munotiringisisa ngenyi ingatei isimba redu nokuti unaku hwedu zvaita kuti ahambe?, ¹³ Mwari waAbrahama, waIsaka, waJakobe nowemadzibaba edu, wakakudza muranda wake Jesu, uwo wemwakapira imwimwi, mukamuramba pamberi pehope yaPiratu, apo paaiya ada kumusunhura. ¹⁴ Asi imwimwi mwakaramba uwo Wakachena neWakarurama, mukakumbira kuti muurayi apuwe kwomuri. ¹⁵ Mwakauraya Muambi wokupona; uwo waakamusa Mwari kubva kwevakafa. Isusu tiri zvapupu kuneizvi. ¹⁶ Ngokugonda zina rake, zina rake remene raita kuti agwinye, uyu munhu womunoona nowomunozia; kubudikidza ngokugonda munaJesu kwaita kuti agwinye kudai pamberi penyu mweshe. ¹⁷ “Nazvino hama, ndinozia kuti mwakazviita ngokusikazia, kudai ngezvevakaitawo vatongi venyu. ¹⁸ Asi izvo zvaakaronza Mwari ngepamberi ngomuromo wevaprofeti veshe, kuti Kristu wake unozotambudzika, iye wakazvizadzisa kudaro. ¹⁹ Ndizvo tenderukai mukunukukire kunaMwari kuti zvishaishi zvenyu zvitsukutidzwe, ²⁰ kuti nguva dzokugwinyiswa mumweya dziuye dzinobva pamberi paMambo, zve, kuti atume Kristu Jesu uwo wakaemeserwa imwimwi. ²¹ Uwo unosisira kuti aashirwe mudenga metsa nguva yaguma yokumusirirwa kwezviro zveshe, yaakaereketa ndiyo Mwari ngemiromo yevaprofeti vake vakacheneswa kubvira pakutanga. ²² Ngokuti Mosi wakati, ‘Mambo Mwari wenyu unozomumirudzira muprofeti unobva pakati pehama dzenyu, muprofeti wakadai ndini. Munosisira kuzopurutana kuzviro zveshe zvaanozoereketa kwomuri. ²³ Kunozoitika kuti weshe usikazopurutani kunouwo muprofeti, unozoparadzwa kubva pakati pevanhu.’ ²⁴ Eya, nevaprofeti veshe, kubvira kunaSamueri naavo veshe vakateera, vakaronza ngaaya mazuva. ²⁵ Imwimwi muri mibarirwana yevaprofeti nevechitenderano chaakaita Mwari namadzibaba enyu, echiti kunaAbrahama, ‘Ngemibarirwana yako madzinza eshe omunyika anozofumiswa.’ ²⁶ Mwari wakamirudza Muranda wake, akamutumira kwomuri kutanga kuti amufumise, ngokutenderudza umwe ngaumwe wenyu kubva mukushata kwenyu.”