¹ Naapo raguma zuva rePentekosti vaiya vakaungana pamwepo veshe pandau imweyo. ² Paripo rakaguma kubva mudenga bope rakadai ngokuvhuvhuta kwedutu rine simba, naro rakazadza mhatso yeshe apo pevaigara. ³ Kwakaoneka kwavari ndimi, dzakadai ngemirazvu yomuriro, dzakadziparadzanisa pakati pavo, dzikagara padera pavo veshe. ⁴ Navo veshe vakazadzwa ndiMweya Wakachena, vakatanga kuereketa ngendimi dzimweni, kudai ngezvaakapa Mweya kwavari kuti vaerekete. ⁵ Zvino muJerusarema mwaigara vaJudha, vanhu vanodira, vakabva kumadzinza eshe ari pashi pomudenga. ⁶ Naapo iri bope razwika, mbungano yakaungana pamwepo, navo vakashamiswa ngokuti munhu umwe ngaumwe waivazwa vechiereketa ngendimi yake. ⁷ Navo vakashamiswa nokukangaidzwa vechiti: “Ringirai, avo veshe vanoereketa avasiri vaGarire here? ⁸ Nesu teshe tinoita mazwirenyi munhu umwe ngaumwe ngendimi yake yaakabarwa nayo? ⁹ VaPartia, vaMedhe, vaEramu nevagari veMesopotamia, Judhia neKhapadhosia, Pontusi neAsia, ¹⁰ Frigia nePamufiria, Egipite nemarupande eRibhia anotendenedza Kurene, nevaeni vanobva Roma, ¹¹ veshe vaJudha nevemadzinza vanotenda chiJudha, vaKrete nevaArabhia, tinovazwa vechiereketa ngendimi dzedu ngoukuru hwemishando inesimba yaMwari.” ¹² Veshe vakashamiswa nokukangaidzwa, vechiti umwe kunoumweni: “Zvinoronzenyi izvi?” ¹³ Asi vamweni vechiita jee vakati: “Vadhakwa ngevhini idzva.” ¹⁴ Asi Petro, echiema pamwepo nevane gumi naumwe, wakadaidzira ngeizwi rake, echichumaira kwavari echiti: “Vanhu veJudhia nemwi mweshe munogara muJerusarema, izvi ngazviziikanwe kwomuri, mupurutane mazwi angu. ¹⁵ Ngokuti ava avazi kudhakwa, kudai ngezvomunopinimidza; ngokuti richiri awa rechitatu rezuva. ¹⁶ asi izvi ndizvo zvakaereketwa ngomuprofeti Joeri echiti:“ ¹⁷ ‘Mwari unoti, Mumazuva okupedzisira kunozoitika kuti ndinozodurura Mweya wangu padera pevanhu veshe, nevakororo venyu nevasikana venyu vanozoprofeta, nemajaha enyu anozoona zvioniso, neharahwa dzenyu dzinozorota hope. ¹⁸ Kunyazwi nepadera pevaranda vangu vevamuna nepadera pevarandakadzi vangu ndinozodurura ngaao mazuva Mweya wangu; navo vanozoprofeta. ¹⁹ Neni ndinozoonisa zvishamiso mugore nezvioniso munyika: ngazi nomuriro nokupwititika kwechiushi. ²⁰ Zuva rinozotsandurwa kuita chidima nomwedzi kuita ngazi, risati raguma zuva guru nerine mbiri raMambo. ²¹ Kunozoitika kuti kunyazwi ndiani unozodaidza ngezina raMambo unozoponeswa.’ ²² “Imwimwi vamuna vaIsuraeri, izwai mazwi aya. Jesu weNazaretha, munhu wakaoniswa kwomuri ndiMwari ngemishando ine simba nemishamiso nezvioniso, zvaakaita Mwari kubudikidza ndiye pakati penyu, kudai ngezvomunozia mwemene; ²³ uyu Jesu wakapirwa kudai ngokuemeswa kwebangano nokuzia zviri mberi kwaMwari, imwimwi ngenyara dzevanhu vakashata mwakamukohomera nokumuuraya. ²⁴ Asi Mwari wakamumusa, amusunhura pakurwadziwa kworufu, ngokuti azvisaizoitika kuti asungwe ndirwo. ²⁵ Ngokuti Dhavhidha wakaereketa ndiye kuti, ‘Ndakaona Mambo nguva dzeshe andori pamberi pangu; ngokuti iye uri ngokumudyo kwangu kuti ndisazokutukuswa; ²⁶ ndizvo mwoyo wangu wakadakara, norurumi rwangu rwakadakadzwa; kunyazwi nenyama yangu inozogara mukugonda. ²⁷ Ngokuti iwewe auzorekeri mweya wangu muHaidhesi, zve, auzotenderi Wakachena wako kuti aore. ²⁸ Iwewe wakandiziisa njira dzokupona, unozondizadzisa ngokudakara ngokuapo kwako.’ ²⁹ “Hama, ndingaereketa ngokurerukirwa ngendaa yababamukuru Dhavhidha, kuti iye wakafa, akaikwa, neiba rake riri pakati pedu metsa nyamashi. ³⁰ Ndizvo ari muprofeti, echizia kuti Mwari wakapika kwaari ngemhiko kuti unozoemesa umwe wemibarirwana wechiunu chake ngokwenyama kuti agare pachigaro chake choumambo, ³¹ echiona zvaiya pamberi, wakaereketa ngokumuka kwaKristu kubva kwevakafa, kuti aazi kurekerwa ari muHaidhesi, nokuti nyama yake aizi kuora. ³² Mwari wakamusa uyu Jesu kubva kwevakafa, nesu teshe tiri zvapupu zvakwo. ³³ Ndizvo amirudzwa kumudyo waMwari, aashira chigondiso choMweya Wakachena kubva kunaBaba, wakadurura izvi zvomunoona nezvomunozwa. ³⁴ Ngokuti Dhavhidha aazi kukwira mudenga; asi unoti: ‘Mambo Mwari wakati kunaMambo wangu, gara ngokumudyo kwangu, ³⁵ metsa ndaita magaa ako chitambarariro chetsoka dzako. ³⁶ “Ndizvo vemhatso yeshe yaIsuraeri ngavazie yaamho kuti Mwari wakamuita Mambo naKristu, Jesu uyu wemwakakohomera.” ³⁷ Naapo vazwa izvi, vakabaiwa mumwoyo, navo vakati kunaPetro nokunevapostori vamweni: “Hama, tinozoitenyi?” ³⁸ NaPetro wakati kwavari: “Tenderukai, mubhabhatidzwe mweshe umwe ngaumwe wenyu ngezina raJesu Kristu, kuti murekererwe zvishaishi zvenyu, nemwi munozoashira chipo choMweya Wakachena. ³⁹ Ngokuti chigondiso chakagondiswa kwomuri nokuvana venyu nokwavari veshe vari kuretu, veshe avo vaanozodaidza Mambo Mwari wedu.” ⁴⁰ Wakapupura ngemazwi amweni akawanda nokuvapanga echiti: “Dziponesei pachenyu kubva kunouyu mubarirwana wakashongoroka.” ⁴¹ Ndizvo avo vakaashira mazwi ake ngokudakara vakabhabhatidzwa, ngezuva rimwero kwakatutsirwa kwavari vanhu vanoda kukwana makumi matatu emazana . ⁴² Navo vakaangira kungwarira zvidzidziso zvevapostori nokuiyana, mukugura chingwa nomukukumbira. ⁴³ Munhu weshe wakagumirwa ngokutya; nemishamiso yakawanda nezvioniso zvakaitwa kubudikidza ngevapostori. ⁴⁴ Navo veshe vakatenda vaigara pamwepo, nezviro zvavo vakakowerana pakati pavo pamwepo; ⁴⁵ navo vaitengesa upfumi hwavo nenhumbi dzavo, vaizvikoanisira kwavari veshe kudai ngokutama kwomunhu. ⁴⁶ Zuva ngezuva vakagara pamwepo ngechisungo chimwe muTemperi, vechigura chingwa mumizi yavo, vakadya ngokudakara nomwoyo wokuzwanana, ⁴⁷ vechikudza Mwari, vechidikanwa ngevanhu veshe. NaMambo waitutsira kwavari zuva ngezuva avo vaiponeswa.