¹ Zvino muIkoniumu vakapotera pamwepo mumhatso yokudira yevaJudha, vakaereketa ngokudaro vazhinji vakatenda vaJudha navaGiriki. ² Asi vaJudha vasikatendi vakavherudza mweya yevemadzinza kuti varwisane naavo vakoma. ³ Asi vanhu vazhinji vedhorobha vakaparadzana; rumwe rupande rwakaema navaJudha norupande rumweni rwakaema nevapostori. ⁴ Ndizvo vakagarapo mukuwo wakareba, vechiereketa ngokushinga ndiMambo, uwo wakaita chapupu kuizwi renyasha dzake, echitendera kuti zvioniso nemishamiso zviitwe ngenyara dzavo. ⁵ Naapo vakavamukira veshe vemadzinza nevevaJudha nevatongi vavo, kuti vavaitire zvakashata nokuvaponda ngemapuwe,, ⁶ vakazvizia, vakatiza kuenda kumadhorobha eRikaonia, anozwi Ristra neDhebhe nokunharaunda dzawo. ⁷ Naapo vaichumaira vhangeri. ⁸ Zvino muRistra mwaigara munhu waiya chigwadara tsoka dzake, wakabarwa ari chirema kubvira mundani yamai ake, aazi kumbohamba. ⁹ Wakapurutana Phauri echiereketa; iye amuringisisa, aona kuti waiya nokutenda kwaimuita kuti aponeswe, ¹⁰ wakati ngeizwi guru: “Ema ngetsoka dzako.” Naye wakanyanduka, akahamba. ¹¹ Naapo mbungano yaona izvo zvakaitwa ndiPhauri, yakadaidzira yechiti ngorurumi rwechiRikaonia: “Zvimwari zvadzaka kwetiri zvinomuemo wevanhu!” ¹² Navo vakadudza Bhanabhasi kuti, Zeusi, naPhauri kuti, Hermesi, ngokuti iye waiya muereketi mukuru. ¹³ Nomupristi waZeusi, uwo temperi rake raiya pamberi pedhorobha, wakaunza n'ombe nemaruva kumisiwo, waida kupira mudiro kwavari, pamwepo nembungano. ¹⁴ Asi apo vapostori Bhanabhasi naPhauri vazvizwa, vakabaura zvokusimira zvavo, vakarumba kuenda pakati pembungano, vechidaidzira, ¹⁵ vechiti: “Vanhu, munoita izvi ngenyi? Isusuwo tiri vanhu vakadai ndimwi, tinounza kwomuri mashoko akanaka okuti mutenderuke kubva kuneizvi zvisina shwiro, muuye kunaMwari unopona, uwo wakasika denga nenyika noruandhle neizvo zveshe zviri mukati mwazvo. ¹⁶ Panguva yakapinda wakaatendera madzinza eshe kuti ahambe ngenjira dzawo; ¹⁷ asi aazi kusiya asina uchapupu pachake, echiita zvakanaka, echimupa mvura inonaya kubva mudenga, nokukukura zviyo zvakawanda, echizadza mwoyo yenyu ngezvokudya nokudakara.” ¹⁸ Ngemazwi aya zvakavakonzera kurambidza mbungano kuti isazopira mudiro kwavari. ²⁰ Asi vaJudha vakagumapo vechibva Antiokhi naIkoniumu, navo vakavherudza mbungano, vakaponda Phauri ngemapuwe, vakamukweya kumubudisa kubanze kwedhorobha, vechipinimidza kuti wafa. ¹⁹ Asi apo vadzidzi vaungana kumutendenedza, wakamiruka, akapotera mudhorobha; nechimangwani wakaenda naBhanabhasi Dhebhe. ²¹ Naapo vachumaira vhangeri mudhorobha iro, vakaita vadzidzi vazhinji, vakapetuka Ristra neIkonaiumu neAntiokhi, ²² vechigwinyisa mweya yevadzidzi, vechivapota kuti vaangirire kugara mukutenda, vechiti kunosisira kuti tipotere muumambo hwaMwari kubudikidza ngokupotya madambudziko akawanda. ²³ Naapo vaiya vagadza vakuru muchiara chimwe ngachimwe, vakakumbira nokuera kudya, vakavapira kunaMambo uwo wevakatenda kwaari. ²⁴ Zvino vakahamba vechipinda ngemuPhisidhia, vakaguma Pamufiria. ²⁵ Naapo vaiya vaereketa izwi muPherga, vakadzaka kuenda Ataria. ²⁶ Vechibvapo vakahamba ngengarava kuenda Antiokhi, apo pevakapirwa munyasha dzaMwari, kuita mushando uwo wevaiya vapedza. ²⁷ Naapo vaguma, vakaunganidza chiara pamwepo, vakavashumira zveshe zvaakaita Mwari ndivo, nenjira yaakabeurira ndiyo vemadzinza musiwo wokugonda. ²⁸ Navo vakagarapo nevadzidzi mukuwo wakareba.