¹ Zvino muAntiokhi muchiara chaiya chiripo mwaiya nevaprofeti nevadzidzisi: Bhanabhasi, Simeoni uwo waizwi ndiNiga, Rusiasi weKurene, Manaene uwo wakakura pamwepo naHerodhi sadunhu, naSauri. ² Vachadira Mambo, vechiera kudya, Mweya Wakachena wakati: “Paradzanisai kwendiri Bhanabhasi naSauri kuti vaite mushando wendakavadaidzira.” ³ Apo vaera kudya nokukumbira, vakaisa nyara dzavo padera pavo, vakavaendesa. ⁴ Ndizvo vatumwa ndiMweya Wakachena, vakadzaka kuenda Sereusia, nokubvapo vakahamba ngengarava kuenda Saipurasi. ⁵ Naapo vaguma Saramisi, vakateketesa izwi raMwari mumhatso dzokudira dzevaJudha. Navo vaiyazve naJohani mudetseri wavo. ⁶ Naapo vaiya vahamba pachiwi peshe metsa kuguma Phafosi, vakashongana noumwe waiya n'anga muprofeti wokunyepa, muJudha, zina rake raizwi ndiBha-Jesu. ⁷ Uwo waigara pamwepo nomutongi mukuru waizwi ndiSergiusi Phaurusi, waiya munhu uneungwaru. Iye adaidza kwaari Bhanabhasi naSauri, waidisisa kuti azwe izwi raMwari. ⁸ Asi Erimasi, (ngokuti ndikwo kukumuchwa kwezina rake) wakarwisana navo, echida kupaukisa mutongi mukuru kubva mukugonda. ⁹ Asi Sauri, uwozve unozwi Phauri, azadzwa ndiMweya Wakachena, wakamuringisisa,, ¹⁰ Akati: “Iwewe mwana waDhiabhorosi, iwewe gaa rokururama kweshe, wakazara ngokuchengedzera nourimbwi hweshe, aurekeri here kushongorosa njira dzakarurama dzaMambo? ¹¹ Zvino, ringira, nyara yaMambo iri padera pako, newe unozoita bofu, usikakoni kuona zuva kwomukuwo.” Paripo mhute nechidima zvakawira padera pake; wakahambahamba kutsvaka vanhu vokumutungamirira ngenyara. ¹² Apo mutongi mukuru aona izvo zvakaitika, wakatenda, echishamiswa ngezvidzidziso zvaMambo. ¹³ Zvino Phauri nevangani vake vakahamba ngengarava kubva Phafosi, vakaguma Pherga muPhamufiria. Johani wakabva kwavari, akapetuka Jerusarema. ¹⁴ Asi vechihamba kubva Pherga, vakaguma Antiokhi muPhisidhia. Ngezuva reSabatha, vapotera mumhatso yokudira, vakagara pashi. ¹⁵ Ngesure kwokudzidzwa kweMipango nevaprofeti, vakuru vemhatso yokudira vakatumira izwi kwavari vechiti: “Vamuna, hama, kudai muneizwi mukati mwenyu rokupanga vanhu, riereketenyi.” ¹⁶ Ndizvo Phauri wakamiruka, akakopera ngenyara, akati: “Imwimwi vanhu vaIsuraeri, nemwi munotya Mwari, purutanai. ¹⁷ Mwari wevanhu ava vaIsuraeri wakatsanangura madzibaba edu, wakakudza vanhu ava apo vaiya vanhu vapara munyika yeEgipite, ngomuoko unesimba wakavabudisa mukati mwayo. ¹⁸ Mumakore anoda kukwana kuita makumi marongomuna wakavasengerera mushango. ¹⁹ Nangesure kwemakore anoda kuguma mazana marongomuna nemakumi mashanu, wakavapa vatongi metsa kuguma kunaSamueri muprofeti. ²⁰ Naapo aparadza madzinza manomwe aigara munyika yeKhenani, wakavakoanisira nyika yavo kuita nhaka. ²¹ Ngesure kweizvi vakakumbira kuti vapuwe mambo, naMwari wakavapa Sauri mwana waKishi, munhu wedzinza raBenjamini, uwo wakatonga makore makumi marongomuna. ²² Naapo amubvisa, wakavamirudzira Dhavhidha kuti aite mambo wavo. Muuchapupu hwaakaita ndiye, wakati: ‘Ndaona munaDhavhidha mukororo waJesi kuti munhu unoda zvinodiwa ngomwoyo wangu, uwo unozoita kuda kwangu kweshe. ²³ Ngorudzi rwomunhu uyu Mwari, kudai ngechigondiso chake, wakaunza kunevaIsuraeri Muponesi, Jesu. ²⁴ Asati auya Jesu, Johani waiya achumaira ngorubhabhatidzo rwokutenderuka kuvanhu veshe vaIsuraeri. ²⁵ Naapo Johani echipedzisa mushando wake, wakati: ‘Munopinimidza kuti inini ndiri anani? Andiriyepi. Haiwa, asi umwe unouya sure kwangu, uwo wendisikasisiri inini kusunhura tambo dzemagwada etsoka dzake.’ ²⁷ “Vamuna, hama, vakororo vorudzi rwaAbrahama, naavo vari pakati penyu vanomutya Mwari, izwi iri roruponeso rakatumirwa kwetiri. ²⁶ Ngokuti avo vanogara muJerusarema nevatongi vavo avazi kumuzia nokuti kuzwisisa mazwi evaprofeti, awo anodzidzwa Sabatha rimwe ngarimwe, vakaazadzisa ngokumuitira nda. ²⁸ Kunyazwi avazi kuona ndaa kwaari yaiita kuti afe, asi vakakumbira Piratu kuti Jesu aurawe. ²⁹ Naapo vazadzisa zveshe zvakanyorwa ngendaa yake, vakamudzasa kubva pamuchinjiko, vakamuradzika muiba. ³⁰ Asi Mwari wakamumusa kubva kwevakafa. ³¹ wakaoneka mazuva mazhinji kwavari avo vakakwira naye kubva Garire kuenda Jerusarema, avo zvino vari zvapupu zvake kuvanhu. ³² Nesu tinochumaira kwomuri mashoko akanaka echigondiso icho chakaitwa kumadzibaba. ³³ kuti Mwari wakachizadzisa ichi kwetiri vana vavo, ngokumumusa Jesu; kudai ngezvakanyorwawo munduyo yechipiri yechiti: “ ‘Iwewe uri Mukororo wangu, nyamashi ndaita Baba ako.’ ³⁴ Ngendaa yokuti wakamumusa kubva kwevakafa, zvino aachahwiriri mukuora, wakaereketa kudai: ‘Ndinozokupa zvifumiso zvakachena nezvinogondeka zvaDhavhidha.’ ³⁵ Nomunduyo imweni unoti, ‘Auzotenderi Wakachena wako kuti aore.’ ³⁶ Ngokuti Dhavhidha, apedza kuita kuda kwaMwari pakati pedzinza rake, wakafa, naye wakaikwa pane madzibaba ake, akaora. ³⁷ Asi uwo waakamusa Mwari aazi kuora., ³⁸ Ndizvo ngakuziikanwe kwomuri vamuna, hama, kuti kubudikidza ndiye uyu kunochumairwa kwomuri kurekererwa kwezvishaishi. ³⁹ Kubudikidza ndiye veshe vanotenda vanopembedzwa kubva kuzviro zveshe zvemwaiya musikapembedzwi ngeMipango yaMosi. ⁴⁰ Ndizvo ngwarai kuti zvisazomugumira izvo zvakaereketwa ngevaprofeti: ⁴¹ Ringirai, imwimwi vashoori, mushamiswe, mupere; ngokuti ndinoshanda mushando mumazuva enyu, mushando womusikazotendi, kunyazwi munhu amuronzera ndiwo.” ⁴² Navo vechibuda, vanhu vakavapota kuti aya mazwi aereketwe kwavari ngeSabatha raiteera. ⁴³ Naapo mushongano wokudira waparara, vazhinji vevaJudha neavo vemadzinza vakatenderukira muchiJudha vakateera Phauri naBhanabhasi; ivo vechiereketa kwavari, vakavagwinyisa kuti vaangire kugara munyasha dzaMwari. ⁴⁵ NgeSabatha raiteera uzhinji hwevanhu veshe vedhorobha vakaungana kuzwa izwi raMwari. ⁴⁴ Asi apo vaJudha vechiona mbungano, vakazara ngendurumwa, vakaphikisa zvakaereketwa ndiPhauri, vechimutuka. ⁴⁶ Naapo Phauri naBhanabhasi vakaereketa ngokushinga vechiti: “Kwaisisira kuti izwi raMwari ritange kuereketwa kwomuri. Kwechioneka kuti munoriramba mwechiti ribve kwomuri, mwechidzierenga kuti amusisirwi nokupona kusikaperi, ringirai, tinokunukukira kuenda kune vemadzinza. ⁴⁷ Ngokuti Mambo wakatipanga kudaro echiti: ‘Ndakakuemesa kuti uite kujeka kunevemadzinza, kuti uite ruponeso metsa kumagumo enyika.’ ⁴⁸ Naapo vemadzinza vazwa izvi, vakadakara, vakakurisa izwi raMambo; naavo veshe vakaemeserwa kupona kusikaperi vakatenda. ⁴⁹ Neizwi raMambo rakaparadzirwa munyikamwo mweshe. ⁵⁰ Asi vaJudha vakavherudza vakadzi vaidira vairemeredzeka nevakuru vedhorobha, vakamusira madambudziko Phauri naBhanabhasi, vakavadzinga kubva munharaunda yavo. ⁵¹ Asi ivo vakaguwa bukuta patsoka dzavo kuvaitira ndaa, vakaguma Ikoniumu. ⁵² Nevadzidzi vakazara ngokudakara noMweya Wakachena.