¹ Ngokudaro, imwimwi vakadzi, munofanira kuzwipira kuvamuna venyu, kuti kunyazwi varipo vamweni vavo vasikapurutani izwi, vangakokwawo pasina izwi ngenjira yevanopona ndiyo vakadzi vavo, ² apo pevanoona kucheneswa nokureremedza mukupona kwenyu. ³ Musadzinemesa pachenyu ngokunemeswa kwokubanze, kwokuruka bvudzi nokusimira zvinemeso zvomukore nokuti zvekusimira zvakanakisisa; ⁴ asi ngakuite kwomunhu wakafishika womumwoyo, ngezvinemeso zvisikaori zvomweya wakapfaa wakanyarara, uwo unemutengo mukuru mukuona kwaMwari. ⁵ Ngokuti ngokudarowo kare vakadzi vakacheneswa, avo vakagonda kunaMwari, vakadzinemesa ngokupfaira vamuna vavo. ⁶ Kudai ndiSara wakayaeya Abrahama, echimudaidza kuti mambo. Mwaita vana vake, apo mwechiita zvakanaka, musikatendi kuti kutyisa kumukarudza. ⁷ Ngokudaro imwimwi vamuna, garai nevakadzi venyu kudai ngezvinosisira mwechireremedza vakadzi kudai ngechidziyo chakarembedzeka, kudaizve ngavanogara nhaka imweyo yenyasha dzokupona, kuti mikumbiro yenyu isazopingaidzwa. ⁸ 8 Pakupedzisira, imwimwi mweshe itai vano mwoyo umwewo, vanozwirana urombo, dananai kudai ngehama umwe kunoumweni, mune mwoyo inenyasha nepfungwa yakapfaa. ⁹ Musaunzidzira zvakashata ngezvakashata nokuti kutuka ngokutuka; asi ngenjira imweni unzidzirai ngechipfumiso, ngokuti mwakadaidzwa kuneizvo kuti mugare nhaka yokupfumiswa. ¹⁰ Ngokuti, “Uwo unozoda kupona nokuda kuona mazuva akanaka, ngaarambidze rurumi rwake kubva kunezvakashata, nomuromo wake kubva mukuereketa zvinochengedzera. ¹¹ Ngaafuratire kubva kunezvakashata, aite zvakanaka; ngaatsvake kunyarara akuteere. ¹² Ngokuti madziso aMambo Mwari anoringira padera pevakazkwa, nenzee dzake dzinozkwa kumukumbiro yavo. Asi hope yaMambo Mwari inorwa navo vanoita zvakashata. ¹³ Zvino ndiani ungazomuremadza kudai mwechitsamwirira kuita izvo zvakanaka? ¹⁴ Asi kunyazwi mwechitambudzika ngokuita zvakanaka, munofumiswa. Musatya zvevanotya, zve, musatyisidzirwa. ¹⁵ asi mumwoyo yenyu remeredzai Kristu aite Mambo. Mugare mwakanasirira kupingura munhu weshe unomubvunza ngendaa yegonda riri mukati mwenyu. ¹⁶ Asi muite ngokupfaa nokureremedza, munemwoyo isina ndaa, kuti pane izvo zvevanomureya ndizvo, vanganyadzwa avo vanotuka njira yenyu yakanaka yokupona munaKristu. ¹⁷ Ngokuti kwakapinda kunaka kutambudzika ngokuita zvakanaka, kudai kutambudzika kuri kuda kwaMwari, pane kutambudzika ngokuita zvakashata. ¹⁸ Ngokuti Kristu wakatambudzikawo kamwe mhera nariini ngendaa yezvishaishi, ari wakanaka ngendaa yevasikazi kunaka kuti amuunze kunaMwari. Wakaurawa munyama, asi wakaitwa unopona mumweya. ¹⁹ Mwouri wakaenda, akachumairawo kumweya yainga mutirongo, ²⁰ iyo karetu yaiya isikapurutani, apo Mwari ngokushingirira paakavagarira ngemazuva aNoa, panguva yekuakwa kwengarava, mukati mwayo vashomani, kuronza, vanhu vakaponeswa kubudikidza ngemvura. ²¹ Ndiwo muedzaniso werubhabhatidzo rinomuponesa, andirwopi runobvisa tsvina kubva panyama, asi chigondiso chakaitwa chomwoyo isina ndaa kunaMwari, kubudikidza ngokumuka kwaJesu Kristu kubva kwevakafa. ²² Uwo wakaenda mudenga, uri ngokumudyo kwaMwari, nengirosi, vatongi nevane simba vanomuzkwira.