¹ Ndizvo mwechirasha kweshe kushata, kuchengedzera kweshe, kudziitisa, ndurumwa nokureketa kweshe kwakashata. ² Kudai ngevana vatsva vachaamba kuberekwa, disisai mukaka woMweya usina kuchengedzera, kuti mukure ndiwo, muponeswe, ³ ngokuti mwakaraira kuti Mambo unenyasha. ⁴ Uyai kwaari, ndiye buwe rinopona, ngegwinyiso rakarambwa ngevanhu, asi rakaketwa ndiMwari rinemutengo mukuru pamberi pake. ⁵ Imwimwiwo mwakadai ngemapuwe anopona, mwakaakiwa kuita mhatso yoMweya, kuita upristi wakachena, kupira midiro yoMweya, inoashirika kunaMwari kubudikidza ndiye Jesu Kristu. ⁶ Zvakanyorwa zvieizwi: “Ningirai, ndinoradzika muZioni buwe, buwe repakhona rakaketwa, rine mutengo mukuru. Nouwo unotenda kwaari aazonyadzwi. ⁷ Kwomuri zvino imwimwi munotenda, unoreremedzeka; asi kwavari vasikatendi, “Buwe rakarambwa ngevaaki ndiro rakaita soro repakhona,” ⁸ zve, “Ibuwe rinoita kuti vakugunhwe, nebuwe rinoita kuti vawe.” Vanopumhunwa ngokuti avapurutani izwi, kudai ngezvevakaemeserwa kuita ⁹ Asi imwimwi muri dzinza rakaketwa, muri voupristi woumambo, dzinza rakachena, vanhu vaMwari vaakadzionera, kuti muchumaire ngemushando inesimba yaakaita uwo wakamudaidza kubva muchidima, kuti mupotere mukujeka kwake kunoshamisa. ¹⁰ Imwimwi ngomukuwo wakapinda mwaiya musiri vanhu, asi zvino muri vanhu vaMwari; avo vaiya vasikazi kuashira nyasha, asi zvino mwaashira nyasha. ¹¹ Vanodikanwa, ndinomuyeudza kudai ngezvomuri zvigarandimo nevahambi kuti murekere kuita kuemura kwenyama kunorwa hondo nomweya. ¹² Mudzibate ngokureremedzeka kunofanira pakati pevemadzinza, kuti kuneizvo zvevanomureya ndizvo, kudai ngevaiti vakashata, vangaona ngemushando yenyu yakanaka, vakudze Mwari apo paanouya kootonga. ¹³ Teereai mupango yeshe yevanhu ngendaa yaMambo, kunyazwi ngeyamambo, ari mukuru, ¹⁴ nokuti kuvatongi, vakatumwa ndiye kuunzidzira vanoita zvakashata nokuvakudza avo vanoita zvakanaka. ¹⁵ Ngokuti ndikwo kuda kwaMwari kuti ngokuita zvakanaka munganyaradza kusikazia kwavanhu vano upenzi. ¹⁶ Kudai ngevanhu vaMwari, ponai kudai ngevanhu vakasunhurika, asi musikashandisi kusununguka kwenyu kuita bhachi rokuita zvakashata. ¹⁷ Reremedzai munhu weshe. Idai hama dzeshe. Ityai Mwari. Reremedzai mambo. ¹⁸ Varanda, zwisisai vakuru venyu ngokureremedza kweshe, haiwa kwavari avo vega vakanaka nevakapfaa, asi nekwavarizve vasikazi kunaka. ¹⁹ Ngokuti ichi chinoashirika, kuti munhu ashingirire madambudziko, kuti aanemwoyo wakanaka usina ndaa kunaMwari, echitambudzika pasina nendaa. ²⁰ Ngokuti mungakudzwa ngenjiranyi, mwechishingirira apo kudai mwechishaisha nokuchaiwa ngendaa yakwo? Asi apo mwechinasa, kudai mwechitambudzwa ngendaa yakwo, mwechishingirira, izvi zvinoashirika kunaMwari. ²¹ Ngokuti mwakadaidzwa kuneizvo, ngokuti Kristu wakatambudzikirawo imwimwi, akamusiira chionero kuti muteere muzvitsiko zvake. ²² Uwo usikazi kushaisha, akuna kuchengedzera kwakaoneka pamuromo wake. ²³ Apo paakatukwa, aazi kutukawo; apo atambudzika, aazi kutyisidzira; asi wakadzipira kwaari uwo unotonga ngekufanira. ²⁴ Uwo wakatwara emene zvishaishi zvedu mumuiri wake pamuchinjiko, kuti isusu tife mukushaisha, tipone mukururama; kubudikidza ngemaronda ake mwakaponeswa. ²⁵ Ngokuti mwainga mwechipepesheka kudai ngemakwai, asi zvino mwapetuka kuMuushi noMungwariri womweya yenyu.