Ndima 1
1
Petro, mupostori waJesu Kristu, ndinonyorera kwavari vakaketwa vari zvigarandimo, vakapararira muPontusi, Garatia, Khapadhosia, Asia neBhithinia,
2
kudai ngokuzia kwaMwari Baba, mukucheneswa kweMweya, kuti vayaee kunaJesu Kristu,nokufafazirwa ngengazi yake. Nyasha nokunyarara ngazviwanzwe kwomuri.
3
Ngaakudzwe Mwari, Baba aMambo wedu Jesu Kristu! Uwo ngenyasha dzake huru wakatibarazve kuti tianegonda rinopona kubudikidza ngokumuka kwaJesu Kristu kubva kwevakafa,
4
kuti tianenhaka isikaori, isikasvipiswi, isikanyangariki, yakangwaririrwa imwimwi mudenga.
5
Imwimwi munongwarirwa ngesimba raMwari kubudikidza ngokugonda kuti muano ruponeso rwakanasirirwa kuti ruzooniswa ngenguva yekupedzisira.
6
Muizvi munodakara, kunyazwi kudai zvechifanira, mwakatambudzwa ngezviedzo zvembeu zhinji.
7
Kuti kuedzwa kwekugonda kwenyu, kunemutengo mukuru kupinda mukore unopera kunyazwi wechipera unoedzwa ngomuriro, kungaoneka kwechiita kukudza nouthende nokureremedza ngenguva yokuoneka kwaJesu Kristu.
8
Kunyazwi amuzi kumuona munomuda. Kwaari kunyazwi zvino amumuoni, asi munomutenda nokudakara ngokudakara kusikabviri kuti kureketwe kwakazara ngouthende.
9
Ngekuti munoashira chomunovavarira mukugonda kwenyu, chiri ruponeso rwomweya yenyu.
10
Ngendaa yourwu ruponeso vaprofeti avo, vakaprofeta ngenyasha idzo dzemwaizoitirwa, vakanasa kutsvakisisa,
11
Vechitsvaka ngendaa yemunhu nokuti nguva iyo yakaronzwa, ngeMweya waKristu waigara mukati mwavo, apo pewakapupura ngekuretu ngemadambudziko aKristu noutswene waizoteera.
12
Kwavari zvakaoniswa kuti avasaidzishandira, asi imwimwi muzviro izvo, zvakaronzwa kwomuri kubudikidza ngaavo vakachumaira vhangeri kwomuri ndiMweya Wakachena wakatumwa kubva mudenga, izvo zviro ngirosi dzinoda kuzvizwisisa!
13
Saka sungai zvihunu zvemupfungwa yenyu, itai vakangwara; muemese reshe gonda renyu kunyasha dzinounzwa kwomuri pakuoneka kwaKristu Jesu.
14
Kudai ngevana vanozwa, musadzitodzanise nokuemura kwenyu kwokutanga kwenguva yokusikazia kwenyu.
15
Asi kudai ngouwo wakamudaidza wakachena, ngokudaro imwimwiwo itai vakacheneswa mukupona kwenyu kweshe.
16
Ngokuti kwakanyorwa kuti: “Munozoita
vakacheneswa, ngokuti inini ndakachena.”
17
Kudai mwechimudaidza kuti Baba, uwo unotonga vanhu veshe asina mukheto kudai ngemushando womunhu umwe ngaumwe, ponai munguva weuchigarandimo wenyu mukutya.
18
Imwimwi munozia kuti amuzi kuripirwa ngezviro zvinoora, kudai ngesirivha nomukore, kubva kunjira isina shkwiro yokupona kwenyu yomwakasiirwa ngemadzibaba enyu,
19
asi mwakaripirwa ngengazi yaKristu ino mutengo mukuru, kudai ngeyegwai risina gotsa nokuti cheringapomerwa.
20
Kristu wakaziikanwa nyika isati yaemeswa, asi wakaoniswa ngendaa yenyu mukupedzisira kwenguva.
21
Kubudikidza ndiye imwimwi munogonda kunaMwari, uwo wakamumusa kubva kwavakaf0akamupa uthende, kuti kugonda kwenyu nokutenda kwenyu zviemeswe pana Mwari.
22
Imwimwi mwakachenesa mweya yenyu mukuzwisisa gwinyiso kuti muite rudo risikadziitisi, mudanane umwe noumweni ngemwoyo wakasukika kurutu.
23
Imwimwi mwakabarwazve patsva, haiwa ngembeu inoora, asi ngeisikaori, kubudikidza ngeizwi raMwari rinopona mhera nariini.
24
Ngekuti “Nyama yeshe yakadai ngomwenje, noutswene wayo weshe wakadai ngeruva romwenje. Mwenje unozeketera neruva rinowa pashi.
25
Asi izwi raMwari rinondogara mhera nariini.” Izwi iro ndiro vhangeri rakachumairwa kwomuri.