¹ Naomi , aye ngumwenyenyi, ayepo mwaambela echi, ''Mwanange , echi nakufotela shivaka sho kutulumwisha, echi okale nawa? ² Nehonine Boazi, oya mukwelume noka kwamanga no anuke owa mbuyama enji, kali mwapetu oya? Ngomone, ou ushiku ou kuma athza muku yelelekethza mavu kuya kuli pulelo. ³ Ne, olihupe, oliweshe, ovate ito yoe yoiwa, ne pohuma oulumukele kuya kuli pulelo. Ambene lelo walimonahalisha kwoya mukwelume kutwala apa aka manishela kulya no kunwa. ⁴ Ambene owu aka lala, olimukele shivaka eshi aka lala echi munyima nowe wangu othze kukwenji, ne pohuma wangu okamuthsikule kumaulu, ne oka lale pashi. pohuma kuma akutongwela eyi oloela kukwama.'' ⁵ Ruti ayepo tawa Naomi echi, ''kuma nikwama yoihe eyi ona niambela.'' ⁶ Nehonine ayepo ulumukela kuli pulelo , ne ayepo kwama eli amulongile ngumwenyenji. ⁷ Ou Boazi atunulile kulya no kunwa ne muchima wenji una loelela, ayepo thza kuka lala kuhula thzo mutumbo wo mavu okukana ku pula. Ruti ayepo keya mukulinyoma , ayepo muthsikula ku maulu, ne ayepo lala . ⁸ Ayepo kukala kenge pakachi ko ushiku oyu mukwelume ayepo pinduka. ayepo aluka, ne ayepo mona mbuyama oyu nalala ku maulu enji! ⁹ Ayepo amba echi, ''Yowe elye?'' Ayepo tawa echi, ''Yame no Ruti, mupika woe wo mbuyama. oyandumune lipai lyoe othsike mupika woe wo mbuyama, mukonda omwapange.'' ¹⁰ Boazi ayepo amba echi, ''Mwanange, Shinda sha moyo aku fiyaule. Eyi honi okwamisha apa ina loo manene kupita matatekelo , mukonda ko yembulukile no anuke owa kwelume , kemonga ehutu kapa aka kufuma. ¹¹ Honine, mwanange, lelo wa yapa! Kuma nikukwamena yoihe eyi onaamba, mukonda anu wahe o mubongi thzetu ahalimuka echi o mbuyama omikwa thzothziwa. ¹² Yashemwa no mwapoe, ambene kwaali mukwelume oyuli mwapoe nene kupita yame. ¹³ Okale kuno uno ushiku, ne mashiku , mona wahime kukwama eyi ina muloela yo mukuta kukwoe , kuli nawa, akwame. Monapo wa kane kukwama eyi ina muloela yo mukuta kukwoe , ko Shinda sha moyo oyu yoya , yame niikwama. Olale kutwala mashiku.'' ¹⁴ Nehonine ayepo lala kengeyo ku maulu enji kutwala mashiku. Ambene ayepo pinduka kukushime kumonahala. Mukonda Boazi kuma aambile echi, ''lelo kwakala oyu limuka echi kwali mbuyama oyu nakeya kulipulelo.'' ¹⁵ Ne Boazi ayepo amba echi, ''Olete lipai lyoe eli ona lithsiki ne oli yandumune olikwatelele.'' Owu akwamine kengeyo, ayepo muyalishela ivela mutanu nasho fochi yosho kulu yo mavu kuimwaelamo ne eyepo imushimbisha. Honine ayepo thza mu mbongi. ¹⁶ Ruti owu akeyile kwa ngumwenyenji , ayepo mwippula echi, ''Ngepi onakakwama , mwanange?'' Ne Ruti ayepo mutongwela yoihe eyi ana mukwamena oyo mukwelume. ¹⁷ Ayepo mwaambela echi, ''Eyi ivela mutanu nasho fochi yoliyo ana nitambeka, mukonda kuma anaamba echi, 'Lelo wahuka kwa ngumwenyoe kupila noshi.''' ¹⁸ Ne Naomi ayepo amba echi, ''Okale , mwanange, olimukele eyi yaamba omu ika hulela, mukonda oya mukwelume katulumwisha lelo hime ou atunula eyi yaamba.