¹ Nehoni Naomi ayepo wana mwapa munuwenji, mukwelume oku fuma nene wo shikota sha Elimeleki, ne lithzina lyenji kuma lyakalile Boazi. ² Ruti, mbuyama wo mu Moabi, ayepo ambela Naomi, ''Onitawishe echi nithze nika pupulule ipupu eyi ina shiyala munyima thzaka kuyanga uloto muyilwa. Kuma nishupwela munyima thzo munu yomuhe oyu nimonisha shihemo.'' Ne Naomi ayepo mutawa echi, ''Othze, mwanange.'' ³ Ruti ayepo thza ne ayepo kapupulula epupu eyi ya shialangile muyilwa munyima thzo kuyangamo.Ayepo kukala kenge kuthza no kupupulula ayepo kaliwana mushilwa shimweya kuilwa ya Boazi, wo mu shikota sha Elimeleki. ⁴ Ngamumone, Boazi ayepo keya kutunda ku Betelehema ne ayepo ambela aka kuyanga echi, ''Shinda sha moyo akale nenu.'' Nawo awopo amutawa echi, ''Shinda sha moyo aku fiyaule.'' ⁵ Ne Boazi ayepo amba kwa mupika oyu wa kwamishile aka kuyanga , '' Munu walye oyu mwanuke wo mbuyama?'' ⁶ Mupika muka kukwamisha aka kuyanga ayepo mutawa echi , ''Mwanuke wo mbuyama omu Moabi oyu nakeya na Naomi kutunda ku litunga lya Moabi. ⁷ Kuma nani lombo echi, 'onitawishe kupupulula mukachi ko mitumbo thzo uloto munyima thzaka kuyanga.'Ne woliyo anakeya kuno ne mashiku ana tateka kuleta no pano pa shikati, kuma ana tulumwisha pohuma mbichana muya munjiyo.'' ⁸ Ne Boazi ayepo ambela Ruti echi, ''Ona niteelela, mwanange? Lelo wathza echi oka pupulule mushilwa shasho; lelo watunda mushilwa shange. Honine , okale kuno ne okwame pofochi noa aka kukwama ange awa anuke owa mbuyama. ⁹ Okengishe meho ooe pohuma pa shilwa eshi ayanga awa akwelume ne oshupwele angenjoe ambuyama munyima . Kali nina tumina akwelume echi aku kwata? popahe apa oyuvela linotwa , pohuma walithzela kutufuma two meyu ne pohuma waha kanwa meyu aanaka veta anuke owa kwelume.'' ¹⁰ Ne ayepo kotamisha lupala lwenji pashi posho thza Boazi ne ayepo kinyama pashi. ayepo mutawa echi, ''Yiñe nina wanena shihemo shokukuma apa ku meho oe echi oni ayale , ame no muka kwiiya ?'' ¹¹ Boazi ayepo mutawa echi, '' Ananitongwela , yoihe eyi onakwama kutunda apa nafela munuwoe. Ona shiyi atata woe, nowa mamawoe, ne no litunga eli wathsemukelile kushupwela ngumwenyoe ne nokukeya kwaanu awa okana kulimuka. ¹² Shinda sha moyo akupe shipiwa mukonda wo ikwama yoe. Otambule shipiwa sho kuyala kutundelela kwa Shinda sha moyo, Nyambi wa aka Isilaele, oyo ona chilela echi nokale mushi thzo mando enji.'' ¹³ Ne ayepo amba echi, '' niwane shihemo ku meho oe , ñathsile wange, mukonda onani henga henga , kalo ona aamba nange no ñeke , kemonga echi kali no yumweya woa apika oe.'' ¹⁴ Pa shikati sho kulya Boazi ayepo ambela Ruti echi, ''Okeye kuno , nolye kuishima, owelele shi mutu shoe omu muwaine no mu vinega.'' ayepo kala kunyonga thzaka kuyanga, ne ayepo mutambeka oheke oku pona. ayepo lya kutwala apa ekutelile ne ayepo shiyapo imweya. ¹⁵ Owu akatukile kuhukela muku pupulula, Boazi ayepo tumina anuke owa kwelume , echi, ''Mumushiye apupulule kemonga mukachi ko mitumbo thzo oheke ou una yangiwa , mwamu enisha. ¹⁶ Kalo mumuhomwene mitwi thzo oheke wo uloto pa mitumbo, ne muthzi mushiele echi apupulule, ne lelo mwamukanisha.'' ¹⁷ Nehonine ayepo pupulula omo mushilwa kutwala kulungulo. Ne ayepo pumula uheke owu a pupululile , ne uheke awopo ufota kuyalisha efa thzo uloto. ¹⁸ Ne ayepo thzi yelula ku thza mu mbongi. Ne ngumwenyenji ayepo kamona eyi anaka pupulula. Ruti kalo kuma ashimbile ku uheke wokupona owu ashiilepo kwowu alile ne ayepo nau tambeka ngumwenyenji. ¹⁹ Ngumwenyenji ayepo mwipula echi, '' Kupi onaka pupulwela lelo? kupi onaka kwamena ? oyu munu naka kuayala akale no fiyauthzi.'' Ne Ruti ayepo tongwela ngumwenyenji shinda sha shilwa oku anaka kwama. ayepo mwaambela echi , ''Lithzina lya shinda sha shilwa oku ninaka kwama lelo yoliyo Boazi.'' ²⁰ Naomi ayepo tawa ngumwenyenji echi, ''Shinda sha moyo amu fiyawethze, aye wokukana kushiya kumonisha shihemo shenji kwaka kuyoya naka kufa.'' Naomi ayepo muambela echi , ''Oya mukwelume mwapetu , yumweya kwapetu awa loela kutuyoisha.'' ²¹ Ruti mbuyama wo mu Moabi ayepo tawa echi, ''Yashemwa, ona niambela echi, 'Waloela kukwamena popepi no anuke ange owa kwelume kutwala apa akamanishela kuni yangela.''' ²² Naomi ayepo tawa Ruti ngumwenyenji, ''Kuna loo, mwanange, echi othzange noa pika enji owa anuke owa mbuyama, echi lelo akukwama omango mushilwa shimweya.'' ²³ Ne ayepo kwamenanga popepi no apika a Boazi owa anuke owa mbuyama echi a pupululange kutwala kuhula thzoku yanga uloto. Kuma akalile pofochi na ngumwenyenji.