¹ Ne Boazi ayepo thza munthzango honine ayepo kakalamo. mbichana, mwapa Ruti oyu atoile Boazi ayepo keya. Boazi ayepo mwaambela echi, ''Mbusha , okeye kuno ne okale apa.'' oyo mukwelume ayepo keya ne ayepo kala. ² Ne Boazi ayepo kaleta akwelume likumi akulu o mbongi ne ayepo waambela echi, ''Mukale apa.'' Ne awopo akala. ³ Boazi ayepo ambela mwapa Ruti echi, ''Naomi, oyu nakahuka kutunda mulitunga lya Moabi, aha ulisha kuilwa yimweya eyi naikala ilwa ya mwapetu Elimeleki. ⁴ Kuma ninaayala echi nikuyuvishe ne echi olimuke 'Oyiule pa meho owa ana kala muno, ne nopa meho akulu o mbunga.' Mona wahima kuishiulula oi shiulule. Ambene mona kohimine kuishiulula, pohuma onitongwele , echi nilimuke , mukonda kuyatukele kalo oyu naloela kui shiulula hime yowe, ne ame yame nina kuhata.'' Ne oyo mukwelume ayepo tawa echi , ''Kuma nii shiulula.'' ⁵ Nehonine Boazi ayepo mwaambela echi, ''Elyo liyuwa wakuula shilwa kwa Naomi, waloela kalo no kushimba Ruti mbuyama wo mu Moabi, munu wa muka kunyanda , echi opindwelepo lithzina lya muka kunyanda pa ushwana wenji,'' ⁶ Ne mwapa ayepo amba echi, ''Kani twesha kuilishiulwela mukonda kuma nilipishela ushwana wange. Oshimbe kuloela kwange yowe, mukonda ame kani twesha kuli shiulwela.'' ⁷ Nehonine mushikati shiya muisilaele eshi sholiyo shakalile shithzo shoku shiulula no kuli chinja itenga . Kutanalisha inu yoihe, munu kuma ahululangile shikatulo shenji ne nokushitambeka mwapenji; owu woliyo wakalile mukwa wamonishangile shitawa shano sho shiwa Muisilaele. ⁸ Nehoni oyo mwapa ayepo ambela Boazi echi, '' Oshiule yowe,'' ne ayepo hulula shikatulo shenji . ⁹ Ne Boazi ayepo ambela akulu o mbongi ne no mbunga thzothzihe echi, ''Yamwe mwa paki lelo oku paka echi nina ulu yoihe eyi ahetile Elimeleki ne neyi ahetile Kilion na Mahiloni yoihe kutundelela mulyoko lya Naomi. ¹⁰ Kalo no Ruti mbuyama wo mu Moabi , munu wa Mahiloni, nina muhete kuma akala munuwange, echi nipindwelepo lithzina lya mukakunyanda pa ushwana wenji, mukonda echi lithzina lyenji lelo lyapila mukachi kapenji ne no munthzango thzenji. Lelo yamwe mwa paki!'' ¹¹ Anu wahe awa akalile muthzango nakulu oliumbo awopo aamba echi, ''Yatwe twapaki. Shinda sha moyo akwame oyo mbuyama keya munjiyo thzoe echi Rachele na Lea, awo mwomuwili woo aumbile njiyo thza Isilaele; ne okale fumanyi mu efrata ne olimukiwe mu Betelehema. ¹² Njiyo thzoe thzi kale echi njiyo thza Perezi, oyo Tamare elekile kwa Juda, kuthza kwaana awa akukupa kwoyu mwanuke wo mbuyama.'' ¹³ Nehonine Boazi ayepo shimba Ruti, ne ayepo kala munuwenji. Honine ayepo thza kukwenji, ne Shinda sha moyo ayepo mukwathsa kukala no lila , ne ayepo eleka mwana wo mukwelume. ¹⁴ Ambuyama awopo aambela Naomi echi, ''Kushangaliwe shinda sha moyo, oyu nakana kukushiya oku ona pili mwapoe , oyu mbututu. Lithzina lyenji lilimukiwe mu Isilaele. ¹⁵ Akale kukwoe woku kuhushela mwoyo ne no kukuayulukisha muukulukathzi woe, mukonda ngumwenyoe , wokukuhima, oyuli shiwa kukwoe kupita kemonga ana owa kwelume oku kwana mutanu nayofochi, yoliyo namweleka.'' ¹⁶ Naomi ayepo shimba mwanuke, kumulipaka pa mbando, ne ayepo mulela. ¹⁷ Ambuyama awa atungile nenji awopo amuta lithzina , echi, ''Mwanuke wo mukwelume ona thsemukela Naomi.'' Awopo amuta echi Obedi. Ayepo kala tatawa Jesse , oyu wanakalile tata wa Davida. ¹⁸ Eshi sholiyo shikuta sha Perezi : Perezi ayepo kala tata wa Hezironi, ¹⁹ Hezironi ayepo kala tata wa Ramu, Ramu ayepo kala tata wa Amminadabi, ²⁰ Amminadabi ayepo kala tata wa Nashoni, Nashoni ayepo kala tata wa Salumoni, ²¹ Salumoni ayepo kala tata wa Boazi, Boazi ayepo kala tata wa Obedi, ²² Obedi ayepo kala tata wa Jesse, ne Jesse ayepo kala tata wa Davida.