¹ Joshua ayepo pinduka mashikushiku , ne awopo akatuka kutunda ku Shitimi. awopo akeya ku Jordan, aye no shivunga sha aka Isilaele shoshihe , ne awopo nakwama shilombo kukalapo kwa shime kuyavuka. ² Munyima thzo mayuwa ahatu, aendishi awopo athza mukachi ko shilombo; ³ awopo aka tumina shivunga echi, ''Owu mumona aleka thzo umbusha wa Shinda sha moyo Nyambi wenu, noa aprisita awa tunda ku mukuta wo Malivi kwana thzishimbi, mwaloela kukatuka mwo shino shivaka ne nokuthzi shupwela. ⁴ Kwaloela kukala shivaka mukachi kenu nathzo shokukuma pa ita yokukwana makumi eli yo lyoko. Lelo mwa thzihenyenena, echi mumone eli likuñwa muloela kuthza, mukonda mushime kuenda mweli likuñwa.'' ⁵ Joshua ayepo ambela Shivunga echi, ''Mulikenishe peunja , mukonda Shinda sha moyo kuma akwama yoku komokisha mukachi kenu.'' ⁶ Ne Joshua ayepo ambela aprisita echi, ''Mushimbe aleka thzo umbusha , ne muthze posho thzo Shivunga.'' Ne awopo akakula aleka thzo umbusha ne awopo athza posho thzo Shivunga. ⁷ Shinda sha moyo ayepo ambela Joshua echi, ''Muliyuwa lyolelo kuma ni kukulisha mumeho oma Isilaele wahe. Kuma alimuka echi liya nanikala na mushe lyoliyo nikala noe. ⁸ Kuma otumina aprisita awa ana shimbi aleka thzo umbusha , 'Owu mukeya kuñalo thzo meyu a Jordani, mwaloela kuimana Muliviya lya Jordani.''' ⁹ Ne Joshua ayepo ambela Shivunga sha aka Isilaele echi, ''Mukeye kuno , ne namu teelele maywi a Shinda sha moyo Nyambi wenu.'' ¹⁰ Ne Joshua ayepo aamba echi, ''Muhengeya kuma mulimuka echi Nyambi wo kuyoya oli mukachi kenu ne kuma atundisha posho thzenu Makanana, Mahiti, Mahivi, Maperizi, Magirigashi, Maamori, ne no Majebusi. ¹¹ Ngamumone! aleka thzo umbusha wa Fumu wo kaye kokahe thzaha yavukaposho thzenu mu Jordani. ¹² Honine ohangule akwelume likumi neeli kutundelela mu mikuta thza Isilaele, mukwelume yofochi pa mukuta no mukuta. ¹³ Owu ilyatelo yo maulu o aprisita awa anashimbi aleka thza Shinda sha moyo, Fumu wo kaye kokahe , apa akalyata meyu ao mu Jordani, meyu a Jordani kuma aliela pakachi, ne kemonga meyu aali no kuulumuka kutundelela ku maweluwelu kuma emana ne kuma akala panu pofochi.'' ¹⁴ Nehoni ou shivunga sha katukile kutunda muma tente asho echi aka yavuke Jordani, aprista awa ashimbile aleka thzo umbusha awopo athza posho thzo shivunga. ¹⁵ popomwene awa ashimbile aleka apa akumine ku Jordani, ne no maulu aprisita awa ashimbile sho kuposho owu ngunyunine kumeyu - omo mu Jordani aakalile no kuulumuka kuñalo thzothzihe kutundelela kuwilu shikati shoshihe - meyu omahe akalile no kuulumuka aopo emana pofochi . Meyu aopo emanena popale . ¹⁶ Meyu aopo emana kuulumuka kutatekela ku Adama, mbongi ethzi thza kalile panyonga na Zaretani, kutwalelela kuulumuko wokukengisha kuli kululwale lya Araba, no kulikululwale lyo mungwa. Shivunga ashopo shi yavukela popepi na Jeriko. ¹⁷ Aprisita awa ashimbile aleka thzo umbusha wa Shinda sha moyo awopo akemana pa muve woukukutu pakachi ka Jordani kupitela apa sha yavukelile shivunga shoshihe sha aka Isilaele pa muve wosho kukutu.