¹ Nehoni Joshua mwana Nuni kushili Mushitimi ayepo tuma akwelume eli kokupila kulimuka munu echi aka nenge litunga. Ayepo waambela echi, ''Muthze, muka kenge nawa litunga, manene mbongi thza Jeriko.'' Awopo athza ne awopo aka ingena munjiyo thzo mbuyama wo luthziho ishiwa echi Rahaba, ne awopo akalako. ² Fumu wo Jeriko awopo amutongwela echi, ''Ngomone, akwelume aka Isilaele aneya kuno echi na nenge litunga.'' ³ Fumu wo Jeriko ayepo tuma liywi kwa Rahaba ne ayepo mwaambela echi, ''Olete awo akwelume awo nakeya kukwoe awa anengena munjiyo thzoe, mukonda aneya mukuna nenga litunga lyolihe.'' ⁴ Ambene oyo mbuyama kuma ashimbile awo akwelume eli kuwa holeka. ayepo tawa echi, ''Yashemwa, awo akwelume nakeya kukwange, ambene kananilimuka echi kupi natundelela. ⁵ Apa nakuilaula awopo athza, mwo shiya shikati sho kufota kuyanjela shelo sho mbongi. Kanilimuka oku naathzi. Kuma muwa wana mona womuwa yokolwele kuwa shupwela.'' ⁶ Ambene kuma awa shimbile kuwa thzinisha peulu thzo shiluli ne nokuwa holeka kushi thzo mutumbo wo matokwani aayanekile peulu thzo shiluli. ⁷ Nehoni akwelume awopo awa shupwela mulikuñwa eli likengisha kui vaao ya Jordani. Shelo ashopo ashi yanjela munyima thza ka kushupwela kukatuka kuthza . ⁸ Akwelume kwa shime kulala mukonda wo ushiku, ayepo keya kukwo peulu thzo shiluli. ⁹ Ayepo waambela echi, ''Naha limuka echi Shinda sha moyo ona mitambeka litunga nehoni lyowa lyo kumiyapa lineya kukwetu. Wahe awa ana tungu mulitunga aha tutuma kuyapa yamwe. ¹⁰ Tuna yuvu omwo Shinda sha moyo na kukutishela meyu oku likulu lwale lyo sho kihu kukwenu uwu mwa tundile mu Egepita. Kalo natuyuvu eyi namu kwamisha kuma fumu eli oma Amori muthsambwaaliya thza Jordani-Sihoni na Ogo-awo namu manishelela kuthzilisha. ¹¹ Owu natu yiyuvu, michima thzetu athzopo thzi nyongolokota ne kuyatukele kalo undume ou una shiyala ku munu yomuhe-mukonda Shinda sha moyo Nyambi wenu, Nyambi wo kuwilu muwilu no pshi pa kaye. ¹² Honine pano, nahamilomba mulyethze ku kwange ko Shinda sha moyo echi, wechi eli ninakala no ñeke kukwenu, namwe wangu mwa kukwamishe ñeke kwaka njiyo thza tata. Munipe shisupo sho kutanala ¹³ eshi shimonisha echi kuma mwa kuyoisha mioyo thzowa tata na mama, andumbuthzange, aminange owa mbuyama ne no mayuhe oo omahe, ne echi mwaku yoishe myoyo thzetu ku lifu.'' ¹⁴ Akwelume awopo amutawa echi, Mioyo thzetu thzi kale thzoe, kemonga lifu! Mona kotongola eyi tunaendela, pohuma, Shinda sha moyo ou akutupa lino litunga kuma twakukala no ñeke no kusepahala kukwoe.'' ¹⁵ Nehoni ayepo wa punishela pola mukanjaneno no kuwa ulumukisha pashi ko muothzi. Njiyo ethzi akalangile kuma athziumbelile pa shipata sho mbongi. ¹⁶ Ayepo waambela echi, ''Muthze mumikinya ne mukaliholekemo mona kamukwama kengeyo awa ali no kumishupwela kuma amiwana. Muliholekemo mayuwa ahatu kupitela awa amishupwela owu akahuka. Mbenji mulithzele mulikuñwa lyenu.'' ¹⁷ Akwelume awopo amuambela echi , ''kuma twakukala oku anguluka kwoku kulyaanga ona tukwamisha echi tu lyethze mona kokwamisha eyi. ¹⁸ Owu twakukeya mulitunga, waloela kuanga no kunyendaelisha ou muothzi wosho kihu mwaka kanjaneno otu ulumukishela, ne wangu waku waneke munjiyo atata woe nowa mama woe , andumbuthzoe ne naka njiyo thza tata woe wahe. ¹⁹ Yomuhe oyu wakupuna mushelo sho njiyo thzoe kuthza mumbaja , onyinga wo kuma wakukala pa mitwi thzoo ne kuma twakupila mulandu. Ambene monapo lyoko alyopo likwata pa munu yomuhe oyu waku kala noe munjiyo, onyinga wenji kuma wakukala pa mitwi thzetu. ²⁰ Ambene mona wo tongole eyi tunaendela, kuma twakukala okuanguluka kwoku kulianga onatu kwamisha echi tu lyethze.'' ²¹ Rahaba ayepo watawa echi, ''Eyi munaamba ikwamiwe.'' Ayepo wa katula ne awopo athza. Ne ayepo angelela muothzi wosho kihu nokuu nyengelelisha mukanjaneno. ²² Awopo akatuka ne awopo athza mumikinya nehonine awopo aka kalamo mayuwa ahatu kupitela awa awashupwelile owu aka hukile. aka kushupwela awopo awa fota kumanyonga olikuñwa lyolihe ne kaawa wanine. ²³ Awa akwelume eli awopo ahuka ne awopo ayavuka kuhuka kwa Joshua mwana Nuni, ne awopo akamutongawela yoihe eyi naikwamahala kukwo. ²⁴ Awopo ambela Joshua echi, ''Yashemwa Shinda sha moyo ona tambeka eli litunga kukwetu. Wahe awa ana tungu mulitunga aha tutuma mukonda wetu.''