¹ Nehoni akwopo kukala kenge munyima wo lifu lya Mushe mupika Shinda sha moyo, ne Shinda sha moyo ayepo aamba kwa Joshua mwana Nuni, echi, ² ''Mushe , mupikange , onafu. Nehonine, okatuke, oyavuke oyu Jordani, yowe nowa anu wahe, muthze mulitunga eli niwa tambeka - kumbunga thza Akaisilaele. ³ Nina mitambeka shivaka sho shihe eshi akalyata maulu enu kuka shienda. Nina shimi tambeka, echi eli nakulupelishelile Mushe. ⁴ Kutatekela ku Kumbulwakukutu ne noku Lebanoni, kutwala kwo kule shemwa kuliviya lyoshokulu, lya Yuferati, no litunga lyolihe lyo Mahiti, noku Likulu lwale lyosho kulu, oko linatokelanga Liyuwa, kuma likala litunga lyenu. ⁵ Kuyatukele oyu wakutwesha kwiimana posho thzoe mumayuwa omahe okuyoya kwoe. Kuma nikala noe echi liya nanikala na Mushe. Kana kukushondoloka kemonga kukushiya. ⁶ Otanale ne okale no undume. Yowe waku hetisha ethzi mbunga litunga eli na lyethzile kowa kukuwo echi kuma nakuliwapa. ⁷ Otanale kalo okale noundume manene. Omamele kukuteka milao thzothzihe ethzo mupikange Mushe nakutumina. Lelo watunda kukwathzo ku kengisha kushilyo kemonga kushimoho, echi owane kutwesha kwokuhe oku othza. ⁸ Ethzi vuka thzo mulao kathzi loela kutunda mukanwa koe. Waloela kutalamo ushiku no mutanya echi otweshe ku mamela kukwama yoihe eyi inañoliwamo. Nehonine kuma oheta no kutwesha. ⁹ Honi yame kani kutuminine? Otanale ne okale no undume! Lelo wayapa. Lelo wa vapa. Shinda sha moyo Nyambi woe oli noe kwokuhe oku othza.'' ¹⁰ Nehonine Joshua eyepo tumina aendishi o mbunga echi, ¹¹ ''Muthze mupita pite mukachi ko shilombo ne mutumine mbunga echi, 'muliloishele mifaho . Kuna shiyala mayuwa ahatu pohuma mwaha yavuka oyu Jordani echi muthze muka hete litunga elyo Shinda sha moyo Nyambi wenu ami tambeka echi mulihete.''' ¹² Ku mukuta wo Marubeni, no mukuta wo Magati ne no shipathsi shimweya sho mukuta wo Manase, Joshua ayepo waambela echi, ¹³ ''Muayale maywi aya a miambelile Mushe mupika a Shinda sha moyo, aya amituminine echi, 'Shinda sha moyo Nyambi woe ahakutambeka kutulumwisha, ne aha kutambeka eli litunga.' ¹⁴ Anu wenu, no mayuhe enu , ne no imunanu kuma ikala mulitunga elyo Mushe na mitambeka muthsambwaalino wa Jordani. Ambene a shelume wahe oe kuma ayavuka kuthza naapo echi aka wakwathse ¹⁵ kupitela napo mbela Shinda sha moyo akawapela kutulumwisha echi eli anamipa namwe. Ne nawo kuma aku heta litunga elyo Shinda sha moyo awa tambeka. Ne pohuma kuma mwakukahuka mulitunga lyenu ne no kuna liheta, litunga elyo Mushe mupika Shinda sha moyo amipile muthsambwaalino thza Jordani, oko kuna velanga liyuwa.'' ¹⁶ Ne awopo atawa Joshua echi, ''Yoihe eyi otu tumina kuma tuikwama , kalo kwokuhe oku wakututuma kuma twa kuthza . ¹⁷ Kuma tuku kuteka echi liya natu kuteka Mushe. Pohuma Shinda sha moyo Nyambi woe akale noe , echi liya nakala na Mushe. ¹⁸ Yomuhe oyu alukela kulwisha itumina yoe ne no kukana kukuteka maywi awa ona wa tumina kuma apaiwa. Pohuma otanale ne okale no undume.''