¹ Shivunga shoshihe ou sha yavukile Jordani, Shinda sha moyo ayepo ambela Joshua echi , ² ''Ohangule akwelume okukwana likumi naeli kutundelela mukachi ko shivunga, mukwelume yo fochi pa mukuta no mukuta. ³ Owatambeke eshi shitumina: 'Mushimbe mawe okukwana likumi naeli pakachi ka Jordani paya anemana aprisita pa muve wosho kukutu, ne mwiye nao ne namuatule mushivaka eshi namulala ushiku.'' ⁴ Nehonine Joshua ayepo isha akwelume oku kwana likumi naeli awa ahangulile kutundelela mumikuta thza aka Isilaele, yo fochi pa mukuta no mukuta. ⁵ Joshua ayepo waambela echi, ''Muthze posho thzo aleka thza Shinda sha moyo Nyambi wenu pakachi ka Jordani. Munu no munu aka yelule liwe aka pake pa lipee lyenji, kuthza pa palo thzo mikuta thzo shivunga sha Isilaele apa thzikuma. ⁶ Eshi kuma shikala shi monisho mukachi kenu ouwu anenu akumiipulanga mu mayuwa oku posho aakwiya echi, 'Aa mawe aha monisha shiñe kukwenu?' ⁷ Ne kuma mwakuwa tawa echi, 'Meyu a Jordani kuma alielile pakachi posho thzo aleka thzo umbusha wa Shinda sha moyo. Ou thza yavukile Jordani, meyu a Jordani kuma alielile pakachi. Honine aa mawe kuma akala shaanukisho ku shivunga sha aka Isilaele mushikati sho shihe.''' ⁸ Shivunga sha aka Isilaele ashopo shikwama mwene echi eli awa tuminine Joshua, ne awopo aka yelula mawe okukwana likumi naeli pakachi ka Jordani, echi eli aambile Shinda sha moyo kwa Joshua. Awopo ayelula mawe kuthza mupalo thzo mikuta thza aka Isilaele. awopo ashimba ao mawe, kuatwala pa shivaka apa aka kwamine shilombo ne awopo aka atulapo. ⁹ NeJoshua ayepo kapaka mawe okukwana likumi naeli pakachi ko liviya lya Jordani, pa shivaka apo emanine maulu aprisita awa shimbile aleka thzo umbusha. Eshi shaanukisho poshili kuleta no muliyuwa lyo lelolino. ¹⁰ Aprisita awa shimbile aleka awopo akemana pakachi ka Jordani kupitela yoihe eyo Shinda sha moyo a tuminine Joshua echi ayaambele shivunga apa yapwelelile, kuthza mweyo yoihe atuminine Mushe kwa Joshua. Shivunga ashopo shiyokolola ne awopo ayavuka. ¹¹ Shivunga sho shihe owu sha manine kuyavuka, aleka thza Shinda sha moyo ne na aprisita awopo ayavuka kuthza posho thzo shivunga. ¹² Mukuta wa Rubeni, no mukuta wa Gadi, no shipathsi shimweya sho mukuta wa Manase awopo apitela posho thzo shivunga sha aka Isilaele kwa naliwana kukwama mashwalale, echi eli aambile Mushe kukwo. ¹³ Kuma kwa kalile akwelume okukwana 40.000 awa aliloishelile nfvo awa pitelile posho thza Shinda sha moyo, echi akalwe mumanda a Jeriko. ¹⁴ Mwelyo liyuwa Shinda sha moyo ayepo kulisha Joshua mumeho aka Isilaele wahe. Awopo amukuteka - echi eli akutekile Mushe - muma yuwa enji omahe. ¹⁵ Nehoni Shinda sha moyo ayepo ambela Joshua echi, ¹⁶ ''Otumine aprisita awa anashimbi aleka thzo umbusha echi akanduke atunde mu Jordani.'' ¹⁷ Nehonine Joshua ayepo tumina aprisita echi, ''Mukanduke mutunde mu Jordani.'' ¹⁸ Owu aprisita awa ashimbile aleka thzo umbusha wa Shinda sha moyo akandukile kutunda pakachi ka Jordani, ne no ilyatelo yo maulu oo owu ayiyelulile kuailyatisha pa muve wosho kukutu, ne meyu a Jordani aopo ahukela muivaka yao ne aopo a yala kukuma muñalo thzao, echi eli akalile mumayuwa ane okumanyima. ¹⁹ Shivunga ashopo shi yavuka ku tunda mu Jordani muliyuwa lyo uli kumi lyo ngonda thzo matatekelo. Awopo nakwama shilombo mu Giligali, ku muvo yuwa wa Jeriko. ²⁰ Aya mawe okukwana likumi naeli ashimbile mu Jordani, Joshua ayepo kaatula mu Giligali. ²¹ Ayepo tongwela shivunga sha aka Isilaele echi, ''owu anenu akwipulanga atata woo mu ikati yo kuposho echi, 'Aa mawe ayiñe?' ²² Pohuma mwa tongwela anenu echi, 'Amonisha apo aka Isilaele ayavukile Jordani pa muve wou kukutu.' ²³ Shinda sha moyo Nyambi wenu kuma akukutishile meyu a Jordani mukonda wenu, kupitela apa mwa yavukelile, echi eli akwamine Shinda sha moyo Nyambi woe kuli kululwale lyo mambungu, eli akukutishile mukonda wetu kupitela owu twa yavukile, ²⁴ mukonda echi ivunga yoihe yo pano pashi alimuke echi lyoko lya Shinda sha moyo likolo, ne echi okuteke Shinda sha moyo Nyambi woe muma yuwa omahe.''