¹ Mwo shiya shikati Joshua ayepo isha Marubeni, Magadi, no shipathsi shimweya sha Manase. ² Ayepo waambela echi, ''Muna kwama inu yoihe ei naa tumina kukwenu Mushe mupika wa Shinda sha moyo. Namuyuvu liywi lyannge muinu yoihe ei nani mitumina. ³ Kana mulihanda napenu mumayuwa omangi, kuna kuma no liyuwa lyo lelo, kalo munayalishelela ekwama ei ina fotahala mumilao thza Shinda sha moyo Nyambi wenu. ⁴ Nehoni Shinda sha moyo Nyambi wenu onapa apenu kutulumwisha, echi eli awa kulupelishelile. Nehonine muhuke muthze kuma tente enu mumuve wenu ou muna hete, ou amitambekile Mushe mupika wa Shinda sha moyo muthsambwaa liya thza Jordani. ⁵ Nehoni pohuma mumamele nene itumino ne no mulao eyi Mushe mupika wa Shinda sha moyo na mitumina, kuhima Shinda sha moyo Nyambi wenu, kuenda mu makuñwa enji, kumamela itumina yenji, ne no kuyendamena kukwenji ne no kumulombela no muchima woe wouhe no moyo woe wouhe.'' ⁶ Nehonine Joshua ayepo wa fuyaulano kuwa fundula echi alithzele, ne awopo athza kuhuka ku matente oo. ⁷ Honine shipathsi shi mweya sha Manase Mushe kuma ashipile kushwana mu Bashani, ambene shipathsi shimweya Joshua ayepo shitambeka kushwana pofochi naapoo mulitunga lyo kuwiko wa Jordani. Joshua ayepo wa fundula echi alithzele kumatente oo; ayepo wa fuyaula ⁸ ne ayepo aamba kukwo echi, '' Muhuke kuma tenti enu no mali omangi, no imunanu yoingi, ne no silivera no gauda, ne no kopa no ifu, ne no ito yoingi. Mulitepele etenga eyi namukupala kuitothzi yenu naapenu.'' ⁹ Nehonine awa athsimuluhile kwa Rubeni, nawa athsimuluhile kwa Gadi, no shipathsi shimweya sho mukuta wa Manase awopo ahuka kuma umbo oo, kushiya mbunga thza Isilaele ku Shilo, mulitunga lya kanana. Awopo akatuka kuthza kushivaka sha Gileadi, kulitunga lyoo, elyo shemwa ahetile woliyo, kuthza mukuyuva kuku tumina kwa Shinda sha moyo, ko lyoko lya Mushe. ¹⁰ Ou akeyile ku Jordani muya mwene mulitunga lya Kanana, Marubeni ne no Magadi no shipathsi shimweya sha Manase awopo aka umba aletare kunyonga thza Jordani, aletare thzo shokulu thzo kumonahala. ¹¹ Mbunga thza Isilaele athzopo thzi yuva eyi opo aamba echi, ''Ngamumone! mbunga thza Rubeni, Gadi, ne no shipathsi shimweya sho mukuta wa Manase ana umbu aletare posho thzo litunga lya Kanana, ku Geliloti, kushivaka eshi shili popepi na Jordani, pa neku lyo shivaka eshi shiwela ku mbunga thza Isilaele.'' ¹² Mbunga thza Isilaele owu thza yuvile eyi , wahe anu a Isilaele awopo aliwana pofochi ku Shilo echi athze aka kwame mfvo awa lwishe. ¹³ Nehoni mbunga thza Isilaele athzopo thzi tuma atumiwa ku Marubeni, Magadi, ne no kushipathsi shimweya sho mukuta wa Manase, mulitunga lya Gileadi. Kalo awopo atuma Finihasi mwana Eleazare, muprisita, ¹⁴ ayepo thza no likumi lya aendishi, yofochi kutundelela mumikuta thzo lupthsi lwa Isilaele, muendishi no muendishi kuma akalile mukulu wo shikota sha Isilaele. ¹⁵ Awopo akeya ku mbunga thza Rubeni, Gadi, no kushipathsi shimweya sho mukuta wa Manase, mulitunga lya Gileadi, ne awopo naamba kukwo: ¹⁶ Thzothzihe mbunga thza Shinda sha moyo athzopo thziamba kenge, ' Yiñe eyi munamonishela kupila shikulupelo mane muna epishela Nyambi wa Isilaele, mukushiuluka muliyuwa lyo lelo kutunda kuku shupwela Shinda sha moyo mukonda wo kuliumbela mwashinda aletare muliyuwa lyolelo kulwisha Shinda sha moyo? ¹⁷ Ene uya omango wetu woku Peori ne watu pupela? Atwepo nahingeno tushime kukena kuumango wateni. uya omango po waletile waanji peulu thzo mbunga thza Shinda sha moyo mukonda wo shiya shivi. ¹⁸ Namwe kalo mwa loela kutunda mukushupwela Shinda sha moyo muliyuwa lyo lelo? monapo echi muna alukela Shinda sha moyo lelo, peunja kuma aanjipela mbunga thzothihe thza Isilaele. ¹⁹ Ngechipo lino litunga muna hete po lya mathzilo, mwa loela kuyavukela muthsambwa mulitunga omo thzinemana tabarnakele thza Shinda sha moyo ne muka shwane pofochi netu. Honine lelo mwa alukela Shinda sha moyo, kemonga kwaalukela yatwe mukonda woku liumbela aletare thzenu kushiya thziya aletare thza Shinda sha moyoNyambi wetu. ²⁰ Ene Akani mwana Zera, kaamonishile kupila shikulupelo muyaamba yoitenga iya ya kanishile echi ya Nyambi? Ene waanji wa kawa welelile pa mbunga thzo thzihe thza Isilaele? Oya mukwelume kaafile mukonda wo umango wenji.''' ²¹ Nehoni mikuta thza Raubeni, Gadi, no shipathsi sho mukuta wa manase awopo a tawa aendishi oi kota ya Isilaele: ²² ''shokolo, Nyambi, Shinda sha moyo! aye shokolo, Shinda sha moyo! - Aha limuka, ne Isilaele alimuke! monapo echi kuma kuna kala kualukela kemonga kupila shikulupelo kwa Shinda sha moyo, lelo mwa tuyoisha ²³ mukonda wo wokuumba ethzi aletare echi tushiye kushuppwela Shinda sha moyo. Ngechi po kuma natuumbu ethzi aletare echi tupelepo itavelo yo kutumekela, kupelapo oheke, kemonga itavelo yo kuliyala, ne pohuma Shinda sha moyo ai tukulishe. ²⁴ Kalikengeyo! kuma natukwama kenge mukonda wokuyapa echi kusho anenu katele akukaambele anetu echi, 'Yiñi eyinga mufota kwa Shinda sha moyo, Nyambi wa Isilaele? ²⁵ Mukonda Shinda sha moyo nakwama Jordani echi akale mainja mukachi ketu namwe. Amwe mwa mbunga thza Rubeni na mwe mwambonga thza Gadi, kuyatukele eshi mutwesha kukwama kwa Shinda sha moyo.' Honine anenu kumanga akukanishanga anetu kulombela Shinda sha moyo. ²⁶ Honine woliyo natuamba echi, 'Tuumbenu aletare, kali thzo kutumekela ipiwa kemonga itavelo, ²⁷ ambene echi thzikale upaki mukachi kenu natwe, no mukachi ko mikuta thzetu ne no munyima thzetu, echi wangu twaku kwame ikwama ya Shinda sha moyo posho thzenji, no upiwa wokutumekela ne no itavelo yetu ne no upiwa wokuliyala, honine echi anenu mbela aambela anetu kusho echi, ''kamuli no ndao amwe kwa Shinda sha moyo.''' ²⁸ Honine kuma natuamba echi, 'Ngechipo eyi ayepo yaambiwa kukwetu kemonga kwawa akuthsimuluha kukwetu kusho, wangu twakuambe echi, ''Ngamumone! Eshi shitameneno sho aletare thza Shinda sha moyo, esho aumbile akuku wetu, kali sho kutumekela upiwa , kemonga itavelo, ambeni echi thzikale upaki mukachi ketu namwe.'' ²⁹ Ihumbuke eyo kukwetu yokuninga echi tualukele kulwisha Shinda sha moyo, ne echi muliyuwa lyolelo tualuke tushiye kumushupwela echi tuliumbele aletare thzoku tumekela opiwa, thzo kutumekela uheke kemonga itavelo, kushiya aletare thza Shinda sha moyo Nyambi wetu thziya thzili posho thzo tabernakele thzenji.''' ³⁰ Finahasi muprisita ne no aendishi o mbunga, awa kalile, akulu oikota ya Isilaele awa akalile nenji, owu ayuvile maywi aa aambile mbunga thza Rubeni, Gadi, ne no Manase awopo aamba echi, yaloile mumeho oo. ³¹ Finihasi mwana Eleazare muprisita ayepo aamba ku mbunga thza Rubeni, Gadi,ne no Manase, echi, ''Lelotuna limuka echi Shinda sha moyo oli mukachi ketu, mukonda kamukwamine shikwama shokupila shikulupelo kukwenji. Honipano muna yoyisha mbunga thza Isilaele mumoko a shinda sha moyo.'' ³² Nehoni Finehasi mwana Eleazare muprisita, ne noa endishi awopo akatuka kuhuka kutunda ku Marubeni no Magadi, kutunda mulitunga lya Gileadi, kuhuka kulitunga lya kanana, ku mbunga thza Isilaele, ne nokuwa letela liywi. ³³ Etongola yoo kuma yakalile yoyiwa mumeho o mbunga thza Isilaele. Mbunga thza Isilaele athzopo thzi fuyaula Nyambi ne awopo ashiya honi kuamba yoku kwama mfvo thzo kukalwisha Marubeni no Magadi,echi akepishe liya litunga a tungile. ³⁴ Marubeni ne no Magadi awopo ata ethzo aletare lithzina echi ''upaki'', mukonda kumaambile echi, '' oupo upaki mukachi ketu echi Shinda sha moyo po yoliyo Nyambi.''