¹ Munyima thzo mayuwa omangi, Shinda sha moyo owu apile Isilaele kutulumwisha kuitothzi yoo yoihe eyi yawa thzingulukile, ne Joshua kuma akulupalile ona vulela myaka, ² Joshua ayepo isha Isilaele - akulu uo, aendishi uo, aatuli uo, no waya alimukiwa - ne ayepo watongwela echi, ''Nina kulupala ne myaka thzange thzina vulu. ³ Muna limonena yoihe eyo Shinda sha moyo Nyambi wenu eyi ana kwama kowa anu awa wahe mukonda wenu, mukonda kuma nakala yoliyo Shinda sha moyo Nyambi wenu shemwa yoliyo na milwela. ⁴ Mumone! nina mipa shikwama shoku twesha kuhuwa anu awa na shialako echi ukale ushwana wo mikuta thzenu, pofochi no anu awa nanimana kuthzilisha, kutatekela ku Jordani kutwala kuli kulu lwale muwiko. ⁵ Shinda sha moyo kuma awa tundisha mo. Kuma awa chithza mo kuwa tundisha kukwenu. Kuma ashimba litunga lyoo, ne kuma mushimba litunga lyoo kuli heta, echi mwene Shinda sha moyo Nyambi wenu eli amikulupelishelile. ⁶ Nehoni mutanale, echi mumamele ne no kukwama yoihe eyi ina ñoliwa muvuka thzo mulao wa Mushe, lelo mwa thsengumukela kulyoko lyo shilyo kemonga lyo shimoho, ⁷ echi lelo mwaliwaneka nowa anu ashiala mukachi kenu shinga kutoya mathzina o athzimu oo, kulyethza mumwoo, kulombela thzoliyo, kemonga kuthzi kinyamena. ⁸ Kupita kengeyo, mwa loela kukakatela kwa Shinda sha moyo Nyambi wenu echi muna kwama kupitela no lelo lino. ⁹ Mukonda Shinda sha moyo po ona tundisha posho thzenu anu osho kolo, owangi. echi yamwe, kuyatukele oyu natwesha kuimana posho thzenu kuleta no lelo lino. ¹⁰ Mukwelume yo fochi wo kupalo thzenu kuma aletisha echi ita ichile, Mukonda Shinda sha moyo Nyambi woe, yoliyo kulwela, echi eli akukulupelishelile. ¹¹ Mupakeleko maano, echi ohime Shinda sha moyo Nyambi woe. ¹² Ambene ngechipo womu shiulukishe miongo ne no kukakatela kowa anu ana pala owa anu awa ana shiala mukachi kenu, kemonga kuli yekela noo, shinga kukeya kukwo kuliwana noo ne nawo ku kwenu, ¹³ pohuma olimuke echi Shinda sha moyo Nyambi woe kuma ashiya kutundisha awa anu ali mukachi kenu. Nehonine, kuma akala shiteo ne no shilaha kukwenu, shivanthsi pa miongo thzenu ne mambimbo mumeho enu, kutwala apo mbo muka thzilela muno mulitunga lyo liwa elyo Shinda sha moyo Nyambi wenu na mitambeka.. ¹⁴ Pano ame nahathza mulikuñwa lyo pano pa kaye , mwahalimuka no michima thzenu ne no mioyo echi kuyatukele kemonga liywi lyofochi eli linakwanga kukala lyo shemwa kuinu yoihe yoiwa eyo Shinda sha moyo Nyambi woe eyi akukulupelishelile. Yoihe eyi inu ina keya mukonda wenu. Kuyatukele eshi shina kalupa. ¹⁵ Ambene echi eli kunakala echi liywi lyolihe lya Shinda sha moyo Nyambi woe eli akukulupelishelile lina liyalishelela, ne Shinda sha moyo kuma aleta papoe omango wouhe kupitela apa aka kuthzilishela muno mulitunga lyo liwa elyo Shinda sha moyo Nyambi woe akupile. ¹⁶ Kuma akukwama kengeyo ngechipo amwepo mushiya kuliyuvashana kuumbusha wa Shinda sha moyo Nyambi wenu, ou akutuminine echi ou mamele. ngechipo amwepo muthza nokuka lombela athzimu nokuka wa kinyamena, pohuma waanji wa Shinda sha moyo kuma wakumi yuumena, ne kuma mwa kuthzila wangu mulitunga lyo liwa elyo namipa.''