¹ Honine akulu o mikuta thzo Malivi awopo akeya Kwa Eleazare muprisita, kwa Joshua mwana Nuni, no ku kwa kulu omikuta thzanu aka Isilaele. ² Awopo awaambela ku Shilo mulitunga lya kanana, '' Shinda sha moyo kuma amituminine ku lyoko lya Mushe echi mutupe ma mbongi echi tu tungemo, no ivaka mokulishela emunanu yetu.'' ³ Honine mukutumina kwa Shinda sha moyo, anu aka Isilaele awopo apa kuushwana woo ma mbongi aa, kushimbelela noivaka yateni yoku lishela. ⁴ Muelelo wo loto oikota ya Kohati awopo amonisha eyi: Maprisita - ikota eyi yina thsimuluha pa Aroni awa athsimuluhile kumalivi - awopo atambula ma mbongi oku kuma pa likumi naa hatu aa awapile aka mukuta wa Juda, ku mukuta wa Simioni, ne no kumukuta wa Benjamine. ⁵ Awa ashaalilepo kwa aka mukuta wa Kohati awopo atambula no loto ma mbongi likumi kutundelela kuikota yo mukuta wa Efraimi, Dani, ne noku shipathsi shimweya sho mukuta wa Manase. ⁶ Nehonine anu awa thsimuluhile kwa Gershoni awopo apiwa mumuelelo wo loto, ma mbongi likumi na hatu kutundelela muikota yo mukuta wa Issakare, Ashere, Nafetali, ne no shipathsi sho mukuta wa Manase mu Bashani. ⁷ Anu awa athsimuluhile kwa Merari, shikota no shikota, awopo atambula ma mbongi likumi naaeli kutundelela ku mikuta thza Rubeni, Gadi, ne no Zebuloni. ⁸ Ne anu aka Isilaele awopo apa, mumuelelo wo loto, awa ma mbongi (pofochi no malishelo ateni) kumalivi, echi mwene Shinda sha moyo eli atumenine no lyoko lya Mushe. ⁹ Kutundelela mumikuta thza Juda na Simioni, awopo apiwa litunga kwawa ma mbongi awa, aa anatoiwa pa mathzina. ¹⁰ Aa ma mbongi aa awopo apiwa kwawa a thsimuluha kwa Aaroni, awa liwanekile mu shikota sha kohati, awo mukuyala kuma athsimuluhile mumukuta wa levi. Muelelo wo matatekelo wo loto awopo uwela papoo. ¹¹ Aka Isilaele awopo awapa Kiriati Araba (Araba yoliyo wa kalile tata wa Anaki ), mushivaka sho fochi na Hebroni, mulitunga lyo mikinya thza Juda, no malishelo ateni. ¹² Unone elwa yethzo mbongi, kupakapo no maumbo athzo, kuma aiyipile kale kwa kalebu mwana Jefune, echi ikale shiheta shenji. ¹³ Kwawa athsimuluhile kwa Aaroni muprisita awopo awa tambeka Hebroni no malishelo ateni - ethzi thza kalile mbongi thzo kuchilela munu yomuhe oyu napaa muenjenji mwo kukana kuhima - ne no libina no malishelo ateni, ¹⁴ Jatirino malishelo enji, ne no Eshitemoa pofochi no malishelo enji. ¹⁵ Kalo awopo awapa no Holoni pofochi no malishelo enji, Debire pofochi no malishelo enji, ¹⁶ Aini no malishelo enji, Juta no malishelo enji, ne no Beti Shemeshi pofochi no malishelo ateni. Kuma akalile ma mbongi mutanu naaneaa awa pile kutundelela kwethzi mikuta thzili. ¹⁷ Kutundelela mumukuta wa Benjamine awopo apiwa Gibeoni pofochi no malishelo ateni, Geba no malishelo ateni, ¹⁸ Anatota no malishelo ateni, ne no Alumoni no ma lishelo ateni - ma mbongi ane. ¹⁹ Ma mbongi napiwa ku maprisita oku thsimuluha kwa Aaroni, kuma akalile likumi naahatu oahe pofochi, pofochi no malishelo ateni. ²⁰ Echi kowa ashaalilepo kuma Kohati awa na wela kushikota sho Makohati ikota yo mukuta wo Malivi- kumaakalile no ma mbongi aa awa tambekile kutundelela mumukuta wa Efraimi mumuelelo wo loto. ²¹ Kukwo kuma apileko Shikemi pofochi no malishelo ateni mulitunga lyo mikinya thza Efraimi - mbongi thzo kuchilela munu yomuhe oku paa munu koku kana kuhima - Gezere no malishelo enji, ²² Kibuzaimi no malishelo ateni, ne no Beti Horoni pofochi no malishelo ateni -ma mbongi ane omahe pofochi. ²³ Kutundelela ku mukuta wa Dani, shikota sha Kohati kuma ashi tambekile Eleteke no malishelo ateni, Gibetoni pofochi no malishelo ateni, ²⁴ Aijalonino malishelo enji, ne no Gati Rimmonino malishelo ateni - ma mbongi ane omahe pofochi. ²⁵ Aka mukuta wa Manase wamweya, awopo atambeka aka shikota sha Kohati Taanaki no malishelo ateni ne no Gati Rimmoni no malishelo ateni omahe -ma mbongi eli. ²⁶ Ayepo akala ma mbongi likumi pofochi omahe aa awelelile kuikota yo makohati, kushimbelela pofochi no malishelo ateni. ²⁷ Kutundelela ku shipathsi shimweya sho mukuta wa Manase, kuikota ya Gershoni, awa kuma akalile wamweya oikota yo malivi, ne awopo awa tambeka Golani mu Bashani no malishelo ateni omahe - mbongi thzo machilelo o munu yomuhe oyu na paa muenjenji mokukana kuhima, pofochi no Be Eshitera no malishelo ateni omahe - ma mbongi eli omahe pofochi. ²⁸ Aka ikota ya Gershoni kalo kuma atambulile Kishioni kutundelela kwa aka mukuta wa Isakare, pofochi no malishelo ateni, Daberti no malishelo ateni, ²⁹ Jaramuti pofochi no malishelo ateni, ne no Eni Gannimi pofochi no malishelo ateni - ma mbongi ane. ³⁰ Kutundelela ku mukuta wa Ashere, awopo apiwa Mishale pofochi no malishelo ateni, Abdoni no malishelo ateni, ³¹ Helikatino malishelo ateni, ne no Rehobi no no malishelo ateni - pofochi kuma akalile ma mbongi ane omahe. ³² Mukuta wa Nafetali, awopo atambeka ikota ya Gershoni Kedeshi mu Galilea pofochi no malishelo ateni - mbongi thzo kuchilela omunu yomuhe oyu na paa muenjenji moku kana kulimuka; Hammoti Doro pofochi no malishelo ateni, ne no Karatani no malishelo ateni - kuma akalile ma mbongi ahatu omahe. ³³ Kuma akalile mambongi likumi naahatu pofochi, kutundelela muikota ya Gershoni, pofochi no malishelo ateni. ³⁴ Kuma Livi waheno - ikota ya Merari - apiwile kutundelela ku mukuta wa Zebuloni: Jokineami pofochi no malishelo ateni, Karata pofochi no malishelo ateni, ³⁵ Dimuna no malishelo ateni, ne no Nahala pofochi no malishelo ateni - mambongi ane pofochi. ³⁶ Kuikota ya Merari atambulile kutundelela ku mukuta wa Rubeni: Bezere no malishelo ateni, Jahazi pofochi no malishelo ateni, ³⁷ Kedemoti no malishelo ateni, ne no Mepati pofochi no malishelo ateni -pofochi ma mbongi ane. ³⁸ Kutundelela mu mukuta wa Gadi kuma awa tambekile Ramoti mu Gileadi pofochi no malishelo ateni - mbongi thzo kuchilela ku munu yomuhe oyu napaa muenjenji moku kana kulimuka - ne no Mahanaimi pofochi no malishelo enji. ³⁹ Ikota ya Merare kalo kuma ai tambekile Heshiboni pofochi no malishelo ateni, ne no Jazere no malishelo ateni. Aa kuma akalile ma mbongi ane pofochi. ⁴⁰ Aa omahe oliyo akalile ma mbongi oi kota yoyingi ya Merari, yo kutundelela mu mukuta wa Levi - ma mbongi likumi naeli pofochi aa awa pile mumuelelo wo loto. ⁴¹ Ma mbongi o ma Levi aa atundishile mukachi ko litunga lyo ana a Isilaele kuma akalile makumi ane no mutanu nahatu, kupakapo no malishelo ateni . ⁴² Aa ma mmbogi po kuma akalile kenge mbongi no mbongi kuma thza kalile no malishelo athzo okuthzi thzinguluka. Mwoliyo akalelile kengeyo omahe ao mbongi. ⁴³ Nehonine Shinda sha moyo ayepo tambeka Isilaele litunga lyolihe eli a lyezile echi kuma akulipa akuku woo. Maisilaele awopo aliliela ne awopo alitunga. ⁴⁴ Nehoni Shinda sha moyo ayepo wapa kutulumwisha kumanyonga kokuhe, echi eli alyezile kwa akuku woo. Kuyatukele shanga yofochi kuitothzi yoo oyunga watweshile kuwa huwa. Shinda sha moyo kuma awa tambekile etothzi yoo yoihe mu moko oo. ⁴⁵ Kuyatukele kemonga shinu sho fochi kuikulupelisho yoihe yoyiwa eyo Shinda sha moyo a ambelile kwa aka njiyo thza Isilaele eyi ya kwangile kukala yo shemwa. Yoihe ayopo iliyalishelela.