¹ Nehoni mbunga thzothzihe thzo anu a Isilaele awopo aliwana pofochi ku Shilo. Awopo ashishamo tende thzo shiwano no kushimba no kukupala litunga lya kalile posho thzo. ² kuma kwa kalile mikuta mutanu na thzili mukachi ka aanu a Isilaele awa pilile kupiwa po kutunga. ³ Joshua ayepo aamba ko anu a Isilaele ci, '' Shikati mwiñi mwakuthza mulitunga eli Shinda sha moyo, Nyambi owa kukuwenu a mipile? ⁴ Muhangule akwelume ahatu ku mikuta thzothzihe, ne wangu niwatume. Kumaathza aka fotishishe litunga muwilu no pashi. Kuma akañola kumonisha apa likuma eci na mukwane mwahe, nehoni kuma akuka huka kukwange. ⁵ Kuma akuliela kukwama ivaka mutanu na yili. Mukuta wa Juda kuma ushiyala mushivaka shao kumboela, ne naka njiyo thza Josefa kuma aekethza kukala mushivaka sho ku mutulo. ⁶ Kuma wakuela litunga muivaka yokukuma pa mutanu na yili ne pohuma wakaleta kuno kukwange. Ne kuma ni miela ko kuuka ko loto kuno posho thza Shinda sha moyo Nyambi wetu. ⁷ Malivi kali no shivaka mukachi kenu, mukonda uprisita wa Shinda sha moyo po sholiyo shiheta shoo. Gadi, Rubeni, no shipathsi shimweya sho mukuta wa Manase ana tambula ushwana wo, muthsambwaaliya thza Jordani. Ou woliyo ushwana owo Mushe mupika Shinda sha moyo awa pile.'' ⁸ Nehoni akwelume awopo akatuka ne awopo athza. Joshua ayepo tumina awa athzile kukuñolo kumonisha apa lya kumine litunga, chi ''Muthze mukanduke no kuulumuka omo mulitunga ne muka ñole omu linakalela pohuma muka huke kukwange. Kuma nani miela ko kuuka ko loto kuno posho thza Shinda sha moyo ku Shilo.'' ⁹ Akwelume awopo akatuka kuthza kuka endaulamo kukanduka no kuulumuka ne awopo añola kumonisha omu lyakuma pa mapepa no ma mbongi ateni muivaka yokukuma pa mutanu na yili, kumonisha mbongi pa shivaka sho fochi. Ne awopo ahuka kwa Joshua ku shilombo mu Shilo. ¹⁰ Nehoni Joshua ayepo wa ukela ko loto ku Shilo posho thza Shinda sha moyo. oko koliyo Joshua aelelile litunga kwa anu a Isilaele, poliyo awanenine munu no munu shivaka sho kutunga. ¹¹ Litunga nalipiwa ku mukuta wa Benjamine kuma akawile kuthza pa shikota no shikota. Shivaka sho litunga eshi awa tambekile kuma sha kalile mukachi ko mukuta wa Juda no mukuta wa Josefa. ¹² kuhuka ku mutulo, mainja oo kuma atatekelile ku Jordani. Mainja aopo athza kuka kuma no kumikinya thzo kumutulo wa Jeriko, ne no kulitunga lyo mikinya muwiko. kutunda apo aopo aka kuma ku mbulwa kukutu thza Beti Aveni. ¹³ Kutunda apo mainja aopo achinakana mumboela kukengisha ku Luzi (mwofochi echi Betele) . Ne mainja aopo aulumuka ku Ataroti Addari, popepi no mukinya ou unakala kumboela wa Beti Horoni. ¹⁴ Ne mainja aopo athza kukengisha kumweya: Mushivaka sho muwiko aopo aka aluka kukengisha mumboela, aopo akengisha kuthza ku mukinya kuka pita kuchinakana ku Beti Horoni. Aa mainja aopo akapwela ku Kiriati Baale (yoilyo, Kiriati Jearimi), mbongi thzaka mukuta wa Juda. Aa oliyo akwama mainja oku mutoke yuwa. ¹⁵ Kumboela aopo atatekela pola thza Kiriati Jearimi. Kutunda apo mainja aopo athza ku Efroni, aopo akathza ku maweluwelu o meyu oku Nefetoa. ¹⁶ Mainja kalo aopo athza kuulumuka ku mainja o mukinya ou wakalile kuli kenga no Lichoolo lyo ku Beni Hinnomu, eli lyakaleli mumutulo wo kuhula thzo lichoolo lyo ku Refaimi. Ne aopo athza kuulumuka ku Lichoolo lyo ku Hinnomu, kumboela thzo muulumuko wo Majebusi, ne aopo athza kengeyo kuka ulumuka ku Eni Rogeli. ¹⁷ Aopo aaluka kukengisha ku mutulo, aopo athza kukengisha ku Eni Shemeshi, ne kutunda apo aopo athza ku Geliloti, popepi no likuñwa lya Adulami. Kutunda apo aopo athza kuulumuka ku liwe lyo ku Bohani mwana Rubeni. ¹⁸ Aopo achinakana kuthza ku mutulo ku mapee a Beti Araba ne aopo aka ulumuka ku Araba. ¹⁹ Mainja aopo achinakana kuthza kuhula o mutulo wa Beti Hogila. Mainja aopo aka pwela ku mutulo wo Lichoolo lyo likulu lwale lyo mungwa, kuhula thzo mboela wa Jordani. Aa oliyo mainja omu mboela. ²⁰ Jordani kuma akalile mainja oku muvoyuwa. Lyoliyo litunga ahetile aka mukuta wa Benjamine, kuma awa tambekile kuthza pa shikota no shikota, mainja no mainja kokuhe. ²¹ Nehoni ma mbongi aka mukuta wa Benjamine, kuthza pa shikota no shikota , kuma akalile Jeriko, Beti Hogila, Emeki Kezizi, ²² Beti Araba, Zemaraimi, Betele, ²³ Avvimi, Para, Ofira , ²⁴ Kefa Ammoni, Ofini, ne no Geba. Kuma akalile ma mbongi likumi naaeli, pofochi no maumbo ao. ²⁵ Kuma kwakalile kalo ma mbongi oku Gibioni, Rama, Beeroti, ²⁶ Mizipa, Kefira , Moza, ²⁷ Rekemi, Iripeeli,Tarala ²⁸ Zela, Haelefi, Jebusi (mwofochi echi Jerusalema), Gibea, ne no Kiriati. Kuma akalile ma mbongi oku kwana likumi naane, kupaka pofochi no maumbo ao. Eli lyoliyo litunga ahetile aka mukuta wa Benjamine kuthza muikota yoo.