¹ Mainja o litunga eli a tambekile aka mukuta wa Josefa kuma atundelelile ku Jordani kushivaka sha Jeriko, kumuvoyuwa wo maweluwelu a Jeriko, kuthza no mumbulwa kukutu, aopo akanduka kutundelela mu Jeriko kuchinuna mulitunga lyo mikinya thza Betele. ² Ne mainja aopo athza kutundelela mu Betele kuthza ku Luzi ne aopo apita popepi na Ataroti, litunga lyo Maariki. ³ Ne aopo athza ku helela kukengisha kuwiko kushivaka sho Majafeleti, kokule shemwa kushivaka sho kushi thza Beti Horoni, ne ayepo athza ku Gezeri; aopo aka hulela ku likulu lwale. ⁴ Mwoliyo mweli likuñwa eli aka mukuta wa Josefa, Manase ne no Efraimi atambwelile litunga lyoo eli ahetile. ⁵ Litunga lya aka mukuta wa Efraimi, pa shikota no shikota: Mainja oshivaka shoo eshi ahetile kumuvoyuwa kuma athzile kutundelela ku Ataroti Adare kulithzela kokule ku wilu thza Beti Horoni, ⁶ ne kutunda kuya aaopo aekethza kuthza kulikululwale. Kutunda ku Mikimetati ku mutulo aopo apilukela ku muvoyuwa kukengisha kuTaanati Shilo ne aopo apita ku thsambwaaliya wenji ku muvoyuwa wa Janoa. ⁷ Ne aopo ahelela kutunda ku Janoa kuthza ku Ataroti ne aopo athza ku Naara, ne aopo akakuma ku Jeriko, ne aopo aka hulela ku Jordani. ⁸ Kutundelela ku Tapua mainja aopo a kengisha kuwiko ku kaviya ka Kana ne aopo akahulela kulikulu lwale. Sholiyo shivaka a hetile aka mukuta wa Efraimi, pa shikota no shikota, ⁹ pofochi no mambongi aa hangulile echi akale aka mukuta wa Efraimi mushi vaka eshi a hetile aka mukuta wa Manase-ma mbongi omahe, pofochi no maumbo oo. ¹⁰ Kaachithzile Makanana awa atungile mu Gezeri, mukukala kengeyo yoliyo kuwaniwela echi Makanana ana tungu mulitunga lya Efraimi kuleta no muliyuwa lyo lelolino,ambene awa anu awa kuma awakwamishangile ikwama yoikato.