¹ Kueliwa kwo litunga lyo mukuta waanu a Juda , eli awa pile kuma kwa kalile kenge pa shikota no shikota, litunga lyoo kuma lyaka kumine kumboela kumainja a Edomo, kuthza no mumbulwa kukutu thza Zini koliyo kwa kalile kwo kule nene kumboela. ² Mainja oo kumboela kuma atundelelile kuhula thzo likulu lwale lyo mungwa , kutundelela mulinema eli linatanekela kumboela. ³ Mainja oo mukuhatako kuma akengishile ku mboela wo mukinya wa Akarabimi ne no kupita kunyonga thza Zini, ne ayepo athza kukengisha ku mboela wa Kadeshi baranea, kunyonga thza Hezironi, ne aepo akanduka ku thza ku Adare, oko aopo aka shiuluka kuthza ku Karaka. ⁴ Aopo apita ku Azimoni, aopo apita muka viya ka Egepita, aepo na hulela kuli kululwale. Aa oliyo akalile mainja oo ku mboela. ⁵ Mainja oku muvo yuwa kuma akalile likulu lwale lyo mungwa, kukanwa ka Jordani. Mainja oku mutulo kuma apitile kutundelela ku linema lyo likulu lwale kukanwa ka Jordani. ⁶ Aopo athza ku Beti Hogila ne nokupita kunyonga thzo Mutulo wa Beti Araba. Aopo athza kuliwe lya Bohani mwana Rubeni. ⁷ Ne mainja ayepo akanduka kuthza ku Debire kutundelela ku mulonga wa Akore, ne aopo athza ku mutulo, aopo ashiuluka kukengisha ku Giligali, popepi no mukinya wa Adumini, ou uli kushivaka sho mboela wo mulunga. Ne mainja aopo athza kuma tatekelo omaviya aali ku Eni Shemeshi ne aopo athza ku Eni Rogele. ⁸ Ne mainja aopo athza kumulonga wa Beni Hinnomi kumboela wo mbongi thzo Majebusi (athzo , Jerusalema). Ne ayepo athza pahula thzo mukinya ou wakalile mu mulonga wa Hinomu, kuwiko, oku kwa kalile kuhula thzo mutulo wo mulonga wa Refaimi. ⁹ Nehoni mainja aopo ahenya kutunda pa wilu thzo mikinya kuthza ku matatekelo omaviya aali ku Nefoatali, ne aapo athza ku ma mbongi o mukinya wa Efroni. Ne mainja aopo akotama kuthza ku Baala (mwofochi na Kiriati Jearimu ). ¹⁰ Ne mainja aopo ali thzinguluka kuwiko wa Baala kuthza ku mukinya wa Seiri, ne aopo athza kunyonga no Mukinya wa Jearimu ku mutulo(mwofochi na Kesaloni), aopo athza ku Beti Shemeshi, aopo achinakana kuthza ku Timina. ¹¹ Mainja aopo aekethza kuthza kumutulo wo mukinya wa Ekroni , ne aopo akotama kukengisha ku Shikeronni ne aopo athza ku mukinya wa Baala, ne kutunda apo aopo athza ku Jabineele. Mainja aopo aka pwela kuli kululwale. ¹² Mainja oku wiko kuma akalile oli kululwale lyo sho kulu ne no liyaa lyalyo. Aa oliyo akalile mainja o mukuta wa Juda, pa shikota no shikota. ¹³ Mukutuleka milao thza Shinda sha moyo kwa Joshua, Joshua ayepo tambeka Kalebu mwana Jefune shikwama sho kuwanena litunga mukuta wa Juda, Kiriati Ariba, athzo, Hebroni (Ariba yoliyo wakalile tata wa Anaki ). ¹⁴ Kalebu ayepo chithza mo anaa ahatu a Anaki: Sheshai, Ahimani ne noTalimai, ekulu a Anaki. ¹⁵ Ayepo thza kukalwisha awa tungile mu Debiri( lithzina lya Debiri lyo kale kuma lyakalile Kiriati Sefere). ¹⁶ Kalebu ayepo amba echi, ''Yomuhe mukwelume oyu kalwisha Kiriati Sefare ne no kuthzi kupala, oyo kuma nimu tambeka Akisa mwanange wo mbuyama echi amuyeke akale munuwenji.'' ¹⁷ Ou Otiniele mwana Kenazi, mina Kalebu, athzikupalile, Kalebu ayepo mutambeka Akisa mwanenji echi akale munuwenji. ¹⁸ Munyima wei, Akisa ayepo keya kwa Otiniele ne ayepo namutongwela echi alombe kwa tatawenji lipya. Owu ashulukile pa shi ndonki, Kalebu ayepo mwaambela echi, ''Yiñe ofota?'' ¹⁹ Akisa ayepo tawa echi, ''oni munishe shihemo, mbechipo onanipa litunga lya Negeve: Kalo onipe no maweluwelu o meyu.'' Ne Kalebu ayepo mutambeka maweluwelu okuwilu naa opashi. ²⁰ Eshi sholiyo shivaka a hetile aka mukuta wa Juda, pa shikota no shikota. ²¹ Ma mbongi aa akalile aka mukuta wa Juda kuhuka nene mumboela, kukengisha ku mainja na Edomo, kuma akalile Kabizeeli, Ederi, Jaguri, ²² Kina, Dimona, Adada, ²³ Kedeshi, Hazori, Itinani, ²⁴ Zifi, Telemu, Bealoti. ²⁵ Hazori Hadata, Kerioti Hezironi( ethzi kalo kuma thza limukiliwile echi Hazori), ²⁶ Amami, Shema, Molada, ²⁷ Hazari Gada, Heshimoni,Beti peleti, ²⁸ Hazari Shuala, Beeresheba, Biziotia. ²⁹ Baala, Iyimu, Ezemu, ³⁰ Elitolada, Kesile, Horoma, ³¹ Zikilagi, Madimana, Sansana, ³² Lebaoti, Shilihimu, Aini, ne no Rimoni. Aa kuma akalile ma mbongi okukuma pa makumi eli na mutanu naa ne omahe pofochi, kushimbelela pofochi no maumbo oo. ³³ Mulyanda kuma kwa kalile Eshitaole, Zora,Ashina, ³⁴ Zanoa, En Ganimu, Tapua, Enami, ³⁵ Jaramuti, Adulami, Soko, Azeka, ³⁶ Shaaraimi, Aditaimi, ne no Gedera(kuamba echi, Gederotaimi). Aa kuma akalile ma mbongi likumi naane papalo, kupaka pofochi no maumbo oo. ³⁷ Zena, Hadasha, Migidala Gadi, ³⁸ Dileani, Mizipa, Jokiteele, ³⁹ Lakishi, Bozikati, Egeloni. ⁴⁰ Kaboni, Lamami, Kitilishi, ⁴¹ Gederoti, Beti Dagoni, Naama, Makeda. Aa kuma akalile ma mbongi likumi na mutanu na thzo fochi mupalo, kshimbelela pofochi no maumbo oo. ⁴² Libina, Eteri, Ashani, ⁴³ Ifita, Ashina, Nezibi, ⁴⁴ Keila, Akizibi, Maresha. Aa kuma akalile ma mbongi mutanu naane,pofochi no maumbo oo. ⁴⁵ Ekroni , ne no ma mbongi aa muthzingulukile ne no maumbo; ⁴⁶ Kutunda ku Ekroni kuthza kuli kululwale lyo sho kulu, ivaka yoihe eyi atungile eyi ya kalile popepi na Ashidodi,kupaka pofochi no maumbo oo. ⁴⁷ Ashidodi, no ma mbongi aa amuthzingulukile, pofochi no maumbo oo; Gaza, no ma mbongi aa amuthzingulukile pofochi no maumbo oo; kuka kuma ku kaviya koku Egepita, ne no kuthza ku likulu lwale lyo sho kulu no ku ñalo thzalyo. ⁴⁸ Mulitunga lyo mikinya, Shamiri, Jatir, Soko, ⁴⁹ Dana, Kiriati Sana(kutoya echi, Debiri), ⁵⁰ Anabi, Eshitemo, Animi, ⁵¹ Gosheni, Holoni, ne no Gilo. Aa kuma akalile ma mbongi likumi na yofochi, pofochi no maumbo oo. ⁵² Araba, Duma, Eshani, ⁵³ Jannimi, Beti Tapua, Afeka, ⁵⁴ Humita, Kiriati Ariba (apo kutoya echi, Hebroni), ne no Ziori. Aa kuma akalile maumbo mutanu naane, kupaka pofochi no maumbo oo. ⁵⁵ Maoni, Karimeli, Zifi, Juta, ⁵⁶ Jezireele, Jokideami, Zanoa, ⁵⁷ Kaine,Gibea, ne no Timina. Aa kuma akalile ma mbongi likumi, pofochi no maumbo oo. ⁵⁸ Haluli, Beti Zuri, Gedore, ⁵⁹ Maarati, Beti Anoti, ne no Elitekoni. Aa kuma akalile ma mbongi mutanu nayofochi, kushimbelela no maumbo oo. ⁶⁰ Kiriati Baala(apo kutoya echi, Kiriati Jearimi), ne no Raba. Aa kuma akalile ma mbongi eli, pofochi no maumbo oo. ⁶¹ Mumbulwa kukutu, kuma mwakalile Beti Araba, Midini, Sekaka, ⁶² Nibishani, mbongi thzo mungwa, ne no En Gedi. Aa kuma akalile ma mbongi mutanu nayo fochi, pofochi no maumbo oo. ⁶³ Ambene echi ku Majebusi, awa tungile mu Jerusalema, aka mukuta wa Juda kaawa chithzile mo, ne Majebusi awopo atunga mwofochi no aka mukuta wa Juda kuleta no muliyuwa lyolelo lino.