¹ Eyi yoliyo ivaka yo litunga eyo anu aka Isilaele atambulile echi ai hete mulitunga lya kanana, elyo Eleazare muprisita, Joshua mwana Nuni, ne noa aendishi oikota yo mikuta thza Isilaele awa elile. ² Ivaka yoo eyi ahetile kuma aihangulile ko loto ku mikuta mutanu na thzine ne no shipathsi sho mukuta, echi mwene elyo a tuminine Shinda sha moyo ko lyoko lya Mushe. ³ Mukonda mushe kuma atambekile ivaka echi aihete ku mikuta thzili no shipathsi sho mukuta muthsambwaaliya thza Jordani, ambene kuma Levi kaawa tambekile shivaka sho kuheta. ⁴ Mukuta wa Josefa po kuma wakalile mikuta thzili, Manase na Efraimi. Malevi kaawa tambekile shivaka shoku heta mulitunga, ambene hime ma mbongi amweya echi atunge mo, no malishelo oi munanu no itenga yo yimweya eyi ahetile. ⁵ Mbunga thza Isilaele athzopo thzikwama mwene elyo atuminine Shinda sha moyo kwa Mushe, honine awopo aela litunga. ⁶ Nehoni mukuta wa Juda awopo ukeya kwa Joshua ku Giligali. Kalebu mwana Jefune woku Kenizi, ayepo mwaambela echi, ''Wahalimuka iya ambile Shinda sha moyo kwa Mushe munu wa Nyambi mukonda woe nange ku Kadeshi Barenea. ⁷ Kuma nakalile no myaka thzo ku kuma pa makumi ane thzo ukulu ou Mushe mupika Shinda sha moyo anitumine kutundelela ku Kadeshi Barenea echi nani nenge litunga.Amepo ni muletela muthzimbu wo shemwa kalo echi mwene eli yakalile mumuchima wange ⁸ Ambene awa apange nathzile noo aletelile michima thzo mbunga kunyongolokota no wowa. Unone ame kuma nashupwelile Shinda sha moyo Nyambi wange. ⁹ Mushe ayepo lyeza mwoliya liyuwa, echi, 'Shemwa litunga eli ona kaaenda no liulu lyoe kuma wakuliheta yowe noanoe kutwalelela posho, mukonda ona shupwela Shinda sha moyo Nyambi wange kumanishelela.' ¹⁰ Nehoni, omone! Shinda sha moyo onani nyungu mwethzi myaka thzo kukuma pa makumi ane no myaka mutanu, echi mwene muya aambelile-kutunda muya mushikati shiya Shinda sha moyo aambile eli liywi eli kwa Mushe, Isilaele kushienda mumbulwa kukutu. Honi, ngomone! yame pano muliyuwa lyolelo nili no myaka thzo kukuma pa makumi mutanu naahatu no myaka mutanu thzo ukulu. ¹¹ Nishili noukolo muliyuwa lyo lelo echi mwene uya ukolo nakalile nawo mwoliya liyuwa ani tumine Mushe. Okolo wange pano mwofochi no ukolo uya nakalile nawo mwene mwo shiya shikati, wo mvo ne no kuthza no kukahuka. ¹² Nehoni oni tambeke eli litunga lyo mikinya, elyo Shinda sha moyo anikulupelishelile mwoliya liyuwa. mukonda mwo liya liyuwa wa yuvile echi Maanaki mwaali no ma mbongi oo oku uumbeliwa nawa ipaka. Kunahimi Shinda sha moyo kuma akala nange kuma niwa chithza mo, echi liya aambile Shinda sha moyo.'' ¹³ Nehoni Joshua ayepo mufuyawethza ne ayepo mutambeka Hebroni echi akale shiheta sha Kalebu mwana Jefune. ¹⁴ Nehonine Hebroni ayepo muheta Kalebu mwana Jefune wo ku Kenizi kuleta no muliyuwa lyolelo,mukonda kuma ashupwelile Shinda sha moyo kumanishelela, Nyambi wa Isilaele. ¹⁵ Lithzina lya Hebroni lyo kale po kuma lyakalile Kiriati Araba. (Araba kuma akalile mukwelume wokutunuka nene mukachi ko Maanaki.)Nehoni litunga alyopo litulumwisha ku mvo.