¹ Nehoni Joshua nakulupala nene owu Shinda sha moyo aambile kukwenji echi, '' ona kulupala nene, ambene kolishili litunga kalo lyoshokulu eli onaloela kukupala. ² Eli lyoliyo litunga lina shiyala: Matunga o mafilisita, ne nao wahe o Mageshuri, ³ kutunda Kushihori, kumu voyuwa wa Egepita, ne no kumutulo wo mainja wa Ekroni, eshi shashaalile kukala shivaka sho Makanana; mutanu o wa endishi o Mafilisita, awa akalile Mugaza, Ashidodi, Ashikeloni, Gati, no Ekroni; litunga lyo Maavi ⁴ kumboela; omahe matunga o Makanana, kutundelela ku Ara eshi shili shivaka sho Masidoni, kuthza kwo kule kukakuma ku Afeki shili mumainja o Maamori; ⁵ litunga lyo Mabibulo, no litunga lyolihe lya Lebanoni kutwala kumuvoyuwa, kutunda ku Baale Gadi kushi thzo Mukinya wa Hermoni kutwala ku Lebo Hamati. ⁶ Kalo, wahe awa atungile mulitunga lyo mikinya kutunda ku Lebanoni kutwa kwo kule ku Misirefoti Maimi, pofochi no mbunga thza Sidoni- kuma niwa chiza posho thzo mashwalale a Isilaele. Wangu amone echi waha tambeka liya litunga kwa Akaisilaele echi alihete, echi eli nakutuminine. ⁷ Muele eli litunga echi likale shivaka sho kuheta ku mikuta mutanu na thzine ne no shipathsi sho Mukuta wa Manase.'' ⁸ No shipathsi shimweya sho mukuta wa Manase, Marubeni ne no Magadi na tambula kale litunga lyoo elyo awa pile Mushe , mupika Shinda sha moyo, kumuvoyuwa wa Jordani, ⁹ kutundelela ku Aroere, oyuli pa hula thzo mandunga o liviya lya Arinoni (pofochi no mbongi ethzi thza kalile mukachi ko mandunga), kutwala no mulyanda lyolihe lya Medeba kuthza mane kwo kule ku Diboni; ¹⁰ mambongi omahe a Sihoni, fumu wo Maamori, oyu wa futile mu Heshiboni, kutwala no kumainja o Maamoni; ¹¹ Gileadi, ne no shivaka sho Mageshuri ne no Maakati, no shivaka sho shihe sho Mukinya wa Hermoni, no shivaka shoshihe sha Bashani kutwala ku Saleka, ¹² shikuña sho shihe sha Ogo mu Bashani, oyo wa futile mu Ashitaroti ne no Edrei - awa woliyo ashiyalile kuma Refaimi- Mushe ayepo wa thzilisha no kuwa chithza mo. ¹³ Ambene mbunga thza Isilaele kathza chithzile Mageshuri kemonga Maakati, nehonine Mageshuri no Maakati awopo atunga mukachi ko Maisilaele kuleta no muliyuwa lyo lelolino. ¹⁴ Kushi kuta sha Levi pohuma kwoliyo Mushe akanine kutambeka mube. Itavelo ya Shinda sha moyo, Nyambi wa Isilaele, yoku tumekela mumulilo, yoliyo yakalile yoo, echi Nyambi mwene eli atongwelile Mushe. ¹⁵ Mushe ayepo tambeka muve ku mukuta wa Rubeni, pa shikota no shikota. ¹⁶ Shivaka shoo kuma sha tundelelile ku Aroere, kuhula thzo mandunga o liviya lya Arinoni, ne no mbongi ethzi thza kalile mukachi ko mikinya, no lyanda lyolihe lya Medeba. ¹⁷ Rubeni kalo ayepo tambula Heshiboni ne no mambongi omahe aa akalile mulyanda, Diboni, ne no Bamoti Baale, ne no Beti baale Meoni, ¹⁸ ne no Jahazi, ne no Kedemoti, ne no Mefaati, ¹⁹ ne no Kiriataimi, ne no Sibima, ne no Zereti Shahare pa mukinya wo mukachi ko mikinya thzoshokulu. ²⁰ Rubeni kalo ayepo tambula Beti Peori, no muulumuko wa Pisiga, Beti Jeshimoti, ²¹ mambongi omahe omulyanda, ne no shikuña sha Sihoni wo mu Amori, oyo wa futile mu Heshiboni, oyo athzilishile Mushe pofochi no aendishi o ma Midiani,Evi, Rekemi, Zure, Hure ne no Reba, mwana wo mbuyama wa fumu Sihoni, oyu wa tungile omo mulitunga. ²² Mbunga thza Isilaele kalo thza paile no mweele Balaami mwana Beori, oyo wa kwatile shikwama shokuka, ayepo waniwa kwaanu awa paile. ²³ Mainja o mukuta wa Rubeni kuma wakalile liviya lya Jordan; aa oliyo mainja oo. eshi sho liyo shivaka ahetile aka mukuta wa Rubeni, atambekile pa shikota no shikota, no ma mbongi ne no maumbo. ²⁴ Omu mwoliyo Mushe atambekelile ku mukuta wa Gadi, pa shikota no shikota: ²⁵ Shivaka shoo kuma sha kalile Jazere, ma mbongi omahe oku Gileadi ne no shipathsi sho litunga lyo Maamoni, ku Aroere, kumuvo yuwa wa Raba, ²⁶ kutundelela ku Heshiboni kutwala ku Ramati Mizipa ne no Betonimu, kutundelela ku Mahanaimi kutwala kushivaka sha Debire. ²⁷ Ku mulonga, Mushe ayepo wa tambeka Beti Haramu, Beti Nimira, Sukoti, ne no Zafoni, ne no Shikuña shoshihe sha Sihoni fumu wa Heshiboni, ne Jordani yoliyo wakalile mainja, kutwala kuhula thzo ñalo thzo likululwale lwa Kinnereti, kumuvoyuwa muthsambwaaliya thza Jordani. ²⁸ Eshi sholiyo shivaka a hetile aka mukuta wa Gadi, pa shikota no shikota, pofochi no ma mbongi ne no maumbo oo. ²⁹ Mushe ayepo tambeka shipathsi shi mweya sho mukuta wa Manase shivaka sho kuheta. Kuma ashitepile echi shipiwe kushipathsi shimweya sho wa athsimuluhile kwa Manase, pa shikota no shikota. ³⁰ Shivaka sho kuma sha tatekelile ku Mahanaimi, shivaka sha Bashani shoshihe, Shikuña sha Ogo fumu wa Bashani, ne no ma mbongi omahe a Jaire, aa ali mu Bashani, ma mbongi makumi mutanu no likumi lyofochi; ³¹ shipathsi shimweya sha Gileadi, ne no Ashitaroti ne no Adrei (ma mbongi aakalile mu futisho thza Ogo mu Bashani) . Aa kuma aatambekile kwekulu awa thsimuluhile kwa Makiri mwana Manase - shipathsi sho mbunga thza Makiri, pa shikota no shikota. ³² Eshi sholiyo shivaka awapile Mushe echi a shihete kwali mumaanda a Moabi, muthsambwaaliya thza Jordani kumuvoyuwa wa Jeriko. ³³ Mushe kaatambekile shivaka ku mukuta wa levi echi ahete. Shinda sha moyo, Nyambi wa Isilaele, sholiyo ahetile, echi eli awa ambelile.