¹ Oyuve, owe Isilaele; lelo kenge oyavuka Jodani, kukashwana anu owangi no okolo kukupita, no mambongi ali no ipaka inathzi muwilu, ² anu owangi no ule, ana Anaki, awa olimuka no awa onayuvu anu kwa amba yo ci, 'Elye twesha kuimana pa meho o ana Anaki?' ³ Lelo olimuke ci Shinda sha moyo Nyambi woe aye yoliyo enda posho thzoe kuninga eci mulilo o lupyaya; ; kenge awamana, ne kenge awapaka kushi thzoe; ne kenge owatundisha no kuwayundisha wanguwangu, eci eli anaamba Shinda sha moyo kukwoe. ⁴ Lelo waamba mu mucima oe, munyima thza Shinda sha moyo Nyambi woe kuwatundisha pa posho thzoe, 'Kuluka kwange koliyo kunaleta ci Shinda sha moyo anilete kunashwana eli litunga,' mukonda o omango wawa anu sholiyo awatundishela Shinda sha moyo pa posho thzoe. ⁵ Mukonda kali kuluka koe nji kuloa ko mucima woe apa othza kukashwana litunga lyo, ambene omango wawa anu woliyo awatundishela Nyambi woe pa pasho thzoe, ne kalo ci akwame maywi aliethzile ko akuku oe, kwa Abrahama, Isaka, no Jakobo. ⁶ Honine olimuke, ci Shinda sha moyo Nyambi woe kakupu eli litunga lyo liwa ci olishwane mukonda o kuluka koe, mukonda mwaanu o mukanayuva. ⁷ Ovuluke ne wavulama omu waanjipishelile Shinda sha moyo Nyambi oe mu mumbulwa kukutu; kutunda liyuwa watundile mu litunga lya Engepita kuleta apa nokumena kuno ku shivaka, omu onapilukela Shnda sha moyo. ⁸ Kalo no ku Herebe omu waanjipishelile Shinda sha moyo, ne Shinda sha moyo kuma akuanjipelile nene ci amimane. ⁹ Apa nakandukile pa mukinya kukatambula matapa o mawe, matapa o umbusha ou alikwatile Shinda sha moyo nenu, kuma nakakalile pa mukinya mayuwa makumi ane (40) no mashiku makumi ane (40); kanalile ishima nji kunwa meyu. ¹⁰ Shinda sha moyo ayepo nipa matapa eli o mawe aa anañoliwa no munwe wenji; kuma nakuñoliwa enu yoihe eci omu aambelile maywi oahe aa ambile Shinda sha moyo kukwenu pa mukinya kutunda pakaci ko mulilo pa liyuwa lyo shiwano. ¹¹ Akopo kukwamahala ci kumamaneneno o ao myuwa makumi ane (40) no mashiku makumi ane (40) Shinda sha moyo ayepo nipa matapa eli o mawe, matapa o ombusha. ¹² Shinda sha moyo ayepo amba kukwange, 'Okatuke, otunde kuno oulumuke oyokolole, mukonda anu oe, awa notundisha mu Engepita analiipisha awo ashinda. Anayokolola kutunda mu likuñwa eli naniwatumena. Analikwamena shikupulo sho kunyongolokota.' ¹³ Kalo, Shinda sha moyo ayepo amba kukwange kuamba ci, 'Ninamono awa anu; anu o mukanayuva. ¹⁴ Onishiye nofoci, ne ci niwamanishe no kutundisha lithzina lyo muno mushi thzo liwilu, ne owe kenge nakukukwama anu owangi no okolo kuwapita.' ¹⁵ Ne amepo nipiluka no kuulumuka kutunda pa mukinya, ne mukinya ko uyuuma mulilo. Matapa eli o ombusha kuma akalile mu moko ange. ¹⁶ Amepo nitaneka, ne mumone, kuma mwakwamine shivi kwa Shinda sha moyo Nyambi wenu. Kuma mwaliumbelile namani. Kuma mwatundile mu likuñwa eli amitumenine Shinda sha moyo. ¹⁷ Amepo nishimba matapa eli no ku akonja mu moko ange. Amepo niapaa pa meho enu. ¹⁸ Kalo amepo niwishela lupala lwange pashi pa meho a Shinda sha moyo pa mayuwa makimi ane (40) no mashiku makumi ane (40); kanalile ishima nji kunwa meyu, mukonda o shivi shenu shoshihe eshi mwakwamine, ko kukwama yo imango mu meho a Shinda sha moyo, kumushamaethza ci aanjipe. ¹⁹ Mukonda kuma nayapile uanji no kuipela nene oku amianjipelile Shinda sha moyo ci amimane. Ambene Shinda sha moyo ayepo niyuva ko eshi shikati kalo. ²⁰ Shinda sha moyo kuma aanjipelile nene Aruni ci amupae; amepo nilombelela Aruni naye pa shikati shofoci. ²¹ Amepo nishimba shivi shenu, namani oyu mwakwamine, ne amepo nimutumeka, kumufula, no kumucothzaula no kumutwa kumkwama ounye, kupitela apa nakwamena ushunga eci likungu. Amepo nikonjela likungu lyenji mu meyu atunda ku mukinya. ²² Ku Tabara, ku Masa, no ku Kiburoti Hatava, kuma mwashangawethzile Shinda sha moyo kumuanjipisha. ²³ Shinda sha moyo apa amitumine kutunda ku Kadeshi Baranea ne ayepo amba, 'Mukanduke muthze mukashwane litunga eli ninamipa,' nehoni amwepo mupilukela shituminino sha Shinda sha moyo Nyambi wetu, ne kamwatawile nji kuteelela liywi lyenji. ²⁴ Munapilukela Shinda sha moyo kutunda liyuwa eli namilimukile. ²⁵ Ne amepo niwishela lupala lwange pashi pa meho a Shinda sha moyo mayuwa makumi ane (40) no mashiku makumi ane (40), mukonda kuma ambile ci kenge amimana. ²⁶ Amepo nilombela kwa Shinda shamoyo ne amepo niamba, 'Owe Fumu Shinda sha moyo, lelo wamana anu oe nji ashwana oe awa onayoyisha ko ukulu oe, awa onatundisha mu Engepita ko lyoko lyoe lyo likolo. ²⁷ Ovuluke apikoe Abrahama, Isaka, no Jakobo; lelo wataneka mukanayuva wawa anau, nji omango wo nji shivi sho, ²⁸ ne ci litunga omu onatutundisha aambe ci, ''Mukonda Shinda sha moyo onakwanga kuwatwala mu litunga anawakuliupelisha, kalo mukonda kuma nawathzimbi, onawatundisha kukawapaela mu mumbulwa kukutu.'' ²⁹ Unohoni awopo anu oe no ashwana oe, awa notundisha ko okolo oe oukulu no kumonisha okolo oe.'