¹ Mumamele ituminino ei nimipa lelo, ne ci muyoye no kuvula, ne muthze mukatunge mu litunga eli aliethzile Shinda sha moyo kowa tata wenu. ² Mwakuvuluke mu makuñwa oahe omu anamiendisha Shinda sha moyo Nyambi wenu mu myaka makumi ane mu mumbulwa kukutu, ci amieleke ne alimuke ei ili mu micima thzenu, ne ci kenge mumamela ituminino yenji nji kwahi. ³ Kuma amihushile kushi, ne ayepo mipaisha njala, ne ayepo milela no manna, aa namukana kulimuka naa akanine kulimuka atata wenu. Kuma akwamine kengeyo ci mulimuke ci anu kali ishima pohuma katwesha kuyoya; ambene, anu ayoya ko shinu shoshihe eshi shitunda mu kanwa ka Shinda sha moyo. ⁴ Ito yenu kanaiyatauka ne kaitundu pa ilama yenu, ne maulu enu kanatuluma omo mu myaka makumi ane (40). ⁵ Mwakuayale mu micima thzenu ci, omu, anakutululelanga munu manenji, no Shinda sha moyo naye moliyo amikutululela. ⁶ mwakutuleke ituminino ya Shinda sha moyo Nyambi wenu, ne ci mwakuende mu makuñwa enji no kumulemeka. ⁷ Mukonda Shinda sha moyo Nyambi wenu amileta mu litunga lyo liwa, litunga lyo mawa o meyu, lyo mashima no maweluwelu o meyu, aa apupa kuthza mu milonga no mukaci ko mikinya; ⁸ litunga lyo uloto no mabu, lyo vine, itondo yo feiga, no garaneti; litunga lyo itondo yo oilve no oki. ⁹ Litunga eli mwa kulya ishima ko kupila ohutu nomu mwa kukana kupila shimweya; litunga lyo mawe anakwamiwa pa shifu, omu muli mikinya ethzi mwakushima kopa. ¹⁰ Kenge mwa kulya kuikuta, ne kenge mwa kufiyawela Shinda sha moyo Nyambi wenu pa litunga lyo liwa eli anamia. ¹¹ Mumamele ci kamuvulama Shinda sha moyo Nyambi wenu, ko kukwanga kumamela ituminino yenji no milao thzenji no elaa yenji ei nimitumina lelo. ¹² Ngeci kali kengeyo, apa mulya no kuikuta, no apa muumba manjiyo oawa no kukala mo, micima thzenu kenge thzilishangala. ¹³ Mumamele ngombe thzenu no mangu enu apa avula no silivera no gauda thzenu apa ivula, no yoihe ei muli nayo apa ivula, ¹⁴ nehoni micima thzenu pohuma thzalishangala ne pohuma mwavula Shinda sha moyo Nyambi wenu, oyu wamitundishile mu litunga lya Engeita, kumitundisha mu njiyo thzo upika. ¹⁵ Lelo mwamuvulama aye oyu wamiendishile mu mumbulwa kukutu oukulu no kuyapisha, no mayoka atumeka alimo no nge thzilimo litunga lyo kukukuta lyo kupila meyu, oyu wamipunishelile meyu pa liwe lyo likolo. ¹⁶ Kuma amilelishile manna mu mumbulwa kukutu aa nakana kulimuka akuku wenu, ci amihushe pashi no kumieleka, ci kuhula amininge shuwana, ¹⁷ ambene mwatwesha kuamba mu micima thzenu ci, 'Okolo wange no okolo wo lyoko lyange yoliyo inaniwanisha loluhe olu lufumo.' ¹⁸ Ambene mwakuvuluke ci, aye yoliyo namipa okolo o kuwana lufumo, ci atanalishe ombosha ou aliethzile kowa tata wenu, eci omu kunakalela lelo. ¹⁹ Kenge kwa kukwamahala ci, ngeci amwepo muvulama Shinda sha moyo Nyambi wenu no kushupwela athzimu ao, kuwalombela, no kuwakwamena, lelo napaka kukwenu ci yoshemwa kenge mwa kufa. ²⁰ Kulipitula eci anu awa apaa Shinda sha moyo pa posho thzenu, namwe moliyo mwakufela, mukonda kamuteelelile ku liywi lya Shinda sha moyo Nyambi wenu.