¹ Shinda sha moyo Nyambi woe apa akuleta mu litunga othza kukatunga, kenge atundisha mo anu owangi awa ali mo---Ahiti, Agiregashi, Amori, Akanana, Aperizi, Ahivi, no Ajebusi--- matunga mutanu na eli oakolo no ungi kumipita. ² Shinda sha moyo Nyambi woe yoliyo wapa kukwoe ci owatweshe, ne owapaelele wahe. Lelo walikwama ombusha no, ne lelo wawamonisha shihemo. ³ Mbela waliyeka no. Mbela washekisha anoe owambuya kwa ano owakwelume, kalo anoe owakwalume mbela ayeka ano owambuyama. ⁴ Mukonda kenge aletela anoe kushiya kunilombela, ne ci alombele athzimu. Ne uanji wa Shinda sha moyo kenge ukupilukela, ne kenge akupaa wanguwangu. ⁵ Omu moliyo wakuwakwame: Wakuumbulule ma altare o, mwakupwacaule ithsini yo yo mwane kuikwama ipathsi pathsi, wakutetaule itondo ei analikombelelanga, wakutumeke ikupulo yo. ⁶ Mukonda amwe mwa mbunga ethzi thzinakenisheliwa Shinda sha moyo. Onamihangula ci mupiluke anu enji, kupita anu wahe awa ali pa kaye. ⁷ Shinda sha moyo kanamihimena nji kumihangula ci mwaangi kupita anu wamweya--- mukonda amwe po yamwe mwakalile owapu nene kupita anu wahe. --- ⁸ ambene mukonda amihima, , kalo kuma amamelile ei aliethzile kowa tata wenu. Eshi sholiyo namitundishela Shinda sha moyo mu njiyo thzo upika, kutunda ku lyoko lya Faro, fumu wo Engepita. ⁹ Honine mulimuke ci Shinda sha moyo Nyambi wenu--- yoliyo Nyambi, Nyambi o kusepahala, oyu mamela ombusha no kusepahala ku ikuta yoingi ingi awa amuhima no kumamela milao thzenji, ¹⁰ ambene awa anamuthzimba kenge awahushela omango wo, kuwaipisha; kakukala no ñeke kwawa anamuthzimbi; kenge awahushela omango wo. ¹¹ Honine mumele ituminino, milao, no elaa ei nimitumena lelo, ci mwakuikwame. ¹² Ngeci amwe po muteelela ei elaa, ne amwepo muimamela no kuikwama, pohuma Shinda sha moyo Nyambi wenu naye kenge akumamela ombusha o kusepahala ei aliethzile kowa tata wenu. ¹³ Kenge amihima, kenge amifiyawela, kalo kenge amivulisha. Kenge afiyawela ana awa mueleka, kenge afiyawela ilya ei mulima--- oheke wenu, waine wenu omupe, no maathzi enu o olive---manamani o ngombe thzenu no manguana o mangu enu mu litunga eli aliethzile kowa tata wenu ci kenge alimipa. ¹⁴ Kenge mwakufiyaweliwa kupita anu wahe; kakwa kukala mukwelume o kukana kueleka nji mbuyama okukana kueleka mukaci kenu nji mukaci ko emunanu yenu. ¹⁵ Shinda sha moyo kenge atundisha ikola yoihe kukwenu; kwithsa mawethzi oamango o mu Engepita a munalimuka aa akupakiwa kukwenu, ambene kenge akuapaka kwa anu wahe awa anamithzimbi. ¹⁶ Kenge mwakumana anu wahe awa amipa Shinda sha moyo Nyambi wenu, ne meho enu kakuwayuvela ñeke. Kamwakulombela athzimu o, mukonda eyo yoliyo yakupiluka kahsaka kukwenu. ¹⁷ Ngeci owepo aamba mu mucima oe ci, 'Awa anu anavulu nene kunipita; ngepi nitwesha kuwatundisha?' --- ¹⁸ lelo wawayapa; ovuluke ei akwamine Shinda sha moyo Nyambi woe kwa Faro noku Engepita yomuhe; ¹⁹ likando lyo likulu eli namono meho oe, imonisha, ikomokisha, lyoko lyo likolo, no lyoko lyo kuoloka ei nakutundisha nayo Shinda sha moyo Nyambi oe mu Engepita. Shinda sha moyo Nyambi woe kenge akukwama kengeyo kwa anu wahe awa oyapa. ²⁰ Nekalo, Shinda sha moyo Nyambi wenu kenge akutuma moo mukaci ko ci thzikawalwishe, kutwala apo awa anashiyala ko nawa analiholeka apa akapwela pa meho enu. ²¹ Kamwakuwayapa, mukonda Shinda sha moyo Nyambi wenu oli mukaci kenu, Nyambi o mukulu no kuyapisha. ²² Shinda sha moyo Nyambi wenu kenge atundisha awo anu pa meho enu mu uonye mu uonye. Kamwakuwamana wahe a shikati shofoci, apa kukana kukwamahala kengeyo iyama yo mu mulundu ei inamithzinguluka nga kenge ivula kumipita. ²³ Ambene Shinda sha moyo Nyambi wenu kenge akumipa kuwatwesha apa muliwana no mu mvo; kenge akuwalyanganisha nene kutwala apa akupaeliwa. ²⁴ Kenge akupaka mafumu o mushi thzenu, ne kenge mwakumana mathzina o mushi thzo kaye. kwithsa oyu wakutwesha kuimana pa osho thzenu, kutwala apa mwakuwapaela. ²⁵ Kenge mwakutumeka ikupulo yo kuyuwa yo athzimu o--- lelo mwakumbwethza silivera nji gauda ethzi anaithsiki peulu no kuthzishimba, mukonda ngeci amwepo muishimba, kenge ipiluka kashaka aka kamilwisha--- mukonda ya mathzilo kwa Shinda sha moyo Nyambi wenu. ²⁶ Kwamakuleta yo mathzilo mu manjiyo enu no kuilombela. Kenge mwakushikana no kushithzimba, mukonda shinaloisheliwa kuipishiwa.