¹ Honi ei yoliyo ituminino, milao, no elaa ei ananitumina Shinda sha moyo ci nimifundishe, neci mukathzimamele mu litunga muyavukela musambwa lya Jodani ci mukatunge mo; ² ne ci mukuteke Shinda sha moyo Nyambi wenu, ko kumamela milao thzenji thzothzihe noituminino ei nimitumina pano--- amwe, anenu, no ana a anenu, mu mayuwa enu okuyoya oahe, ci mayuwa enu avule. ³ Honine othziteelele, Isilaele, ne othzimamele, ci inu ikuendele shuwana, ci mukavule nene, mu litunga omu kupupa mahwe no oki, eci eli anamikulupelisha Shinda sha moyo, Nyambi owa tata wenu, ci moliyo akukwamena. ⁴ Oteelele, Isilaele: Shinda sha moyo Nyambi wetu, Shinda sha moyo po yofoci. ⁵ Ohime Shinda sha moyo Nyambi woye ko mucima woye ouhe, ko moyo woye ouhe, no ko okolo woye ouhe. ⁶ Maywi aa nikutumina lelo akale mu mucima woye; ⁷ ne wakuafundishe anoe; oambe apa okala mu njiyo thzoe; oambe apa oenda mu likuñwa, oambe apa olala, oambe apa opinduka. ⁸ Oaange ku lyoko lyoe ci apiluke shimonisha, ne kenge apiluka sho kuvata pa lupala mukaci ko meho oe. ⁹ Wakuañole pa itondo yo kushikwalo sho kuniyo thzoe no pa mashelo oku lilapa lyoe. ¹⁰ Shinda sha myo Nyambi woe apa akuleta mu litunga eli aliethzile kowa tata oe, kwa Abrahama, kwa Isaka, no kwa Jacob, ci kenge alikupa, eli lili no mambongi oakulu no uwa nene aa onakana kuumba, ¹¹ no manjiyo anayala enu yoiwa yoihe ei onakana kukwama, mashima aa onakana kushima, ilwa yo veine no itonda yo oilve ei onakana kukuna, kenge wakulya kuikuta--- ¹² nehoni omamele ci kovulama Shinda sha moyo, oyu nakutundisha mu litunga lya Engepita, kukutundisha mu njiyo thzo upika. ¹³ Okuteke Shinda sha moyo Nyambi woe; aye yoliyo wakulombela, ne kenge wakuliethza ko lithzina lyenji. ¹⁴ Lelo walombela athzimu ao, athimu o anu awa anamithzinguluka--- ¹⁵ mukonda Shinda sha moyo Nyambi woe oyu li mukaci kenu po Nyambi o lifupa---ngeci okwame kengeyo, uanji wa Shinda sha moyo Nyambi oe kenge ukupilukela ne kenge akupaa kukutundisha pa kaye. ¹⁶ Lelo waeleka Shinda sha moyo Nyambi woe eci eli mwamuelekile ku Masa. ¹⁷ Omamele nene ituminino ya Shinda sha moyo Nyambi woe, ituminino yenji, no milao thzenji, ethzi anamitumina. ¹⁸ Okwame enu inaloo no uwa mu meho a Shinda sha moyo, ci enu ikuendele shuwana, ne ci kalo othze okatunge mu litunga eli aliethzile Shinda sha moyo kowa tata oe, ¹⁹ kutundisha mo akwethzimbo yenu wahe awa ali mo, eci eli aambile Shinda sha moyo. ²⁰ Mwanoe apa akuipula ku shikati shikeya kuposho, ci, ''Ipi ituminino, milao, no ituminino imweya yo umbusha ei amituminine Shinda sha moyo Nyambi wetu?' ²¹ Nehoni wakuambele mwanoe ci, 'Kuma twakalile apika a Faro mu Engepita; Shinda sha moyo kuma atutundishile mu Engepita ko lyoko lyo likolo, ²² kalo kuma amonishile imonisha no ikomokisha, yoikulu nene, mu Engepita, kwa Faro, no kwa aka njiyo thzenji wahe pa meho eto, ²³ ne ayepo tutundisha mo, kutuleta, kunatupa litunga eli aliethzile kowa tata wetu. ²⁴ Shinda sha moyo kuma atutuminine ci tumamele ethzi milao shikati shoshihe, tuyape Shinda sha moyo Nyambi wetu, ci atunyunge eci eli tuli lelo. ²⁵ Ngeci kenge tumamela ethzi milao pa meho a Shinda sha moyo Nyambi wetu, eci eli anatutumina, oku koliyo piluka kuluka kwetu.'