¹ Mushe ayepo isha anu wahe o Isilaele no kuwaambela ci, ''Isilaele, oteelele, ku milao no ituminino ei niambela mu matwi enu lelo, ne ci mulifundishe thzo no kuthzimamela. ² Shinda sha moyo Nyambi wetu kuma aliangile o mbusha netu ku Horebe. ³ Shinda sha moyo kaliangile ou ombusha nowa kuku wetu, ambene onaulianga netu, twahe atwe tuyota lelo. ⁴ Shinda sha moyo kuma aambile nenu ko munalitanekela pa mukinya kutundelela pakaci ko mulilo ⁵ (kuma nemanine mukaci ka Shinda sha moyo nenu ko shiya shikati, kumiambela liywi yenji; mukonda amwe kuma mwayapile mukonda o mulilo, ne kamwakandukile pa mukinya). Shinda sha moyo ayepo amba, ⁶ ''Yame Shinda sha moyo Nyambi wenu, oyu namitundisha mu litunga lya Engepita, kutunda mu njiyo thzo upika. ⁷ Lelo wakala no athzimu wamweya shime yame. ⁸ Lelo walikwamena shikupulo sho kuyuwa nji shinu shoshihe eshi shipitula eshi shili muwili kuwilu, nji eshi shili mu kaye mushi, nji eshi shili mu meyu kushi. ⁹ Lelo washikinyamena nji kushikwamena, mukonda ame, Shinda sha moyo Nyambi woe, no Nyambi o lifuta. Napaka ekulu mu kashitiko ko omango wa akuku wo, kutwala ku shikuta sho mushihatu neshi sho mushine kwawa ananithzimbi, ¹⁰ ne namonisha shihemo ku ikuta yawa anihima no kumamela ituminino yange. ¹¹ Wapepisha lithzina lya Shinda sha moyo Nyambi woe, mukonda Shinda sha moyo kakuhamula mulandu wa munu oyu pepisha lithzina lyenji. ¹² Omamele liyuwa lyo Sabata kulikwama lyo kukena, eci eli nakutumina Shinda sha moyo Nyambi woe. ¹³ Pa mayuwa mutanu na lyofoci (6) okwame ekwama yoye yoihe; ¹⁴ ambene liyuwa lyo mushitanu no mayuwa eli (7) po Sabata thza Shinda sha moyo Nyambi woe. Kukwalyo lelo wakwama shikwama shipi nji shipi---owe, nji mwanoe o mukwelume, nji mwanoe o mbuyama, nji mupikoe o mukwelume, nji mupkoe o mbuyama, nji pulu oe, nji shindongi shoe, nji shiyama shipi nji shipi ku iyama yoye, nji mwenda oyu li mu njiyo thzoe. Ei po ili kengeya ci mupikoe o mukwelime no mupikoe o mbuyama naye aitulumwishe eci eli olitulumwisha yowe. ¹⁵ Ovuluke ci kuma wakalile o mupika mu litunga lya Engepita, ne Shinda sha moyo Nyambi woe ayepo kutundisha mo ko lyoko lyo likolo no lyoko lyo kuoloka. Honine Shinda sha moyo Nyambi woe onakutumina kumamela liyuwa lyo Sabata. ¹⁶ Olemeke tata woe na mama woe, eci eli nakutumina Shinda sha moyo Nyambi woe ci okwame, ci oyoye shikati shoshile mu litunga eli anakupa Shinda sha moyo Nyambi woe, ne ci kalo enu ikuendele shuwana. ¹⁷ Lelo wapaa. ¹⁸ Lelo walembeka. ¹⁹ Lelo waithza. ²⁰ Lelo wapaka opaki o tumbako kwa mwapoe. ²¹ Lelo wafela mbamba munu wa mwapoe, lelo wafela mbamba njiyo thza mwapoe, shilwa shenji, nji mupikenji o mukwelume nji mupikenji o mbuyama, pulu wenji nji, shindongi shenji, nji shinu shoshihe sha mwapoe.' ²² Aa maywi Shinda sha moyo kuma aambile ko liywi lyoshokulu kukwenu mwahe pa mukinya kutundelela pakaci ko mulilo, ,no mu livui, no mu milema thzo thzikulu; kapakileko maywi amweya kalo. Kuma aañolile pa mapala eli o mawe ne ayepo nipa o. ²³ Ne, apa mwayuvile liywi ko litunda pakaci ko milema, mukinya koupya, amwepo muhenyena kukwange---akulu enu wahe na akakuendisha ikuta yenu wahe. ²⁴ Amwepo muamba, 'Omone, Shinda sha moyo Nyambi wetu onatumonisha kutethzima kwenji no okulu wenji, ne tunayuvu liywi lyenji kutundelela pakaci ko mulilo; lelo tunamono ci Nyambi apa aamba na anu, atwesha kuyoya. ²⁵ Ambene ine tufela? Mukonda ou mulilo oshokulu kenge utumana; ngeci tuyuve liywi lya Shinda sha moyo Nyambi wetu kalo, kenge tufaa. ²⁶ Mukonda elye kalo kwa anu wahe kutundishako atwe oyu nayuvu iywi lya Nyambi oyu yoya ko liamba kutunda pakaci ko mulilo ne ayoya, eci eli tunakwama? ²⁷ Owe, othze ne okateelele ku enu yoihe ei aamba Shinda sha moyo Nyambi wetu; notutongwele enu yoihe ei aka kuambela Shinda sha moyo Nyambi wetu; kenge tuiteelela ne kenge tuilandelela.' ²⁸ Shinda sha moyo kuma ayuvile maywi enu apa mwaambile kukwange. Ayepo aamba kukwange, 'Ninayuvu maywi oo awa anu, ei anaamba kukwoe. Ei anaamba inaloo. ²⁹ Oho, nga ali no micima thzo kengeya, nga anilemeka kukwatelela no kumamela milao thzange thzothzihe, enu nga yawaendela shuwana no kuendela shuwana ano kokukana kupwa! ³⁰ Othze okawaambele ci, ''Muhuke ku matande enu.'' ³¹ Ambene owe, oimane apa nange ne nikutongwela ituminino yoihe, milao, no elaa ei okawafundisha, ci akaimamele mu litunga eli niwapa ci akalitunge.' ³² Honine, mumamele, ei anamitumina Shinda sha moyo Nyambi wenu; lelo mwahuka ku lyoko lyo shilyo nji ku lyoko lyo shimoho. ³³ Muende mu makuñwa aa anamitumina Shinda sha moyo Nyambi wenu, ci muyoye, ne kalo enu imiendela shuwana, ne kalo mayuwa enu o kuyoya mu litunga mukatunga abule.