¹ Honi, Isilaele, oteelele ku milao no ituminino ei nikufundisha, ci muikwame; ci muyoye ne muthze mo no kukatunga mu litunga eli amipa Shinda sha moyo, Nyambi wa tata wenu. ² Lelo mwapaka ko maywi amweya ku maywi aa nimitumina, nji kutundisha ko maywi, ci mumamele ituminino ya Shinda sha moyo Nyambi wenu ei nimitumina. ³ Meho enu anamono ei akwamine Shinda sha moyo mukonda wa Baale Poeri; mukonda akwelume wahe awa ashupwelile Baale oku Poeri, Shinda sha moyo Nyambi wenu kuma awapaile kuwatundisha mukaci kenu. ⁴ Ambene amwe mwakalelelile kwa Shinda sha moyo mwayoya no lelo, mwaheno. ⁵ Mumone, ninamifundisha milao no ituminino, eci eli nanitumina Shinda sha moyo Nyambi wange, ei muloela kukakwama mu litunga muthza ci mukalitunge. ⁶ Honine muimamele kalo muikwame; mukonda ou po woliyo onyanyami wenu no kuyuvishisha kwenu mu meho a anu wahe awa akuyuva thzothzihe ethzi milao, ne kenge aamba, 'Yoshemwa awa anu owangi a kunyanyama no kuyuvishisha.' ⁷ Mukonda wapi anu wamweya owangi awa ali no nyambi oyu li po pepi no, eci Shinda sha moyo Nyambi wetu popahe apa tuishela kukwenji? ⁸ Wapi anu wamweya owangi awa ali no milao no ituminono yo kuluka eci ouhe ou mulao nimipa lelo? ⁹ Mumamele pohuma no kulinyunga shuwana, ci lelo mwavulama enu ei anamono meho enu, ci lelo yatunda mu micima thzenu mu mayuwa enu okuyoya oahe. Muifundishe anenu na ekulyenu. ¹⁰ Pa liyuwa liya mwaimanine pa posho thza Shinda sha moyo Nyambi wenu ku Horebe, Shinda sha moyo apa aambile kukwange ci, 'Oniwanekele anu, ne kenge niwakwama kuyuva maywi ange, ci alifundishe kuniyapa mu mayuwa o kuyoya pa kaye oahe, ne afundishe ano.' ¹¹ Amwepo muhenyena no kunemana kushi thzo mukinya. Mukinya aopo upya mulilo mushi kukakuma kuwilu, no milema, no livui, no milema thzoshokulu. ¹² Shinda sha moyo ayepo amba nenu kutundelela pakaci ko mulilo; mwayuvile liywi no maywi alyo, ambene kwithsa eshi mwamonine; kuma mwayubvile liywi pohuma. ¹³ Ayepo miambela ombusha wenji ou namitumina ci mukwame, athzo milao thzo likumi (10). Kuma nathziñolo pa mapala eli o mawe. ¹⁴ Shinda sha moyo kuma anituminine ko shiya shikati ci nimifundishe ethzi milao, ne ci mukathzikwame mu litunga omu muyavukela kukatunga mo. ¹⁵ Ne mulinyunge shuwana---mukonda kwithsa eshi mwamonine pa liyuwa eli aambile Shinda sha moyo kukwenu ku Horebe kutundelela pakaci ko mulilo--- ¹⁶ ci lelo mwaliangela mwashinda ko kuliyuwela shikupulo sho shiumbiwa shipi nji shipi, sho kupitula mukwelume nji mbuyama, ¹⁷ sho kulipitula no shiyama shipi nji shipi sho mu kaye nji sho kulipitula no shinyunyi shipi nji shipi sho mando sho kuunduka muwilu, ¹⁸ sho kulipitula no shinu shoshihe sho kukokawa pashi, nji sho kulipitula no ethsi yupi nji yupi oyu li mu meyu mushi thzo kaye. ²⁰ Lelo mwayelulela meho enu kuwilu no kutaneka ku liyuwa, ngonda nji matungwethzi--- enu yoihe ei yakala muwilu---ne mutunde ku kuilombela no kuilemeka--- enu ei anapa Shinda sha moyo Nyambi wenu kwa anu wahe awa ali mushi thzo liwilu. ¹⁹ Ambene Shinda sha moyo onamishimbi no kumitundisha mu mulilo o kunyongoloisha ifu, kutunda mu Engepita, ci mukale kukwenji anu enji shemwa, eci eli muli lelo. ²¹ Shinda sha moyo kuma anianjipelile mukonda wenu; kuma aliethzile ci kana kuyavuka Jodani, kalo ci kana kukengena mu litunga lyo liwa eli anamipa Shinda sha moyo Nyambi wetu ci mukalishwane. ²² Ambene, ame nafela muno mu litunga lino; kaniyavukela musambwaliya lyo Jodani. Ambene amwe kenge muyavuka no kukatunga muya mu litunga lyo liwa. ²³ Mupakeko maano mwashinda, ne lelo mwavulama ombusha wa Shinda sha moyo Nyambi wenu, ou akwamine nenu, ci mulikwamene shikupulo sho kuyuwa sho kupitula shiumbiwa shpi nji shipi eshi anamikanisha Shinda sha moyo Nyambi wenu ci lelo mwashikwama. ²⁴ Mukonda Shinda shamoyo Nyambi wenu po mulilo utumeka, Nyambi o lifupa. ²⁵ Apa mwakukala na ana na ekulu, no apa mwakukala mulitunga shikati shoshile, ne ngeci amwepo muliipisha amwe mwashinda ne amwepo mulikwamena shikupulo sho kuyuwa sho kupitula shinu shoshihe, ne amwepo mukwama yoimango mu meho a Shinda sha moyo Nyambi wenu, kumushethza kumuanjipisha--- ²⁶ nesha liwilu no kaye ci ipiluke mapaka ange lelo ci panopano mukapwe mu litunga muthza musambwa lyo Jodani kukatunga mo; kamwakukakala mo mayuwa oangi, ambene mwahe kenge mukapwa kuapaiwa. ²⁷ Shinda sha moyo kenge akumiletela kulihanda mukaci ka anu, ne kenge mwakushiyala mwaapu mukaci ko anu, oku akumitwala Shinda sha moyo. ²⁸ Oko kenge mwakukwamena athzimu, ekwama yo moko a anu, etondo no mwe, ei ikana kumona, kuyuva, kulya, nji kunukelela. ²⁹ Ambene omo moliyo wakufota Shinda sha moyo Nyambi oe, ne kenge wakumuwana, apa omufota ko mucima oe ouhe no moyo woe ouhe. ³⁰ Apa muingena mu ukalu, nopa ei enu yoihe apa ikeya kukwenu, omo mayuwa o kuhula kenge muhuka kwa Shinda sha moyo Nyambi wenu ne kenge muteelela liywi lyenji. ³¹ Mukonda Shinda sha moyo Nyambi wenu po Nyambi o shihemo; kakukwanga kumikwathsa nji kumipaa, nji kuvulama ombusha wa a tata wenun ou aliethzile kukwo. ³² Mwipule honi yo mayuwa o kukale, aa akalileko shikati shenu koshishime kwiya, kutatekela liyuwa Nyambi aombile munu pano pa kaye, muipule kutatekela ku mahulelo o liwilu kutwala ku mahulelo amweya, ci kwatangile kukala shinu shimweya shoshokulu eci eshi, nji shinu shimweya sho kulipitula nasho shayuvahalile? ³³ Kwakalile anu awa ayuvile liywi lya Nyambi koamba kutundelela mukaci ko mulilo, eci eli namuyuvu, ne ayoya? ³⁴ Nji Nyambi waelekile kuthza kukalishimbela anu kuwatundisha mukaci ko anu wamweya ko kulwa , ko emonisha, ko ikomokisha, nji ko mvo, no, ko lyoko lyo likolo, nji ko lyoko lyo kuolola, no kuyapisha ko kukulu nene, eci ei akwamine kukwenu Shinda sha moyo Nyambi wenu pa meho akwa Engepita? ³⁵ Amwe po kuma namumoshiwa ei enu, ci mulike ci Shinda sha moyo po Nyambi, ne kwithsa yumweya shime aye. ³⁶ Onamiyuvisha liywi lyenji kutundelela muwilu, ci amitumine; pano pa kaye namimonisha mulilo wenji oshokulu; kuma mwayuvile maywi enji kutundelela pakaci ko mulilo. ³⁷ Mukonda kuma ahimine atata wenu, ayepo hangula ekulyo munyima thzo, ne ayepo mitundisha mu Engepita ko kumonahala kwenji, ko okolo wenji oukulu; ³⁸ ci atundishe kukwenu anu owangi no okolo kumipita, no kumileta, kunamipa litunga lyo ci mulishwane, eci omu kunakalela lelo. ³⁹ Honine lelo mulimuke, no kupaka mu micima thzenu, ci Shinda sha moyo po yoliyo Nyambi li muwiu kuwilu no pakaye nushi; kwithsa yumweya kalo. ⁴⁰ Mumamele milao thzenji no ituminino yenji ei nimitumina lelo, ci muyoye shuwana na anenu awa akeya munyima thzenu, ne ci kalo mayuwa enu o kuyoya mu litunga anamipa Shinda sha moyo Nyambi wenu alepe kokukana kupwa.'' ⁴¹ Nehoni Mushe ayepo hangula mambongi ahatu ku muveyuwa wa Jodani, ⁴² ci munu yomuhe acilele ko ku thzimweya thzaa mambongi ngeci onapaa mungenjenji munu ko kukakana kuhima, ne oyu munu kali mukwa shithzimbo shenji ku mayuwa oku kunyima. Ko kucilela ku mbongi thzimweya kwao mambongi, pohuma ayoya. ⁴³ Neli: Bezeri mu mumbulwa kukutu, litunga lyo lyanda, lya Rubeni; Ramoti mu Giliadi, mbongi thza Gadi; no Golani mu Bashani, thza Manase. ⁴⁴ Ou oliyo mulao ou apile Mushe kupa ana Isilaele; ⁴⁵ Ei yoliyo ituminino yo umbusha, milao, no elaa ei aambile kwa ana Isilaele apa atundile mu Engepita, ⁴⁶ kwali ku muvo yuwa wa Jodani, mu mulonga kulitanekala na Beti Poeri, mu litunga lya Sihoni, fumu wa Amori, oyu watungile ku Heshiboni, oyu atweshile Mushe na ana Isilaele apa atundile mu Engepita. ⁴⁷ Awopo ashimba litunga lyenji ci likale lyo, no litunga lya Ogi fumu o Bashani---awa, mafumu eli o Amori, awa akalile mu sambwa lya Jodani ku muvo yuwa. ⁴⁸ Eli litunga kuma lyatatekelile ku Aroeri, munganga thzo mulonga wo Arinoni, kukakuma ku mukinya wa Siyoni (nji Mukinya wa Herimoni), ⁴⁹ no kushimbelela no lyanda lyo mulonga o lwale lo Jodani, ku muvo yuwa musambwa lya Jodani, kutwala ku likulu lwale lo Araba, kukakuma ku ulumukelo wo mukinya wa Pisiga.