¹ Nehoni atwepo tupiluka no kuthza ku Bashani. Ogi, fumu wa Bashani, ayepo keya kunatulwisha, aye na anu enji wahe, kunalwela ku Ederei. ² Shinda sha moyo ayepo aamba kukwange, 'Lelo wamuyapa; mukonda ninakupa kumutwesha ne ninapaka anu enji wahe no litunga lyenji mushi thzoe ci oliendishe. Kenge omukwama eci omu nokwamena kwa Sihoni, fumu wa Amori oyu watungile ku Heshiboni.' ³ Ne Shinda sha moyo Nyambi wetu ayepo tupa ñanyo thzo kutwehsa Ogi fumu wa Bashani, ne anu enji wahe awopo apakiwa mu moko etu. Atwepo tuwapaa wahe kupila shianga munu yofoci okupanduka oyu washiyalile kukwenji. ⁴ Atwepo tushimba mambongi enji oahe ko esho shikati. Kwithsa shianga mbongi thzofoci ku mambongi makumi mutanu no mambongi likumi (60) ethzi natukana kuwanyanga---litunga lyolihe lya Arigobo, shikuña sha Ogi mu Bashani. ⁵ Aa mambongi neli akuthzingulukisha epaka yo mamota oale, mashelo, no mihanda; kupaka po maumbo oangi okupila epaka. ⁶ Atwepo tuwapaelela wahe, eci eli twakwamine kwa Sihoni fumu wa Heshiboni, kupaelela mu mbongi oahe---akwelume na ambuyama na anuke. ⁷ Ambene emunanu yoihe no mambongi enepishiwa kuma twaishimbile mu mvo. ⁸ Ko esho shikati kuma twashimbile litunga mu moko o mafumu eli o Amori, awa akalile musambwa lyo lwale lo Jodani, kutunda ku mulonga wo Arinoni kukakuma ku mukinya wa Herimoni ⁹ (Mukinya wa Herimoni waishiwa ci Sirioni ko Asidoni, ne Amori awo auisha ci Seniri) ¹⁰ no mambongi oahe omu lyanda, Giliadi yomuhe, no Bashani yomuhe, kukakuma ku Seleka na Ederei, mambongi o shikuña sha Ogi mu Bashani.'' ¹¹ (Mukonda oliyo mahulelo a Rafaimi, shime Ogi fumu wa Bashani yofoci pohuma yoilyo washiyalile. Mumone! olili wenji wa shifu. Kali mowakalile mu Raba, oku anatungu ekulya Amoni? Neli wa moko mutanu no moko ane (9) mu ule no moko ane mu wipi, omu anatepelanga anu.) ¹² Litunga twashimbile ci likale lyetu shiya shikati---kutatekela ku Aroeri, eli lili ku mulonga o Arinoni, no shipathsi sho litunga lyo mikinya lya Giliadi, no mambongi alyo---amepo nilipa Arubeni no Agadi. ¹³ Eshi shashiyalile ku Giliadi no Bashani yomuhe, shikuña sha Ogi, amepo nishipa ku licika lyo shikuta sha Manase. (Shivaka shoshihe sho Arigobo mu Bashani neli shaishiwa ci litunga lya Refaimi. ¹⁴ Jairi, mwikulwa Manase, ayepo shimba shivaka shoshihe sha Arigobo kukakuma ku maenja a Ageshuri no Amaakati. Ayepo ta eli litunga, no Bashani, ko lithzina lyenji, Havoti Jairi, lyoliyo lilimukiwa no lelo.) ¹⁵ Amepo nipa Giliadi kwa Makiri. ¹⁶ Ku shikuta sha Rubeni no kushikuta sha Gadi nawapile litunga lyo kutatekela ku Giliadi kukakuma ku mulonga wa Arinoni---pakaci ko mulonga oliyo maenja o litunga---ne ku lwale lo Jaboki, oliyo maenja no ekulwa Amoni. ¹⁷ Maenja alyo amweya po lyanda lyo lwale lo Jodani, kutunda ku Kinereti kukakuma ku likulu lwale lwa Araba (alyo, likulu lwale lo mungwa) kuulumuka ku mukinya o Pisiga ku muvoyuwa. ¹⁸ Ko shiya shikati kuma namituminine, kuamba ci, 'Shinda sha moyo Nyambi wenu onamipa eli litunga ci likale lyenu; amwe, akwelume o mvo wahe, kenge mutanga kuyavuka kwa apenu ana Isilaele komunashimbi ilwisho. ¹⁹ Ambene anu wenu, anenu, no emunanu yenu (nalimuka ci muli no emunanu yoingi), kenge ishiyala mu mambongi aa ninamipa, ²⁰ kukakuma apo Shinda sha moyo akutulumwishela apenu, eci eli nakwama kukwenu, kukakumena nawo apa akuwanena litunga eli anawapa Shinda sha moyo Nyambi wenu kusambwa lyo lwale lo Jodani; apo mbeci muhuke, mukwelume no mukwelume kukwenu, ku lufumo olu ninamipa.' ²¹ Kuma natuminine Joshua ko shiya shikati, kumuambela ci, 'Meho oe anamono yoihe ei anakwama Shinda sha moyo Nyambi wenu kwawa mafumu eli; Shinda sha moyo kenge akukwama kengeyo kokuhe ku ikuña mwakuthza. ²² Kamwakuiyapa, mukonda Shinda sha moyo Nyambi wenu yoliyo wakumilwela.' ²³ Kuma nalombile kwa Shinda sha mouyo ko shiya shikati, kumulomba ci, ²⁴ 'Owe Fumu Shinda sha moyo, onatateka kumonisha mupikoe ukulu oe no lyoko lyoe lyo likolo; mukonda elye nyambi yumweya oyu li muwilu nji mukaye oyu twesha kukwama ekwama ei onakwama no okolo o kulipila no ekwama yoye? ²⁵ Onitawethze niyabuke, nakulomba, ci nikamone litunga lyo liwa eli lili musambwaliya lyo lwale lo Jodani, liya litunga lyo liwa lyo mikinya, kalo no Lebanoni.' ²⁶ Ambene Shinda sha moyo kuma anianjipelile mukonda wenu; kaniteelelile. Shinda sha moyo ayepo amba kukwange, 'Kunakwana kukwoe---mbela wahukela kuamba nange kalo yo ei iamba: ²⁷ Othze peulu thzo mukinya o Pisiga ne okayelule meho oe otaneke ku wiko, ku mutulo, ku mboela, no ku upa; otaneke no meho oe, mukonda kowa kuyabuka lwale lo Jodani. ²⁸ Unohoni, otumine Joshua ne omuotelele no kumutanalisha, mukonda yoliyo wakuenda anu posho kuthza musambwa, ne yoiliyo wakuwaletela kushwana litunga eli okamona.' ²⁹ Ne atwepo tukala mu mulonga musambwa lyo Beti poeri.