¹ Nehoni atwepo tupiluka no kuthza muendo wetu okuthza mu mumbulwa kukutu ko likuñwa lipita ku likulu lwale lyo likihu, eci eli aambile Shinda sha moyo kukwange; twaendile kuthzinguluka mukinya o Seiri mayuwa oangi. ² Shinda sha moyo ayepo amba kukwange, kuamba ci, ³ 'Munathzihama nene ko muthzingulu ou mukinya; mupiluke ne muhuke ku mutulo. ⁴ Otumine awa anu, owaambele ci, ''Mupite thzo maenja a apenu, ekulyaa a Isau, awa anatungu mu Seiri; kenge amiyapa. Honine mumele ⁵ lelo mwalwa no, mukonda kanakumipa litunga lyo, liombo, shianga poshoonye po kulyata liulu lyofoci pohuma; mukonda ninapa mukinya wa Seiri kwa Isau ci ukale wenji. ⁶ Kenge muula ilya kukwo ko mali, ci mulye; kalo kenge muula meyu kukwo ko mali, ci munwe. ⁷ Mukonda Shinda sha moyo Nyambi wenu onamifiyelwa mu ekwama yo moko enu yoihe; onalimuka kuenda kwenu mu mumbulwa kukutu oukulu. Mukonda omu mu myaka makumi ane (40) Shinda sha moyo Nyambi wenu onakala nenu, ne kwaithsa eshi namupili.''' ⁸ Ne atwepo tupitelela apetu, ekulya a Isau, awa natungu mu Seiri, kushiya likuñwa lyo Araba, kushiya Elati no kushiya Ezioni Gebere. Nehoni atwepo tupiluka no kupita likuñwa lyo mumbulwa kukutu wa Moabi. ⁹ Shinda sha moyo ayepo amba kukwange, 'Lelo mwashupa, kalo lelo mwalwa no mu mvo. Mukonda kanakumipa litunga lyenji ci likale lyenu, mukonda ninapa Ari kwa elkuya Lota ci likale lyo.' ¹⁰ (Ameimi awa atangile kutunga mo anu okutunuka, owangi, no ule eci Anakimi; ¹¹ awa kalo kuma nalimukiwa ci woliyo Refaimi; ambene Amoabi kuma nawishanga ci woliyo Ameimi. ¹² Ahori nawo kuma atangile kutunga mu Seiri, ambene ekulya Isau awopo awacithza mo. Awopo awapaa no kukala mu shivaka sho, eci eli nakwama ana Isilaele ku litunga lyo eli nawapa Shinda sha moyo.) ¹³ '''Honi mukatuke muthze mukayavuke ka lwaleana ko Zeredi.' Ne atwepo tuyavuka ka lwaleana ka Zeredi. ¹⁴ Honi mayuwa okutunda ku Kadeshi Banea kunakuama apa natuyavukela ka lwaleana ka Zeredi, neli myaka makumi ahatu no myaka mutanu na thzihatu (38) Neli ko esho shikati esho akwelume atwesha kulwa kwanapu kufa, eci eli aliethzile Shinda sha moyo kukwo. ¹⁵ Ne kalo lyoko lya Shinda sha moyo kuma lyalwishile shiya shikuta ci awapaelele kutunda kwa anu kukuma apa nakapwela wahe. ¹⁶ Honi akopo kukwamahala ci, akwelume wahe awa atwesha kulwa kwanafu ne anatundu kwa anu, ¹⁷ ne Shinda sha moyo ayepo amba kukwange, kuniambela ci, ¹⁸ 'Lelo kenge muyavuka Ari, maenja a Moabi. ¹⁹ Apa mukuma popepi no muthsambwa thza anu o Amoni, mwawashupa nji kuwalwisha; mukonda kanakumipa shimweya ku litunga lya Amoni ci likale lyenu; mukonda ninalipa kwa ekulya Lota ci likale lyo.''' ²⁰ (Nalyo kalo kuma nalilimumkiwa ci litunga lya Refaimi. Arefaimi woliyo atangie kutunga mo--- ambene Amoni awaisha ci a Zamuzumimi--- ²¹ anu okutunuka, owangi, no ule eci Anakimu. Ambene Shinda sha moyo ayepo wapaa pa meho o Amoni, ne awopo awashwana no kutunga mu shivaka sho. ²² Eshi sholiyo nakwama kalo Shinda sha moyo kwa anu a Isau, awa atungile mu Seiri, apa apaile Ahori pa meho o, ne ekulya a Isau awopo awashwana no kutunga mu shivaka sho kukuma no lelo. ²³ Eci Avivi awa atungile mu maumbo kukakuma ku Gaza, Akafitorimi, awa atundile ku Kafetori, awopo awapaa no kukala mu shivaka sho.) ²⁴ Honi mukatuke, muthze mu muendo wenu, ne mupite thzo mulonga wa Arinoni; mumone, ninamipa mu moko enu Sihoni o mu Amori, fumu wa Heshiboni, no litunga lyenji. Mutateke kulishimba ne mulwe nenji mu mvo. ²⁵ Lelo natateka kupaka wowa no kuyapa kwa anu ali mushi thzo liwilu lyolihe; kenge akuyuva yenu ne kenge akututuma no kukala mu wowa mukonda wenu.' ²⁶ Apa twakumine mu mumbulwa kukutu wa Kademoti amepo nituma anu kwa Sihoni, fumu o Heshiboni, ko maywi o kuliyala, kuamba ci, ²⁷ 'Onitawethze nipite mu litunga lyoe; kenge nipita mu likunwa pohuma; kanihuka ku shilyo nji kuhuka ku shimoho. ²⁸ Kenge oniulisha yo kulya ko mali, ci nilye; kunipa meyu ko mali, ci ninwe. Onitawethze pohuma nipite ko maulu ange; ²⁹ eci ekulya a Isau awa anatungu mu Seiri, kalo eci Amoabi awa antungu mu Ari, omu nakwamena kukwange; kunakuma apa naniyavuka lwale lwa Jodani kuthza mu litunga elyi anatupa Shinda sha moyo Nyambi wetu.' ³⁰ Ambene Sihoni fumu wa Heshiboni kanatutawethza ci tupite mu litunga lyenji; mukonda Shinda sha moyo Nyambi woe nakolopisha maayalo enji no kukolopisha mucima wenji, ci amutweshe ko okolo oe, ei anakwama lelo. ³¹ Shinda sha moyo ayepo aamba kukwange, 'Omone, ninatateka kukupa Sihoni no litunga lyenji; otateke kulishimba, ci wakushwane litunga lyenji.' ³² Nehoni Sihoni ayepo keya kunatulwisha, aye na anu enji wahe, kunalwela ku Jahazi. ³³ Shinda sha moyo Nyambi wetu ayepo mupa kukwetu ne atwepo tumutwesha na anenji no anu enji wahe. ³⁴ Ko esho shikati atwepo tushimba ma mbngi enji oahe no kupaa anu mu mambongi oahe---akwelume no ambuyama no anuke; kwithsa oyu wapandukile twashiile. ³⁵ Shime emunanu pohuma ei twashimbile mu mvo, pofoci no mambongi anepishiwa aa twashimbile. ³⁶ Kutatekela ku Aroeri, ethzi thzili ku mambali o mulonga o Arinoni, no kutatekela ku mbongi ethzi thzili mu mulonga, kukakuma ku Giliadi, kwithsa mbongi ethzi twakwangile. Shinda sha moyo Nyambi wetu kuma aatupile mu moko etu. ³⁷ Shime ku litunga lya ekulya Amoni pohuma oku mwakanine kuthza, kupaka kengeyo no ku lwale lo Jaboki, no mambongi o litunga lyo mikinya--- kokuhe oku atukanishile kuthza Shinda sha moyo Nyambi wetu.