¹ Mwesho shikati Shinda sha moyo ayepo amba kukwange, 'Oyuwe matapa eli o mawe o kulipitula eci aya o matatekelo, ne okanduke okeye kukwange pa mukinya, ne okwame aleka thzo itondo. ² Kenge niñola pa matapa maywi nakala pa matapa o matatekelo aya nopaa, ne kenge oapaka mu aleka.' ³ Ne amepo nikwama aleka thzo shitondo sho akesha, kalo amepo niyuwa matapa eli o mawe o kulipitula eci o matatekelo, ne amepo nikanduka pa mukinya, ko ninakwatelela matapa eli mu lyoko lyange. ⁴ Ayepo ñola pa matapa eci omu añolelile pa matatekelo milao likumi (10) ethzi aambile Shinda sha moyo kukwenu pa mukinya pakaci ko mulilo pa liyuwa lyo shiwano; nehoni Shinda sha moyo ayepo anipa. ⁵ Amepo nihuka kuulumuka kutunda pa mukinya, no kukapaka matapa mu aleka nanikwama; aya alimo, eci eli nanitumina Shinda sha moyo.'' ⁶ (Anu a Isilaele awopo aenda kutunda ku Beeroti Bene Jaakani kuthza ku Mosera. Oko koliyo akafelelile Aruni, ne koliyo amuvumbekile; Eleazare, mwanenji, ayepo shwana shikwama sho upulisita mu shivaka shenji. ⁷ Kutundapo awopo aenda kuthza ku Gudigoda, no kutunda ku Gudigoda kuthza ku Jotibata, litunga lyo milonga thzo meyu. ⁸ Mwesho shikati Shinda sha moyo po hangula shikuta sha livi ci ashimbe aleka thzo umbusha wa Shinda sha moyo, kuimana posho thza Shinda sha moyo kumukwamena, no kufiyawela anu mu lithzina lyenji, eci omu kunakalela no lelo. ⁹ Honine Livi kali no shivaka nji kushwana litunga na apenji; Shinda sha moyo woliyo ushwana wenji, eci eli aambile Shinda sha moyo Nyambi wenu kukwenji.) ¹⁰ Amepo nikala pa mukinya shikati sho kulipitula eci sho matekelo, mayuwa makumi ane (40) no mashiku makumi ane (40). Shinda sha moyo ayepo niyuva mwesho shikati kalo; Shinda sha moyo kaayalile kumimana. ¹¹ Shinda sha moyo po amba kukwange, 'Okatuke, othze posho thza anu kuwaendisha mu muendo wo; kenge athza kukashwana litunga eli naliethzile kowa kuku wo ci kenge nilipa kukwo.' ¹² Honi, owe Isilaele, shine afota Shinda sha moyo kukwkoe, ngeci kali ci oyape Shinda sha moyo Nyambi woe, oenda mu makuñwa enji oahe, kumuhima, no kulombela Shinda sha moyo Nyambi woe ko mucima woe ouhe no moyo oe ouhe, ¹³ kumamela itumina ya Shinda sha moyo, no milao thzenji, ei nikutumimna lelo ci okale shuwana? ¹⁴ Mumone, liwilu no liwilu lyo mawilu ya Shinda sha moyo Nyambi woe, kaye, no enu yoihe ilimo. ¹⁵ Shinda sha moyo naolisha atata oe ko kuwahima, ne kuma amihangulile, amwe akulyoo, munyima thzo, kupita anu wahe, eci eli akwama lelo. ¹⁶ Honine mutwale micima thzenu ku mukanda, kalo lelo mwakolopisha mathsingo enu. ¹⁷ Mukonda Shinda sha moyo Nyambi wenu, po Nyambi wa athzimu no Fumu o mafumu, Nyambi o mukulu, omukolo no kuyapisha, kaimanena munu yupi nji yupi kalo kauliwa kweta. ¹⁸ Aatulela shiyana no lifakathzi, amonisha shihimo kwa mwenda ko kumupa ilya no ibata. ¹⁹ Honine muhime enda; mukonda namwe kuma mwakalile enda mu litunga lya Engepita. ²⁰ Oyape Shinda sha moyo Nyambi woe; aye yoliyo olombela. Okwatelele kukwenji, ne oliethze ko lithzina lyenji. ²¹ Yoliyo oshangala, kalo yoliyo Nyambi woe, oyu nakukwamena ei enu yoikulu no kuyapisha, ei anamono meho oe. ²² Atata wenu kuma athzile mu Engepita kwali anu makumi mutanu no makumi eli (70); honi Shinda sha moyo nyambi wenu onamikwama oawangi eci matungwethzi omu liwilu.