¹ Honine ohime Shinda sha moyo Nyambi woe ne shikati shoshihe omamele imonisha yenji, milao thzenji, itumina yenji, no milao thzenji. ² Mulimuke ci kaniambile kwa anenu, awa akana kulimuka nji kumona kashitiko ka Shinda sha moyo Nyambi wenu, ukulu wenji, lyoko lyenji lyo likolo, nji lyoko lyenji lyo kuoloka, ³ imonisha no ekwama ei nakwama mukaci ko Engepita kwa Faro, fumu o Engepita, no ku litunga lyenji lyolihe. ⁴ Kanamono shanga ei nakwama ku mashwalale o Engepita, ku tukambe to, nji ku makoloi o omu nakwamena meyu o likulu lwale lo lukihi kuwathsika apa amishupwelile, nomu awapaelile Shinda sha moyo kunakuma lelo, ⁵ nji ei amikwamenine mu mumbulwa kukutu kuleta apa namunakumena muno mu shivaka. ⁶ Kanamono ei akwamine Shinda sha moyo kwa Datani na Abiramu, ana Eliabi mwana Rubeni, kaye omu kayahamishelile kanwa kako no kuwamina, kumina manjiyo o, matende o, no shinu shoshihe eshi shiyoya eshi nashiwashupwela, pakaci ko ana Isilaele wahe. ⁷ Ambene meho enu anamono yoihe ekwama yoikulu ya Shinda sha moyo ei nakwama. ⁸ Honine mumamele milao thzothzihe ethzi nimitumina lelo, ci mukolope, ne ci muthze mukashwane litunga omu muyavukela kukalishwana, ⁹ ne ci kalo mayuwa enu avule mu litunga eli aliethzile Shinda sha moyo kowa tata wenu kuliwapa no kulipa ekulyo, litunga lipuka mahwe no oki. ¹⁰ Mukonda litunga, omu muthza kukalishwana, kalilipitula eci litunga lyo Engepita, omu mutunda omu namukunanga mbuto thzenu no kuthzithselaela meyu o kuletanga no maulu, eci shilwa sho miloho; ¹¹ ambene litunga omu muyavukela kukalishwana, litumga lyo mikinya no milonga, no meyu o kunwa atunda ku mvula o kuwilu, ¹² litunga eli anyunga Shinda sha moyo Nyambi wenu; shikati shoshihe poliyo anatanekela meho a Shinda sha moyo Nyambi wenu, kutunda ku matatekelo o mwaka kukakuma kuhula o mwaka. ¹³ Kenge kukwamahala ci, ngeci kenge muteelela shuwana milao ethzi nimitumina lelo, kuhima Shinda sha moyo Nyambi wenu no kumukwamena ko micima thzenu thzothzihe no mioyo thzenu thzothzihe, ¹⁴ pohuma kenge nimilokishela mvula o mulitunga lyenu pa shikati shiloela, mvula o matatekelo no mvula o matunulelo, ci muyange mbuto thzenu, wine wenu omupe, no oli wenu o mupe. ¹⁵ Kenge nimenisha muhonyi mu ilwa yenu ci ngombe thzenu thzilye, ne kenge mulya kuikuta. ¹⁶ Mulimamele mwashinda ne ci micima thzenu lelo thza angeliwa, ci mutunde mu likunwa no kulombela athzimu ao no kuwakinyamena; ¹⁷ ci uanji wa Shinda sha moyo lelo wamiyuumena; ne ci kalo lelo ayanjela liwilu ci mvula aloka, ne ci litunga lyakala no oshuka walyo, ne ci mufe wanguwangu kutunda mu litunga lyo liwa eli amipa Shinda sha moyo. ¹⁸ Honine mupake aa maywi ange mu micima thzenu no mu mioyo thzenu, mu aange ci akale shimonisho pa moko enu, ne akale sho kuvata pa lupala mukaci ko meho enu. ¹⁹ Muafundishe anenu ne muaambe apa mulala mu manjiyo enu, apa muenda mu likuñwa, apa mulala, no apa mupinduka. ²⁰ Muañole pa mavala oku mashelo o manjiyo enu no mashelo o ku malapa enu, ²¹ ci mayuwa enu no mayuwa a anenu avule mu litnga eli aliethzile Shinda sha moyo kowa kuku wenu kuliwapa amona liwilu lili peulu o kaye. ²² Mukonda ngeci mumamele shuwana milao ethzi nimitumina, ne mwathzikwama, kuhima Shinda sha moyo Nyambi wenu, kuenda mu makuñwa enji oahe, no kukalelela kukwenji, ²³ nehoni Shinda sha moyo kenge atundisha wahe awa anu pa posho thzenu, ne kenge mushwana anu owangi no okolo kumipita. ²⁴ Shivaka no shivaka apa shilyata shilyatelo sho maulu enu kenge shikala shenu; kutunda ku mumbulwa kukutu kukakuma ku Lebanoni, kutunda ku lwale, lwale lo Eufati, kukakuma ku lwalo lo ku wiko oliyo maenja enu. ²⁵ Kwithsa munu oyu wakutwesha kuima posho thzenu. Shinda sha moyo Nymbi wenu kenge apaka wowa o kumiyapa no kumitutuma mu litunga lyolihe omu mukalyata, eci omu anaambela kukwenu. ²⁶ Mumone, lelo napaka fiyawethzi no shikuto pa posho thzenu: ²⁷ fiyaywethzi, ngeci mwamamela milao thza Shinda sha moyo Nyambi wenu ethzi nimitumina lelo, ²⁸ ne shikuto, ngeci kamumamela milao thza Shinda sha moyo Nyambi wenu, ambene mwatunda mu likuñwa eli nimitumina lelo, kushupwela athzimu ao awa mukana kulimuka. ²⁹ Kenge kukwamahala ci, Shinda sha moyo apa amileta mu litunga eli muthza kukashwana, ne kenge mupaka fiyauthzi pa mukinya o Gerizemi, ne shikuto pa mukinya o Ebali. ³⁰ Kali thzili mu sambwa thza Jodani, ku wiko o likuñwa lyo ku wiko, mu litunga lya anu o Kanana awa anatungu mu Araba, kushungama no Giligali, kunyonga no itondo yo More? ³¹ Mukonda mwayavuka Jodani kuthza kukashwana litunga eli amipa Shimda sha moyo Nyambi wenu, ne kenge mulishwana no kutunga mo. ³² Mumamele milao thzothzihe no itumina ei nipaka posho thzenu lelo.