¹ Ethzi thzoliyo milao no itumina ei mukamamela mu litunga eli Shinda sha moyo, Nyambi wa tata wenu, anamipa ci mukalishwane, mu mayuwa oahe muyoya pa kaye. ² Yoshemwa kenge mukepisha ivaka yoihe oku anu mukashwana nalombelelanga athzimu oo, pa mikinya thzo thzile, no pa mikinya thzoshoonye, no mushi thzo shitondo sho mamuna oayu shoshihe. ³ Mukaumbulule ma aletare o, kucothzaula ipathsi pathsi ithsini yo yo mawe, no kutumeka ithsini yo yo Ashera. Mutetaule ikupulo yo kuyuwa yo athzimu o ne mutundishe mathzina o omo mu ivaka. ⁴ Lelo mwalombela Shinda sha moyo Nyambi wenu kengeyo. ⁵ Ambene ku shivaka ahangula Shinda sha moyo mukaci ko ikuta yenu yoihe ci koliyo apaka lithzina lyenji, oko koliyo kushivaka akalanga, ne koliyo muthzanga. ⁶ Koliyo muletanga nupu thzo kutumeka, itavelo yenu, yo ulikumi yenu, no nupu thzimweya ethzi thzishimbiwa ko moko enu, nupu thzenu thzo kuliethza, nupu thzo kupa ko kuhima kwenu, no ei yo eli ku ngombe thzenu no mangu enu. ⁷ Oko koliyo mulyelanga pa meho a Shinda sha moyo Nyambi wenu no kunyanyuka mu enu yoihe munapaka lyoko lyenu, amwe na aka njiyo thzenu, omu anamifiyawela Shinda sha moyo Nyambi wenu. ⁸ Kamwakukwama enu yoihe ei tukwama kuno lelo; pano munu no munu akwama ei inaloo mu meho enji; ⁹ mukonda mushime kukuma pa kulitulumwisha, ku kushwana oku amipa Shinda sha moyo Nyambi wenu. ¹⁰ Ambene apa muyavuka Jodani no kukatunga mu litunga eli amipa Shinda sha moyo Nyambi wenu ci mulishwane, kenge amipa kulitulumwisha kwa akwethzimho yenu wahe awa anamithzinguluka ci muyoye mu kuliyala. ¹¹ Nehoni ku shivaka eshi akuhangula Shinda sha moyo ci koliyo likala lithzina lyenji---oko koliyo muleta enu yoihe ei nimitumina: nupu thzenu thzo kutumeka, itavelo yenu, yo ulikumi yenu, no nupu thzishimbiwa ko moko enu, no nupu muhangula thzo kuliethza thzothzihe ethzi mwakuliethza kwa Shinda sha moyo. ¹² Kenge mwakunyanyuka pa meho a Shinda sha moyo Nyambi wenu---amwe, anenu owakwelume, anenu owambuyama, apikenu owakwelume, apikenu owambuyama, no Alivi awa ali mu mashelo enu, mukonda kali no shivaka nji kushwana mukaci kenu. ¹³ Mulimamele mwashinda ci lelo mwapa nupu thzenu thzo kutumeka ku shivaka shoshihe eshi mumona; ¹⁴ ambene ku shivaka eshi ahangula Shinda sha moyo mukaci ko shikuta shofoci ku ikuta yenu koliyo mupa nupu thzenu thzo kutumeka, kalo koliyo mwakukwama enu yoihe ei nimitumina. ¹⁵ Unohoni, mwatwesha kupaa no kulya iyama mu mashelo enu, ko omu muhimena, kutambula fiyawethzi thza Shinda sha moyo Nyambi wenu ku enu yoihe anamipa; anu o kukana kukena no anu o kukena wahe kenge alya ko, iyama yo kuninga eci luvi no mengo. ¹⁶ Ambene lelo mwalya onyinga; muumwaele pashi eci meyu. ¹⁷ Lelo mwalyela mu mashelo kwei yo ulikumi itunda ku uloto wenu, ku waine wenu omupe, ku oli wenu, nji kwei yo eli ku ngombe thzenu nji ku mangu enu; kalo nyama yomuhe oyu munkwana shitavelo lelo mwamulyela pofoci no nupu thzo kuliethza ethzi mukwama, nji nupu ethzi mupa ko kuhima kwenu, nji nupu ethzi mushimba mu moko enu. ¹⁸ Ambene, kenge muilyela pa meho a Shinda sha moyo Nymbi wenu mu shivaka eshi akuhangula---owe, mwanoe o mukwelume, mwanaoe o mbuyama, mupikoe o mukwelume, mupikoe o mbuyama, no mulivi oyu li mushelo thzoe; kenge onyanyuka pa meho a Shinda sha moyo Nyamnbi woe mu enu yoihe apa onapaka lyoko. ¹⁹ Olimamele owe shinda ci lelo washiyelela mulivi oyu li mu litunga lyenu. ²⁰ Shinda sha moyo apa akulisha maenja enu eci omu anamikupelishela, ne amwepo muamba ci, 'Kenge nilya nyama,' mukonda o kuhima kwenu kulya nyama, mulye nyama, ko omu uhimena moyo wenu. ²¹ Ngeci shivaka ahangula Shinda sha moyo Nyambi wenu kupaka ko lithzina lyenji shakala ko kule nene nenu, nehoni kenge mupaa ngombe thzimweya no mangu amweya ku ngombe thzenu no mangu enu, eci eli ninamitumena; mulyele mukaci ko mashelo enu ko omu uhimena moyo wenu. ²² Eci omu analyeliwanga luvi no mengo, ne moliyo oilyela; anu o kukana kukena no anu o kukena wahe kenge alya mulyelo o kulipitua. ²³ Mumone pohuma ci lelo mwalya onyinga, mukonda onyinga po oliyo moyo; lelo mwalya moyo no nyama. ²⁴ Lelo mwaulya; muumwaele pashi eci meyu. ²⁵ Lelo mwaulya ci mukale shuwana, na anenu akeya munyima thzenu akale shuwana, apa mukwama ei inaloo mu meho a Shinda sha moyo. ²⁶ Ambene enu ya Shinda sha moyo ei muli nayo no nupu thzo kuliethza kwenu---ei kenge muishimba no kuthza ku shivaka eshi ahangula Shinda sha moyo. ²⁷ Oko koliyo mukakwama nupu thzo kutumeka, nyama no onyinga, pa aletare thza Shinda sha moyo Nyambi wenu; onyinga o itavelo yenu umwaeliwe pa aletare thza Shinda sha moyo Nyambi wenu, ne mulye nyama. ²⁸ Mumamele no kuteelela oahe aa maywi nimitumina, ci mukale shuwana na anenu akeya munyima thzenu akale shuwana ko kukana kupwa, apa mukwama yoiwa no ei inaloo mu meho a Shinda sha moyo Nyambi wenu. ²⁹ Shinda sha moyo Nyambi wenu apa atundisha anu posho thzenu, apa muthzamo kukawashwana, ne amwepo muwashwana no kutunga mu litunga lyo, ³⁰ mulimamele mwashinda ci lelo mwalwa mu tushaka to kuwatamenena, munyima thzo kuwamana pa meho enu---kulwa mu kashaka ko kufotishisha athzimu o, mu kuipaula ci, 'Awa anu ngepi alombelanga athzimu oo? Name kenge nakwama kengeyo.' ³¹ Lelo mwalombela Shinda sha moyo Nyambi wenu kengeyo, mukonda enu yoihe yo mathzilo kwa Shinda sha moyo, enu ei anathzimbi---anaikwama no athzimu oo; kuma natumekanga ano owakwelume no owambuyama kuwatumeka mu mulilo kutumekela athzimu oo. ³² Yoihe ei nimitumina, muimamele. Lelo mwapakako imweya nji kutundishako imweya.