¹ Ngeci mukaci kenu kwakule mupolofita nji muka kulota, ne ngeci ayepo kutongwela shimonisha nji shikomokisha, ² ne ngeci esho shimonisha nji shikomokisha shakwamahala, eshi nakutongwela ne akuambela ci, 'Tushupwele athzimu ao, awa okana kulimuka, ne tuwalombele,' ³ lelo wateelela maywi oyo mupolofita nji muka kulota; mukonda Shinda sha moyo Nyambi wenu amieleka ci alimuke ngeci po mwahima Shinda sha moyo Nyambi wenu ko micima thzenu thzothzihe no myoyo thzenu thzothzihe. ⁴ Mushupwele Shinda sha moyo Nyambi wenu, mumulemeke, mumamele itumumina yenji, ne muteelele liywi lyenji, ne mumulombele no kulipaka kukwenji. ⁵ Oyo mupolofita nji muka kulota kenge akupaiwa, mukonda onaamba yo kupilukela Shinda sha moyo Nyambi wenu, oyu wamitundishile mu litunga lya Engepita, aye wamiangululile mu njiyo thzo upika. Oyo mupolofita afota kumitundisha mulikuñwa eli amitumenine Shinda sha moyo ci lyoliyo muenda. Ne mutundishelele omango mukaci kenu. ⁶ Ngeci minoe o mukwelume, mwana mama oe, nji mwanoe o mukwelume nji mwanoe o mbuyama, nji munu wa mbushoe onakulupela nene, nji mbushoe oyu ohima eci omu ohimena moyo oe, po kukeyela kunthzimba kukuootela no kuamba ci, 'Tuthze tukalombele athzimu ao, awa okana kulimmuka, owe nji akuku oe--- ⁷ muthzimu yupi nji yupi wa anu anamithzinguluka, awa ali po pepi nenu nji awa ali ko kule nenu, kutunda kuhula ofoci o kaye kukakuma kuhula umweya o kaye.' ⁸ Lelo watawa nji kuteelela kukwenji, ne lelo watawethza lithziho lyoe kumuyuvela kukola, ne wamuyuvela ñeke nji kumuthzinda. ⁹ Ambene, yoshemwa omupae; lyoko lyoe likale lyo matatekelo kumuthza pe a ilama kumupaa, munyima mbeci moko a anu wahe akwame kengeyo. ¹⁰ Omupovaule no mawe kumupaa, mukonda onaeleka kukutundisha kwa Shinda sha moyo Nyambi woe, oyu wakutundishile mu litunga lya Engepita, kukutundisha mu njiyo thzo upika. ¹¹ Isilaele yomuhe kenge ayuva no kuyapa, ne kakukwama kalo omango o kengeya. ¹² Ngeci owepo yuva munu yupi nji yupi ku amba thzimweya thzo mambongi enu aa amipa Shinda sha moyo Nyambi woe ci mukale mo: ¹³ Anu wamweya owamango anatundu mukaci kenu ana angela anu anatungu mu mbongi thzo kuamba ci, 'Tuthzenu tukalombele athzimu ao awa mukana kulimuka.' ¹⁴ Ne oipule upaki, ofotishishe, ne owipulishishe shuwana. Apa owana ci yashemwa ci shinu sho mathzilo okengeyo shinakwamahala mukaci kenu, nehoni okwame po shimweya. ¹⁵ Yoshemwa olwishe awa anatungu omo mu mbongi ko utwe o mwele, othziipishelele thzothzihe no anu wahe awa ali mo, pofoci no emunanu yathzo, ko utwe omwele. ¹⁶ Oungumeke lufumo loluhe lwathzo pakaci kathzo ne otumeke mbongi, pofoci no lufumo onawanyanga, kukwama shitavelo sho kutumeka kwa Shinda sha moyo Nyambi woe. Mbongi kenge thzikala lilambo lyo enu inepa ko kukana kupwa; mbela thza umbiwa kalo. ¹⁷ Ku enu inaloisheliwa ku ipishiwa lelo kwamamatela shofoci mu lyoko lyoe. Kukale kenge, ne ci Shinda sha moyo ashiye uanji wenji uyuuma, akumonishe shihemo, akaufle ñeke, no kukuvulisha eli aliangile kowa tata oe. ¹⁸ Kenge akwama ei mukonda wateelela liywi lya Shinda sha moyo Nyambi woe, kumamela itumina yenji yoihe ei nikutumina lelo, kukwama ei inaloo mu meho a Shinda sha moyo Nyambi woe.