¹ Yamwe anu a Shinda sha moyo Nyambi wenu. Lelo mwalikulula, nji kukulula ku lupala kulikululela awa anafu. ² Mukonda amwepo mwa anu o kukena kwa Shinda sha moyo Nyambi wenu, ne Shinda sha moyo onamihangula ci mukale anu enji ku enu yenji, kupita anu wahe awa ali kaye. ³ Lelo walya shinu shoshihe sho mathzilo. ⁴ Eyi yoliyo iyama wakulya: ngombe, lingu, no membe, ⁵ luvi, mengo njowe, mbambi, mapi, no lingu lyo pa mukinya. ⁶ Kenge mulya shiyama shoshihe eshi shinalitepa mapathzi, eshi shininga ci, shili no mapathzi analitape lwili, kalo sha shatafuna muhonyi. ⁷ Shianga kengeyo lelo mwalya iyama imweya eyi itafuna muhonyi nji eyi ili no mapathzi analitepe lwili: kamele, kalumba, no kalumba ko kupila muthsila; mukonda ya tafuna muhonyi ambene mapathzi ayo kalitepile lwili, ya mathzilo kukwenu. ⁸ Ngulu naye wa mathzilo kukwenu mukonda onalihanda mapathzi ambene katafuna muhonyi; wa mathzilo kukwenu. Lelo mwalya nyama o ngulu, ne mwkwata ivimbi yathzo. ⁹ Enu eyi ili mu meyu mulye: Yoihe ili no mele no nyathzi; ¹⁰ ambene yoihe yo kupila mele no nyathzi lelo mwailya; ya mathzilo kukwenu. ¹¹ Inyunyi yoihe yo kukena mulye. ¹² Ambene inyunyi mwa kukana kulya eyi: ngonga, likwi, ñwanyi, ¹³ shipungu, kañothzi no shaluhele mu mishovo thzenji thzothzihe. ¹⁴ Lelo mwalya mushovo upi nji upi o likololo, ¹⁵ no mpye, no mungomba, no lumbamba, no mishovo thzothzihe thzo mingomba, ¹⁶ likovo lyo lyoshoonye, likovo lyo likulu, likokakoka, ¹⁷ liya, likwi, kakume. ¹⁸ Lelo mwalya mombo, mushovo ouhe o nalukapwa, mukuwela, no kapukupuku. ¹⁹ Yoihe ei ili no mando ei ienda ko mala ya mathzilo kukwenu; lelo yaliwa. ²⁰ Mulye enu yoihde yo kukenea ei iunduka. ²¹ Lelo mwalya shinu shoshihe sho kulifela; mushipe muenda oyu li mu lilapa lyenu, ci ashilye; nji mushiulishe kwa munu o ku litunga lyalyo. Mukonda amwepo mwa anu o kukena kwa Shinda sha nmoyo Nyambi wenu. Lelo mwateleka kamembeana mu mawe a mama wako. ²² Yoshemwa mutundishe shofoci kwei yo likumi onayanga ku mbuto thzoye thzothzihe, ei itunda mu shilwa shoye mwaka no mwaka. ²³ Mulyele pa meho a Shinda sha moyo Nyambi wenu, mu shivaka akuhangula ci moliyo likala lithzina lyenji, yo ulikumi ku mavu enu, ku waine wenu o mupe, no ku oli thzenu, no mweli o ku ngumbe thzenu no ku mangu enu ci mulifundishe kukuteka Shinda sha moyo Nyambi wenu shikati shoshihe. ²⁴ Ngeci muendo wakulepela ne ci kotwesha kushishimba, mukonda shivaka eshi akuhangula Shinda sha moyo ci koliyo apaka lithzina lyenji kule nene noe, nehoni, Shinda sha moyo apa akufiyawela, ²⁵ kenge oulisha ethzo nupu no mali, okwatelele ao mali mu lyoko lyoe, ne othze ku shivaka esho akuhangula Shinda sha moyo Nyambi woye. ²⁶ Kenge okaula yoihe ei ohima ko ao mali: ngombe, mangu, wine nji sho kunwa sho shilulu, nji yoihe ohima. Nehoni kenge olyelako posho thza Shinda sha moyo Nyambi woye ne kenge onyanyuka, owena no aka njiyo thzoye. ²⁷ Mulivi oyu li mu mashelo oye---lelo wamuvulama, mukonda kali no shimweya nji shivaka eci yowe. ²⁸ Kuhula o myaka thzihatu no myaka thzihztu kenge oleta ulikumi ouhe o ei onawana omo mu mwaka, ne kenge oiungumeka mu mashelo oe; ²⁹ ne mulivi, mukonda kali no shimweya nji shivaka eci yowe, no mwenda, no shiyana, no lifakathzi awa ali mu mashelo oye, kenge akeya kunalya ne aikute. Okwame kengeyo ci Shinda sha moyo Nyambi woye akufiyawele mu ekwama yo moko oye okwama yoihe.