¹ Kuhula o myaka mutanu na thzili, kenge mushiya ikoloti. ² Omu moliyo mwakuishiyela: Munu yomuhe muka kukolotisha kenge ashiya ei anapa kwa mwapenji; kakufota ci akuliwe ei napu kwa munu anatungu nenji nji mwapenji mukonda kushiya ikoloti kwa Shinda sha moyo kunaambiwa. ³ Munu o litunga lyalyo po akule ei naipiwa kukwenji; ambene shinu shoye shoshihe eshi shili kwa mwapoe lyoko lyoye lishishiye. ⁴ Shianga kengeyo, lelo kwakala shihutu mukaci kenu (mukonda Shinda sha moyo yoshemwa kenge amifiyawela mu litunga eli amipa kulishwana ci mukatungemo), ⁵ ngeci po mwateelela nawa liywi lya Shinda sha moyo Nyambi wenu, kumamela thzothzihe ethzi milao nimitumina lelo. ⁶ Mukonda Shinda sha moyo Nyambi wenu kenge amifiyawela, eci eli namikukulupelisha; kenge mukolotisha anu owangi, ambene amwe kamwakukolota; kenge mwakuendisha anu owangi, ambene awo kakumiendisha. ⁷ Ngeci kwali shihutu mukaci kenu, yumweya kwa apenu, oyu li mu malapa enu mu litunga lyenu eli amipa Shinda sha moyo Nyambi wenu, lelo mwakolopisha micima thzenu nji kuwisha moko enu kwa mwapenu o shihutu, ⁸ ambene yoshemwa mu olole moko enu kukwenji ne yoshemwa mumukolotishe yoingi ei afota. ⁹ Mumamele mwakala no maayalo oamango mu micima thzenu, kuamba ci, 'Mwaka o mushitanu na thzili, mwaka o kushiya, uli po pepi,' ne ci lelo mwakala no kuyumena kwa mwapenu o shihutu ne mukane kumupa shimweya; kenge alilela kwa Shinda sha moyo yo umango wenu, ne kenge shikala shivi kukwenu. ¹⁰ Yoshemwa mumupe, ne micima thzenu lelo thzaliela apa mumupa, mukonda munyima wei Shinda sha moyo Nyambi wenu kenge amifiyawela mu ekwama yenu yoihe no pa enu yoihe mupaka moko enu. ¹¹ Mukonda shihutu kakupila kukala mu litunga; honine namitumena no kuamba ci, 'Yoshemwa muolole moko enu kwa mwapenu, kwa mukakupila, no ku shihutu shenu mu litunga.' ¹² Ngeci mwapoe, mukwelume o muheveru nji mbuyama o muheveru, onaulishiwa kukwoye ne akukwamena pa myaka mutanu na ofoci (6), nehoni mu mwaka o mushitanu na thzili (7) omutawethze alithzele kutunda kukwoye kunaliyala. ¹³ Apa omutawethza kulithzela kunaliyala kutunda kukwoye, lelo wamushiya ci athze mokomoko. ¹⁴ Omupe ku mangu oye, kwei onaungumeka pa shilambo shoye no ku veine li mu shiluvelo shoye kutundelela ku mucima oye. Kwei anakufiyawela nayo Sinda sha moyo Nyambi woye, omupeko naye. ¹⁵ Ovuluke ci shine wakalile o mupika mu litunga lya Engepita, ne ci kalo Shinda sha moyo Nyambi woye onakutundisha mo; honine lelo nakutumina ci okwame kangeyo. ¹⁶ Kenge kwakukwamahala ci ngeci akuambela ci, 'kanitundu kukoye,' mukonda akuhima no aka niyo thzoye, ne mukonda kalo onakala shuwana noye, ¹⁷ nehoni oshimbe shiyukulisho no kumuyukulula mutwi pa shikwalo, ne kenge akukala mupikoe ko kukana kupwa. okwame kengeyo noku kwa mupikoe o mbuyama. ¹⁸ Lelo kwakala ukalu kukoe kumutawethza ci athze ko kuliyala kutunda kukoe, mukonda onakukwamena pa myaka mutanu na ofoci (6) ne onakukwamena shikwama shiloela anu eli. Shinda sha moyo Nyambi woye kenge akufiyawela mu enu yoihe okwama. ¹⁹ Aeli o mapoho ku ngombe thzoye no ku mangu oye oipe kwa Shinda sha moyo Nyambi woye. Lelo wakwama shikwama shipi nji shipi ku eli o ngombe thzoye, nji kuteta ohunga ku eli o mangu oye. ²⁰ Wakulyele eli ku ngombe no mangu oe posho thza Shinda sha moyo Nyambi woye popepi no shivaka eshi akuhangula Shinda sha moyo Nyambi woye, owe na aka njiyo thzoye. ²¹ Ngeci kopali apa shinepa--- eci kenge, ngeci sha kutenguka nji sha kufa meho, nji pokuli apa shinepa popahe---lelo washikwama shitavelo kwa Shinda sha moyo Nyambi woye. ²² Kenge wakushilyela mukaci ko mashelo oye; anu o kukana kukena nawa o kukena wahe alyeko, eci omu onalyelanga mapi nji luvi. ²³ Ne pohuma lelo walya onyinga washo; wakumwaele onyinga washo pashi eci meyu.