¹ Omamele ngonda thzo Abibi ne okwamene Shinda sha moyo Nyambi woye paseka, mukonda mu ngonda thzo Abibi moliyo akutundishile Shinda sha moyo Nyambi woye mu litunga lya Engepita ushiku. ² Kenge opaelela Shinda sha moyo Nyambi woye paseka ku mangu oye no ku ngombe thzoye mu shivaka eshi akuhangula Shinda sha moyo ci moliyo likala lithzina lyenji. ³ Lelo wamulya no ishima yo mamene; pa mayuwa mutunu na eli (7) omulye no ishima yo kupila mamene, ishima yo likando; mukonda kuma watundile mu litunga lya Engepita ko kuyakamishiwa. Okwame kengeyo mu mayuwa oe o kuyoya oahe ci wakuvulukange liyuwa watundile mu litunga lya Engepita. ⁴ Lelo kwamonahala mamene mu litunga lyoe lyolihe pa mayuwa mutanu na eli (7); shianga nyama oyu okwamena Shinda sha moyo shitavelo pa lungulo lo liyuwa lyo mutatekelo lelo akala kukakuma mashikushiku. ⁵ Lelo wakwamena Paseka mu mashelo oahe o mambongi oye aa akupa Shinda sha moyo Nyambi woye. ⁶ Ambene, okwamene shitavelo ku shivaka oku akuhangula Shinda sha moyo Nyambi woye ci koliyo kukala lithzina lyenji. Oko koliyo wakukwamena shitavelo lungulo liyuwa ko litoka, pa shikati sho mwaka eshi watundile mu Engepita. ⁷ Omupone no kumulyela pa shivaka esho akuhangula Shinda sha moyo Nyambi woye; mashikushiku kenge okupiluka no kuhuka ku tende thzoye. ⁸ Pa mayuwa mutanu na lyofoci (6) kenge olya ishima yo kupila mamene; pa liyuwa lyo mushitanu na eli (7) kenge kukala kuliwana ko kukenu kwa Shinda sha moyo; mwelyo liyuwa lelo wakwama shikwama shoshihe. ⁹ Kenge otala masunda mutanu na eli (7); kutunda apa wakupakela cekesi pa uloto unemana oteteke kutala masunda mutanu na eli (7). ¹⁰ Okwamene Shinda sha moyo Nyambi woye mukiti o masunda no kupunisha nupu kutundelela mu lyoko lyoye ko kuhima koye, kuthza komu akufiyawela Shinda sha moyo Nyambi woye. ¹¹ Kenge onyanyuka pa meho a Shinda sha moyo Nyambi woye---owe, mwanoe o mukwelume, mwanoe o mbuyama, mupikoe o mukwelume, mupikoe o mbuyama, mulivi oyu li mu mambongi oye, no mukwa matunga ao, shiyana, no lifakathzi awa ali mukaci kenu, ku shivaka esho akuhungula Shinda sha moyo ci koliyo likala lithzina lyenji. ¹² Kenge ovuluka ci shime wakalile mupika mu Engepita; omamele no kukwama ethzi milao. ¹³ Kenge okwama mukiti o ilombo pa mayuwa mutanu na eli (7) apa omanisha kuwaneka ei onatundisha pa shilambo shoye no mu shiluvelo shoye sho veine. ¹⁴ Kenge onyanyuka pa mukiti woye---owe, mwanoe o mukwelume, mwanoe o mbuyama, mupikoe o mukwelume, mupikoe o mbuyama, mulivi no mukwa matunga ao, shiyana no lifakathzi awa ali mu mambongi oe. ¹⁵ Pa mayuwa mutanu na eli (7) okwamene Shinda sha moyo Nyambi woye mukiti ku shivaka esho akuhangula Shinda sha moyo, mukonda Shinda sha moyo Nyambi woye kenge akufiyawela mu enu yoihe onayanga no mu ekwama yo moko oye yoihe, ne onyanyuke kumanenena. ¹⁶ Akwelume wahe alimonahalishange pa meho a Shinda sha moyo Nyambi woye luhatu pa mwaka ku shivaka esho akuhangula: ku mukiti o ishima yo kupila mamene, ku mukiti o masunda, no ku mukiti o ilombo. Wahi oyu wakulimonahalisha pa meho a Shinda sha moyo mokomoko. ¹⁷ Ambene, mukwelume no mukwelume kenge aleta shipiwa omu atweshela, ci olimuke fiyauthzi ethzi anakupa Shinda sha moyo Nyambi woye. ¹⁸ Opake aka kuatula no manduna mu mambongi aa akupa Shinda sha moyo Nyambi woye; kenge ashimbiwa mu ikuta yenu yoihe, ne aatule anu ko kuluka. ¹⁹ Lelo wapilula iamba; lelo waimanena munu nji kutambula kweta, mukonda kweta thathsikanga meho a anu owanyanyami kalo thzakwangishanga maywi a anu o kuluka. ²⁰ Ofotishishe omu shiendela shiamba munyima thzo kufotishisha, ci oyoye no kushwana litunga eli akupa Shinda sha moyo Nyambi woye. ²¹ Lelo walishishela ashera(muyombo), shitondo shipi nji shipi kunyonga thzo aletare thza Shinda sha moyo Nyambi woye ethzi wakulikwamena. ²² Lelo walikwamena shianga shithsini shipi nji shipi sho mawe, ei anathzimbi Shinda sha moyo Nyambi woye.