¹ Lelo wakwamena Shinda sha moyo Nyambi woye shitavelo sho ngombe nji lingu oyu li napa anashomololiwa, nji oyu li napa anepa, mukonda kukwama kengeyo mathzilo kwa Shinda sha moyo Nyambi woye. ² Ngeci mukaci kenu, mu mbongi thzimweya ku mambongi aa akupa Shinda sha moyo, akopo kuwaniwa mukwelume nji mbuyama oyu kwama umango pa meho a Shinda sha moyo Nyambi woye no kushiya ombusha wenji, ³ yomuhe oyu nathzi kukalombela athzimu ao no kuwakinyamena, kukale liyuwa, ngonda nji shinu shoshihe sho kuwilu---eshi ninakana kutuminina--- ⁴ ne ngeci owe po tongweliwa esho shiamba, nji ngeci onashiyuvu, nehoni ofotishishe nawa. Ngeci yashwemwa ne moliyo kunakalela ci mathzilo o kengeyo anakwamahala mu Isilaele, okwame kenge. ⁵ Olete oyo mukwelume nji mbuyama, oyu nakwama eshi shinu sho shimango, mu mashelo o mambongi oye, oyo mukwelume shemwa nji mbuyama, omupovaule no mawe kumupaa. ⁶ Shime tunwa to mapaki eli , nji mapaki ahatu mbeci apaiwe; ambene ngeci kanwa ko paki yofoci pohuma lelo apaiwa. ⁷ Moko o mapaki oliyo atateka kumupaa, ne munyima honi mbeci moko o anu wahe; ne kenge otundisha omango mukaci kenu. ⁸ Ngeci akopo kukwamahala shiamba sho shikalu nene eshi okana kutwesha kuatula---nahimi shiamba sho kumwaa onyinga no kumwaa onyinga, nji shiamba sho muthzeko no muthzeko, nji shiamba sho lituma no lituma---iamba yo muyoyo mu mambongi oye---nehoni othze kushivaka eshi ahangula Shinda sha moyo Nyambi woye. ⁹ Othze kwa apulisita, akwa shikuta sha Livi, noku kwa mukwa kuatula oyu wakukalako omu mushikati; kenge owaipula, ne kenge akutongwela mo kuendishela shiamba. ¹⁰ Nehoni okwame omu akutongwelela, pa shivaka eshi akuhangula Shinda sha moyo. Omone ci wakwama ei akufundisha yoihe. ¹¹ Oshupwele mulao akufundisha, ne okwame omu anakunehethzela. Lelo watunda kwei akutongwela, kuhuka ku lyoko lyo shilyo nji lyo shimoho. ¹² Yomuhe ninga likamba, oyu kana kuyuva mupulisita oyu nemana kukwamena Shinda sha moyo Nyambi woye nji kukana kuyuva muka kuatula---oyo munu afe; kenge otundishelela omango mu Isilaele. ¹³ Anu wahe ayuve ne ayape, ne kwakala munu oyu ninga likamba kalo. ¹⁴ Apa okuma mu litunga eli akupa Shinda sha moyo Nyambi woye, ne apa olitunga no kutateka kukala mo, no apa oamba ci, 'Kenge nilipakela fumu oyu niendisha, eci eli ali wahe anu ananithzinguluka,' ¹⁵ nehoni yoshemwa olipakele fumu oyu kuendisha munu oyu akuhangula Shinda sha moyo Nyambi woye. Olipakele fumu oyu kuendisha oyu tunda mukaci ka apoe. Lelo wapaka munu oyu tunda ku litunga lyalo, oyu ninga ci kali mwapoe, ci akuendishe. ¹⁶ Ambene lelo aliungumekela tukambe totungi, nji akuhushela anu ku Engepiyta ci akavulishe tukambe, mukonda Shinda sha moyo shime amiambelile ci, 'Kamwakuhukela kupita muya mu likuñwa kalo.' ¹⁷ Lelo ayeka ambuyama owangi, ci mucima wenji lelo wapilukela kwako. Lelo aliungumekela silivera no gauda omungi. ¹⁸ Apa akala mu shipula sho ufumu wenji, añole mu buka milao thzenji, kutunda ku mulao watangile kukalako o apulisita, awo Alivi. ¹⁹ Buka thzikale nenji, ne athzitale mu mayuwa enji o kuyoya oahe, ci alifundishe kulemeka Shinda sha moyo Nyambi wenji, ci amamele maywi oahe o mulao wenji no ituminina, ci aikwame. ²⁰ Akwame kengeyo ci mucima wenji lelo walishangalela apenji, ne ci lelo aleya atumina, kuhuka ku shilyo nji ku shimoho, ci avulishe mayuwa o ofumu wenji, aye no anenji mukaci ko Isilaele.