¹ Ethzi thzoliyo fiyauthzi ethzo Mushe mukwelume wa Nyambi afiyawethzile anu o Isilale kushime kufa. ² Waambile eci: Shinda sha moyo kuma atundile ku Sinai ayepo wahokomokela kutunda mu seiri. ayepo ethsa pa mukinya wa Parani, ne kuma akeile no anu o kukena o kukma pa makumi likumi o ita (10,000). Mu lyoko lyenji lyo shilyo kuma kwakalile mayeye o myethso. ³ Yoshemwa, ahima anu; wahe anu enji o kukena ali mu lyoko lyoe, ne awopo awisha mitwi thzo ku maulu oe; kuma atambulile maywi oe. ⁴ Mushe kuma atutuminine mulao, kushwana shiwana sha Jakobo. ⁵ Nehoni kwakalile fumu mu Jeshuruni, aendishi o anu a Isilaele kwanaliwana, ikikuta ya Isilaele ayopo iliwana pofoci. ⁶ Rubeni ayoye ne lelo afa, ambene akwelume enji akele owapu. ⁷ Ethzi thzoliyo fiyauthzi thza Juda. Mushe ayepo amba: Oteelele, Shinda sha moyo, ku liywi lya Juda, ne omuhushele kwa anu enji kalo. Omulwele; okale okwathsi wenji kwa akwethzimbo yenji. ⁸ Kwa Livi, Mushe ayepo aamba: Tumimi thzoye no Urimi thzoye thza munu oye o kuluka, oyu wa elekile ku Masa, oyu waliambile nenji ku meyu oku Meriba, ⁹ Oyu waambile tata wenji na mama wenji eci, ''Kaniwamonine.'' Ne kalo kavalile apaenji, nji kutwaka mano anenji. Mukonda kuma anyungile liywi lyoye no kumamela ombusha oye. ¹⁰ Afundisha Jakobo ituminino yoye no Isilaele mulao oye. Kenge apaka insense pa posho thzoe no kutumeka itavelo yoihe pa aletare. ¹¹ Ofiyawele, owe Shinda sha moyo, ei ali nayo, ne otawe ekwama yo moko enji. Ocole manyonga o anu awa amulwisha, nawa anamuthzimbi, eci lelo amulwisha kalo. ¹² Kwa Benjamine, Mushe ayepo aamba: Oyu himiwa ko Shinda sha moyo ayoya ko kupila okalu kumbali thzenji; Shinda sha moyo amunyunga liyuwa lyolihe, ne akala mukaci ko moko enji. ¹³ Kwa Josefa, Mushe ayepo aamba: Litunga lyenji lifiyaweliwe ko Shinda sha moyo no enu yoiwa nene yo kuwilu, no mume, no meyu aa atunda mo kuthzunga oku kuli mushi. ¹⁴ Litunga lyenji lifiyaweliwa ko enu yoiwa nene ei imenishiwa ko liyuwa, no enu yoiwa nene ei inamena ngonda no ngonda, ¹⁵ no enu yoiwa nene yo pa mikinya thzo kele, kalo no enu yoiwa nene yo pa mikinya thzo kukana kupwa. ¹⁶ litunga lyenji lifiyaweliwe ko enu yoiwa nene yo mu kaye no ungi wayo no shihemo shenji oyu wakalile mu shipukumuna. Fiyawethzi thzikeye pa mutwi wa Josefa, no peulu o mutwi wenji aye wapilukile mwana fumu o mukwelu mukaci ka akulwenji. ¹⁷ Pulu o mweli, ufumu wenji, manyia enji po manyia o nyaci. Ko ao manyia kenge ashindeka anu, wahe, kuwatwala kuhula o kaye. Awa woliyo a Efraimi akuma pa ita makumi o likumi (10, 000), awa woliyo a Manase akuma pa ita likumi (1000). ¹⁸ Kwa Zebuloni, Mushe ayepo aamba: Onyanyuke, Zebuloni, mu kuenda enda koye, nowe, Isakare, mu kukala mu tende thzoye. ¹⁹ Kenge akuishela anu ku mikinya. Oko koliyo akukwamena itavelo yo kuluka. Mukonda kenge akuyamwa yoingi ei ili mu likulu lwale, no ku luheke lo pa liya lo likulu lwale. ²⁰ Kwa Gadi, Mushe ayepo aamba: Afiyaweliwe munu oyu kwama Gadi kumuninga ukulu. Kenge akukala eci nyime o mbuyama, ne kenge akuyataula lyoko nji mutwi. ²¹ Onalihangwela litunga lyo liwa, mukonda nakukala shivaka sha mukwa kuendisha eshi nashitulekiwa. Onakeya no aka kuendisha anu. ayepo kwama ko kuluka kwa Shinda sha moyo no ituminino yenji kwa Isilaele. ²² Kwa Dani, Mushe ayepo aamba: Dani po mwana nyime oyu leya kutunda ku Bashani. ²³ Kwa Nafetali, Musha ayepo aamba: Nafetali, onekuta yoiwa, ne onayala fiyawethzi thza Shinda sha moyo, oshimbe litunga lyo ku mutokoiwa no ku mboela. ²⁴ Kwa Ashare, Mushe ayepo aamba: Ashare afiyaweliwe kupita ana wamweya; ahemiwe ko apenji, ne acupwe liulu lyenji mu oli thzo olive. ²⁵ Ipakisho yo ku mbongi thzoe ikale yo shifu no kopa; apa akukuma mayuwa oye oku yoya, poliyo wakukuma no okolo woye. ²⁶ Kwithsa o kulipitula na Nyambi wa Jeshuruni, oyu naendanga muwilu kuna kukwathsa, no mu ofumu wenji kuli pa mavui. ²⁷ Nyambi o liyele po yoliyo macilelo, ne kushi kuli moko enji o liyele. Acithza akwethzimbo yoye pa posho thzoye, ne aamba eci, ''Oyundishe!'' ²⁸ Isilaele kenge akala mu kuliyala. Lishima lyo meyu lya Jakobo kenge likala shuwana mu litunga lyo uloto no waine o mupe, yoshemwa, mawilu amuwishele mume. ²⁹ Fiyawethzi thzoye thzingi, Isilaele! Elye lipitula noe, anu awa anayoyishiwa ko Shinda sha moyo, aye teve thzikukwathsa, no mwele wo ofumu woye? Akwethzimbo yoye kenge akeya kukwoye kwa tutuma; kenge olyata mu ivaka yo yo ikulu.