¹ Muteelele, amwe mawilu, ne kenge niamba. Kaye kateelele ku maywi o kanwa kange. ² Ifundisha yange iloke echi mvula, kuamba kwange kuwe eci mume, eci mvula tamaukela pa muhonyi umena, kalo eci mvula tamaukela pa mbuto thzinzkuniwa. ³ Mukonda kenge niamba lithzina lya Shinda sha moyo, no kumonisha ukulu kwa Nyambi wetu. ⁴ Yoliyo liwe, ekwama yenji inaloo; mukonda makuñwa enji oahe analoo. Yoliyo Nyambi okusepahala, okupila omango. Wakuluka no kusepahala. ⁵ Analiipisha kukwenji. Kali anenji. Woliyo omango wo. Woliyo shikuta sho kuyauluka no kukana kusepahala. ⁶ Moliyo mukwamena Shinda sha moyo, amwe yanga no kupila onyanyami? Kali yoliyo tata wenu, oyu wamiumbile? kuma amikwamine no kumitanalisha. ⁷ Ovuluke mayuwa o shikati sho kukale, oayale myaka thzo ikuta yo kunyima. Oipula tata oe ne kenge akumonisha, akulu oe ne kenge akuambela. ⁸ Aye o mukulu lipeulu nene apa amipile anu kushwana--- apa atepile anu wahe, kuma apakile maenja a anu kuthza ko apa akumine ana Isilaele. ⁹ Mukonda shiemba sha Shinda sha moyo po anu enji; Jakobo yoliyo shiemba shenji anashwana. ¹⁰ Kuma amuwanine mu litunga lyo mumbulwa kukutu, mokupila mumbule omu kuli ikumbaula; ayepo munyunga no kumuvavalela, ayepo munyunga eci lithziho lyenji. ¹¹ Eci ngonga nyunga shitalatala shenji no kuunduka peulu thzo anenji, ayepo yandumuna mando enji kuashimba, no kuapaka pa mahunga enji. ¹² Nyambi yofoci yoliyo nawaendisha; kwithsa muthzimu okwako oyu nakala nenji. ¹³ Ayepeo mukandukishela pa mikinya thzo litunga, ne ayepo mulelisha oshuka o mu ilwa; ayepo mulisha oki utunda ku liwe, no oli tunda ku liwe lyo likolo. ¹⁴ Kuma alile ilya yo kukwama pa mahwe o ngombe, no kunwa mahwe o mangu, kulya maathzi o manguana, mangu o shokwelume o Bashani no membe, no uloto ouwa nene---ne amwe kuma mwanwine veine o kutupuka okukwama pa oshuka ulula. ¹⁵ Ambene Jehuruni ayepo piluka o kununa no kulaha--- kuma wapilukile o kununa, kuma wanunile nene, ne owepo lya kuikuta--- ayepo shiya Nyambi oyu wamukwamine, ne ayepo kana liwe lyo kuyoyishiwa kwenji. ¹⁶ Awopo akwama Nambi kukala no lifupa ko athzimu o ao; ko mathzilo o awopo amuanjipisha. ¹⁷ Owopo akwamena madimona itavelo, ao madimona kali Nyambi--- athzimu akana kulimuka, athzimu awa anamonahala ñanyiñanyi, athzimu awa nakana kuyapa a tata oe. ¹⁸ Onashiyelela liwe, aye wakalile tata oe, kalo onavulama Nyambi oyu wakuelekile. ¹⁹ Shinda sha moyo apa amonine ei ne ayepo wakana, mukonda anenji owakwelume nawa owambuyama woliyo namuanjipisha kengeya. ²⁰ ''Kenge niholeka shihanga shange kukwo,'' ayepo amba, ''ne kenge nimona mahulelo o omu akalela; mukonda shikuta sho mukanayuva, ana okukana kusepahala. ²¹ Ananikwama kukala no lifupa ko shinu sho kukana kukala nyambi no kunianjipisha ko enu yo yokupila okwathsi. Kenge niwayuvisha shipululu ko anu okukana kukala anu, kenge niwaanjipisha ko anu o yanga. ²² Mukonda mulilo unayuumishiwa ko uanji wange ne watumeka kukakuma oku kuli awa anafu; watumeka kaye nei inemi mo; watumeka apa thzinashishi mikinya. ²³ Kenge niwaungekela ukala o ungi; kenge niwakuha mikili thzange thzothzihe; ²⁴ Kenge ayonda ku njala no kutumekiwa ko mulilo uyuuma no kuyundisiwa ko kukalu; Kenge niwatumena maeo o iyama yo mu mulundu, no ohungu o inu ikokawa mu likungu. ²⁵ Pola mwele kenge upaa, ne mu manjiyo wowa oukulu kenge ukwama kengeyo. Kenge upaelela mucaha no mumbanda, kambu kayamwa, no mukwelume li no mvi. ²⁶ Kuma naniamba eci kenge niwahanda kuthza ko kule, eci niwakwame kukana kuvulukiwa mukaci ko anu. ²⁷ Napoci kuyapa kushemawethza kwa mukwa shithzimbo, ne kalo ci akwethzimbo yo kenge ambela mwamo iamba, ne kenge aamba eci, 'Lyoko lyetu lili peulu,' nga ninakwama yoihe ei. ²⁸ Mukonda Isilaele po anu okupila maano, kalo akukana kuyuvishisha. ²⁹ Mamooo, nga anu okunyanyama, eci ayuvishishe ei enu, nga kenge amamela omu yakupwela! ³⁰ Munu yofoci nga ngepi atwesha kucithza anu akuma pa ita likumi (1000), ne anu eli ayapisha anu akuma pa makumi o ita aninga likumi (10,000), kali shime ngeci liwe lyo onawaulisha, ne Shinda sha moyo onawapa kukwo? ³¹ Mukonda liwe lya akwethzimbo yetu kalilipitula no liwe lyetu, eci omu analimukela akwethzimbo yetu. ³² Mukonda veine wo atunda ku veine oku Sodoma, no mu ilwa yoku Gomora; oshuka o po wa uhungu; matemo o alulu. ³³ Waine wo po ohungu wo mayoka no ohungu oumango o lihuko. ³⁴ Ei iamba kali yame ninaituleka kokukana kulimuka anu, kuitulekela mu shitulekelo sho lufumo lwange? ³⁵ Yame nihushela omango kwawa akwama omango, kalo yame nikula, shikati athselemeta maulu o; mukonda liyuwa lyo ukalu wo lili po pepi, no enu ei yakuwakeyela kenge iyakama kukwamahala.'' ³⁶ Mukonda Shinda sha moyo kenge aatula shuwana anu enji, ne kenge ayuvela apikenji ñeke. Kenge amona eci okolo wo unathzi, ne kwithsa oyu nashiyala, shianga apika nji anu o kuliyala. ^{37 38} Nehoni kenge aamba eci, ''Kupi ali athzimu o, alyo liwe oku nacilela, athzimu awa nali maathzi o itavelo yo no kunwa waine o nupu thzo thzo kunwa? Akatuke amikwathse; aminyunge. ³⁹ Honi mumone eci yame, yame pohuma, yame Nyambi, kalo kwithsa nyambi yumweya shime yame; yame nipaa, kalo yame niyoyisha; nakulukisha kalo napolisha, ne kwithsa munu twesha kumiamwena ku okolo wange. ⁴⁰ Mukonda nayelulela lyoko lyange kuwilu no kuamba eci, 'Eci eli niyoya ko kukana kupwa, kenge nikwama. ⁴¹ Apa nihotola mwele wange ou uethsa, no apa lyoko lyange litateka kuatula, kenge nihushela omango kwa akwethzimbo yange, ne kenge nikulela awa ananithzimbi. ⁴² Kenge nipendisha mwele wange no manyinga, ne mwele wange kenge ulya nyama ko manyinga o anu anapaiwa no apika, no ku mitwi thza aka kuendisha o akwethzimbo yange.''' ⁴³ Munyanyuke, amwe matunga, omu muli anu a Nyambi, mukonda kenge ahushela omango o manyinga o apika enji; kenge ahushela omango kwa akwethzimbo yenji, ne kenge akulela litunga lyenji, kukulela anu. ⁴⁴ Mushe ayepo keya no kunaamba oahe maywi o eli limbo mu matwi aa anu, aye, na Joshuwa mwana Nuni. ⁴⁵ Nehoni Mushe ayepo aamba oahe aa maywi kwa Isilaele yomuhe. ⁴⁶ Ayepo aamb kukwo, ''Mutwale maayalo enu ku maywi aa ninapa upaki kukwenu lelo, eci mutumine anenu kuamamela, maywi oahe ou mulao. ⁴⁷ Mukonda eshi kali shinu sho tumbako kukwenu, mukonda maywi o uyoye wenu, ne ko eshi shinu kenge mwa kuvulisha ku mayuwa enu mu litunga eli muyavukela Jodani kukalishimba.'' ⁴⁸ Shinda sha moyo ayepo aamba kwa Mushe mwelyo liyuwa elyo mwene kuamba eci, ⁴⁹ ''Okanduke ku mikinya thzo Abarimi, pa mukinya wa Nebo, ou uli mu litunga lya Moabi, musambwa thza Jeriko. Otanekele litunga lya Kanana, eli nipa anu o Isilaele eci likale lyo. ⁵⁰ Kenge okafela pa mukinya apa okanduka, ne kenge okawanekiwa kwa anu oye, eci Aruni mungenjoye mwana Isilaele omu nafela pa mukinya wa Hori ne ayepo wanekiwa kwa anu enji. ⁵¹ Ei kenge ikwamahala mukonda kuma mwakwamine omango kukwange mukaci ko anu o Isilaele ku meyu oku Meriba mu Kadeshi, mu mumbulwa kukutu wa Zini. Mukonda kamwanilemekilie no kunikuteka mukaci ko anu a Isilaele. ⁵² Kenge omona litunga pa posho thzoe, ambene kowa kukengena mo, mu litunga eli nipa anu a Isilaele.''