¹ Mushe ayepo thza kukaambela Isilaele yomuhe aa maywi. ² Ayepo amba kukwo, ''Pano honi nili no myaka thzo kuelekiwa thzo kukuma pa myaka shita shofoci no myaka makumi eli (120); kanitwesha kuthza kunu no kuhuka; Shinda sha moyo onaniambela eci, 'Kowa kuyavuka oyu Jodani.' ³ Shinda sha moyo Nyambi wenu, aye yoliyo mienda kuposho; kenge ayundisha awa anu ali pa posho thzenu, ne kenge mutunga mu matunga o. Joshua, kenge amienda kuposho, eci eli anaamba, Shinda sha moyo. ⁴ Shinda sha moyo kenge awakwama eci omu akwamenine kwa Sihoni na Ogo, mafuma o Amori, no matunga o aa ayundishile. ⁵ Shinda sha moyo kenge awapa mu moko enu, ne kenge mukwama kukwo yoihe ei nanimitumena. ⁶ Mutanale kalo mukale no ondume, lelo mwawayapa; mukonda Shinda sha moyo Nyambi wenu, aye yoliyo enda nenu; kakumikwangela nji kumishiyelela.'' ⁷ Shinda sha moyo ayepo isha Joshua no kuamba kukwenji Isilaele yomuhe kunatanekela, ''Otanale no kukala no ondume, mukonda yowe thza no awa anu mu litunga eli aliangile Shinda sha moyo kwa akwathsañulu o kuliwapa; yowe wakuwaletishela kukalishwana. ⁸ Shinda sha moyo, aye yoliyo kuenda pa posho; kenge akala noe, ka kukukwangela nji kukushiyelela; lelo wayapa, lelo wahuka munyima.'' ⁹ Mushe yepo ñola ou mulao no kuupa kwa apulisita, ana Livi, awa nashimbanga aleka thzo umbusha wa Shinda sha moyo; apa nauñoliwa pamweya ayepo upa kwa akulu o Isilaele. ¹⁰ Mushe ayepo watumina kuamba eci, ''Kuhula o myaka mutanu na thzili (7) pa shikati shinapakeliwa kumanisha ikoloti, mu shikati sho mukiti o ilombo, ¹¹ Isilaele yomuhe apa akeya kunalimonahaisha pa posho thza Shinda sha moyo Nyambi oe mu shivaka eshi akuhangula eci shikale sho kukena mo kumulombelela, kenge wakutala ou mulao paposho thzo ana Isilaele wahe eci ayuve. ¹² Owaneke anu, akwelume, ambuyama, no anuke, no munu oku litunga lyalyo uyo li mu mbongi thzenu, eci ayuve ne alifundishe, ne alemeke Shinda sha moyo Nyambi wenu ne atuleke maywi oahe ou mulao. ¹³ Okwame kengeyo eci ano awa akana kulimuka, ayuve no kulifundisha kulemeka Shinda sha moyo Nyambi wenu, mu mayuwa oahe o kuyoya kwenu mu litunga eli muyavukela Jodani kukalitunga.'' ¹⁴ Shinda sha moyo ayepo amba kwa Mushe, ''Omone, liyuwa lyo kufa kwoye lyakeya; oishe Joshua ne muingene mu tende thzo shiwano, eci nimutumine.'' Mushe na Joshua awopo aingena mu tende thzo Shiwano. ¹⁵ Shinda sha moyo ayepo limonahalisha mu tende mu shithsini sho livui; shithsini sho livui ashopo shiimana pa shelo sho tende. ¹⁶ Shinda sha moyo ayepo aamba kwa Mushe, ''Omone, otamba kulala no atata oe; awa anu kenge akatuka no kukwama eci lihule kushupwela athzimu ao awa ali mukaci ko mu litunga eli athza. Kenge anishiya no kucola ombusha ou ninalianga no. ¹⁷ Nehoni, apo pa liyuwa elyo, uanji wange kenge uwashulukela ne kenge niwashiyelela. Kenge niholeka shihanga shange kukwo ne kenge aliwa ku enu yo imango. Likando lyo lingi no ukalu o ungi kenge iwakumena ne apo pa liyuwa elyo kenge akuamba eci, 'Eli likando lyo lingi kali linatukumena mukonda Nyambi wenu kali mukaci ketu?' ¹⁸ Yoshemwa kenge nakuholeka shihanga shange kukwo mukonda o omango ou akukwama, mukonda kenge akupilukela kwa athzimu ao. ¹⁹ Ne honine muñole eli limbo ne mulifundishe ana Isilaele. Mulipake mu tunwa to, eci eli limbo lyakukale upaki wange kwa ana Isilaele. ²⁰ Mukonda apa nakuwatwala mu litunga eli naliangile kulipa akwathsañulu o, litunga omu kupupa mahwe no oki, ne apa alya kuikuta no enu kuwaendela shuwana, nehoni kenge apilukela kwa athzimu ao no kuwakwamena ne kenge anishomolola kalo kenge acola ombusha wange. ²¹ Omango no ukalu oungi apa ukumena awa anu, eli limbo kenge likala upaka pa posho thzo (mukonda kalya kuvulamiwa mu tunwa twa ano). Mukonda nalimuka ei ayaala kukwama lelo, konishime kuwatwala mu litunga eli naliangile kukwo.'' ²² Ne elyo liyuwa mwene Mushe ayepo ñola elyo limbo no kulifundisha ana Isilaele. ²³ Shinda sha moyo ayepo tumina Joshua mwana Nuni kuamba eci, ''Otanale no kukala no ondume; mukonda yowe twala ana Isilaele mu litunga eli naliangile kukwo, ne kenge nikala noe.'' ²⁴ Ne akopo kukwamahala eci Mushe apa amanine kuñola maywi ou mulao mu vuka, ²⁵ ayepo tumina Alivi awa nashimbanga aleka thzo ombusha wa Shinda sha moyo , kuamba eci, ²⁶ ''Mushimbe ethzi vuka thzo mulao ne muthzipake kumbali thzo Aleka thzo ombusha wa Shinda sha moyo Nyambi wenu, eci thzikale upaka kukwenu. ²⁷ Mukonda nalimuka likamba lyenu no kukututela mathsingo kwenu; mumone, shianga eci nishiyoya nenu no lelo, kuma namuningelanga Shinda sha moyo likamba; honi apa nifa ne? ²⁸ Muniwanekele akulu wahe o ikuta yenu, no manduna enu, eci naniamba aa maywi mu matwi o no kuisha liwilu no kaye kukala mapaki kukwo. ²⁹ Mukonda nalimuka eci apa nifa kenge muliipisha no kutunda mu likuñwa eli ninamitumina; likando kenge limikayela mu mayuwa o munyima. Kenge kukwamahala kengeyo mukonda kenge mwakukwama yo imango mu meho a Shinda sha moyo, kumushemawethza kumuanjipisha mu ekwama yo moko enu.'' ³⁰ Mushe ayepo amba maywi o eli limbo mu matwi o mbunga thza Isilaele kuamanena oahe.