¹ Yoihe ei enu apa ikeya kukwenu, fiyawethzi no ikuto ei ninapaka kukwenu, no apa muivuluka mukaci ka anu wahe oku anamicithzela Shinda sha moyo Nyambi wenu, ² no apa muhuka kwa Shinda sha moyo Nyambi wenu no kumamela liywi lyenji, kushupwela yoihe ei nimitumina lelo---amwe na anenu--- ko micima thzenu thzothzihe no myoyo thzenu thzothzihe, ³ nehoni Shinda sha moyo Nyambi wenu kenge ahusha munyima upika wenu ne kenge amiyuvela ñeke; kenge amihusha no kumiwaneka kutunda kwa anu wahe oku namihanda Shinda sha moyo. ⁴ Ngeci yumweya kwa anu enu awa ali mu matunga ao oli ku ivaka yo kule mushi thzo liwilu, Shinda sha moyo kenge amiwaneka kutunda oko, kalo kenge amitundisha ko. ⁵ Shinda sha moyo kenge amileta mu litunga eli atungile akuku wenu, ne kenge mulitunga kalo, kenge amikwama shuwana kalo kenge amivulisha kupita omu avulishelile akuku wenu. ⁶ Shinda sha moyo Nyambi woye kenge atwala mucima oye ku mukanda no mucima wa ekulyoe, ne kenge ohima Shinda sha moyo Nyambi woye no mucima oye wouhe, no mwoyo oye ouhe eci oyoye. ⁷ Shinda sha moyo Nyambi woye kenge apaka yoihe ei ikuto kwa akwethzimbo yoye nawa anakuthzimbi, awa akunyandisha. ⁸ Kenge ohuka no kumamela liywi lya Shinda sha moyo, no kukwama ituminino yenji ei nikutumina lelo. ⁹ Shinda sha moyo Nyambi woye kenge akukwama enu yoye yoihe kuloa nene mu ekwama yo moko oye, kwa anoe, ku ana o imunanu yoye, noku kwei olima mu ilwa yoye, eci iloe. Mukonda Shinda sha moyo kalo kenge aloela mu kukukwama shuwa, eci eli anyanyukile kowa tata oye. ¹⁰ Kenge akwama ei ngeci kenge omamela liywi lya Shinda sha moyo Nyambi woye kutuleka ituminino yenji no milao thzenji ei inañoliwa omu mu buka thzo mulao, ngeci owepo huka kwa Shinda sha moyo Nyambi woye no mucima woye wouhe no mwoyo oye ouhe. ¹¹ Mukonda eshi shituminino eshi nikutumina lelo kali shikalu nene kukwoe, kalo kashili kokule eci okwange kukuma oku shili. ¹² Kali kuwilu shili, eci oambe eci, 'Elye tuthzela kuwilu no kukatuletela sho pashi eci tutweshe kushiyuva, eci tushikwame?' ¹³ Kalo kali musambwa thzo likulu lwale shili, eci oambe eci, 'Elye yavukela musambwa thzo likulu lwale no kukatushimbela sho eci natushiyuve, ne eci tusikwame?' ¹⁴ Ambene liywi lili popepi nene noe, lili mu kanwa koe no mu mucima oe, eci oshikwame. ¹⁵ Omone, lelo ninapaka pa posho thzoe kuyoya no uwa, kufa no omango. ¹⁶ Ngeci owepo mamela ituminino ya Shinda sha moyo Nyambi woye, ei nikutuminina lelo kuhima Shinda sha moyo Nyambi woye, kuenda mu makuñwa enji, no kumamela ituminino yenji, no milao thzenji kenge oyoya no kuvula, kalo Shinda sha moyo Nyambi woye kenge akufiyawela mu litunga eli oingena kukalishimba. ¹⁷ Ambene ngeci mucima woye awopo upilukela kwako, ne koteelela ne amwepo mutwaliwa kwako kukakinyamena athzimu ao no kuwalombela, ¹⁸ nehoni namiambela lelo eci yoshemwa kenge mupwa; kamwakukakala mayuwa oale mu litunga eli muyavukela Jodani kuthza mo no kukalishimba. ¹⁹ Naisha liwilu no kaye eci lelo ikale mapaki eci ninapaka pa posho thenu kuyoya no kufa, fiyauthzi no ikuto; honine muhangule kuyoya eci muyoye, amwe na akulyenu. ²⁰ Mukwame kengeyo eci muhime Shinda sha moyo Nyambi wenu, kumamela liywi lyenji, no kukala kukwenji. Mukonda aye yoliyo kuyoya kwenu no kulepa ko mayuwa enu; mukwame kengeyo eci mukayoye mu litunga eli eliethzile Shinda sha moyo kwa akwathsañulu enu, kwa Abrahama, kwa Isaka, noku kwa Jakobo, eci kenge aliwapa.''