¹ Aa oliyo maywi aa atuminine Shinda sha moyo kumina Mushe eci atongwele ana Isilaele mu litunga lya Moabi, maywi aa abungishile ku ombusha ou aliangile no ku Horebe. ² Mushe ayepo isha Isilaele yomuhe no kuamba kukwo, ''Namumono enu yoihe ei nakwama Shinda sha moyo pa meho enu mu litunga lya Engepita kwa Faro, kwa apikenji, no ku litunga lyenji lyolihe--- ³ likando lyoshokulu eli namono meho enu, imonisha, no ikomokisha yo ikulu. ⁴ Ambene kunakuma lelo Shinda sha moyo kamipile micima thzo kulimuka, meho o kumona, nji matwi o kuyuva. ⁵ Ninamiendisha mu mumbulwa kukutu pa myaka makumi ane (4); ikobeyo yenu kanaiyataika pa elama yenu, makatulo enu kanayatauka ku maulu enu. ⁶ Kanamuli ishima ipi nji ipi, kanamunu waine yupi nji yupi nji sho kunwa sho kulula shoshihe, ne eci mulimuke eci yame Shinda sha moyo Nyambi wenu. ⁷ Apa namukumu kuno ku shivaka, Sihoni, fumu wa Heshiboni, na Ogo fumu wa Bashani, akeile kunatulwisha, ne atwepo tuwapaa. ⁸ Atwepo tushinga litunga lyo no kulipa aka Rubeni, aka Gadi, no wamweya aka shikuta sha Manase eci alishwane. ⁹ Honine mumamele maywi ou umbusha ne muakwame, eci yoihe mukwama iloe. ¹⁰ Lelo munemana, mwaheno, pa pasho thza Shinda sha moyo Nyambi wenu; mafumu enu, ikuta yenu, akulu enu, no manduna enu---akwelume wahe o Isilaele, ¹¹ anenu, anu wenu, no munu o ku litunga lyalo oyu li mukaci kenu mu shilombo shenu, kutunda kwa mukwa kumicela ñunyi kutwala kwa mukwa kumivetela meyu. ¹² Lelo muli kuno eci muingene mu ombusha wa Shinda sha moyo Nyambi wenu no mu kulianga oku alianga nenu lelo Shinda sha moyo Nyambi wenu, ¹³ ne eci lelo amikwame anu enji, kalo eci aye akale Nyambi wenu, eci eli aambile kukwenu, ne eci eli aliethzile kwa akwathsañulu enu, kwa Abrahama, kwa Isaka, noku kwa Jakobo. ¹⁴ Mukonda kali yamwe pohuma nilikwama no ou ombusha no oku kulinga--- ¹⁵ munu yomuhe oyu nemana pano netu pa posho thza Shinda sha moyo Nyambi weyu---ambene nawa anakana kukala kuno netu lelo. ¹⁶ Mwalimuka omu natukalela mu litunga lya Engepita, nomu natukeyela mukaci ko anu omu namupiti. ¹⁷ Namumono ikupulo yo yo mathzilo yo kukwama pa itondo no mawe, silivera no gauda, ei naikala mukaci ko. ¹⁸ Mumone eci lelo kwawaniwa mukwelume, mbuyama, shikuta, nji mushovo oyu shiuluka mucima kutunda kwa Shinda sha moyo Nyambi wetu, kuthza kukalombela athzimu oo awo amu. Mumone eci mukaci kenu kwithsa muthzithzi ou uima oshuka okupaa, no kumenisha shitondo sho kulula. ¹⁹ Oyo munu apa ayuva maywi o eshi shikuto, kenge alifiyawela aye shinda mu mucima wenji no kuamba eci, 'Kenge nikala mu kuliyala shianga eci naenda mu mukanayuva o mucima wange.' Eshi kenge shiipisha yo iyu pofoci nei yo ikukutu. ²⁰ Shinda sha moyo kakumutetela ku umango wenji. Ambene, uanji wa Shinda sha moyo no lifupa lyenji kenge iyuumena oyo munu, kalo ikuto yoihe inañoliwa omu mu buka kenge ikeya papenji, ne Shinda sha moyo kenge atundisha lithzina lyenji mushi thzo liwilu. ²¹ Shinda sha moyo kenge amutundisha mu ikuta yo Isilaele yoihe kumutwala mu ukalu, o kutuleka ikuto yoihe yo umbusha ei inañoliwa omu mu buka thzo mualo. ²² Shikuta eshi sha kukeya, awo anenu awa akeya munyima thzenu, no munu o ku litunga lyalo oyu tunda ku litunga lyo kule, kenge akuamba apa akumona tushitiko no ekola ei anapaka Shinda sha moyo mu litunga--- ²³ nopa amona eci litunga lyolihe ko linapiluka sulufura no mungwa okuyuuma, mokupila sho kukuiwa mo nji sho kuima oshuka, mokupila muhonyi ou umena, eci omu naipisheliwa Sodoma na Gomora, Adima no Zeboimi, aa aipishile Shinda sha moyo mu kuangipa kwenji no mu uanji wenji--- ²⁴ kenge aambela pofoci no anu wamweya eci, 'Shinda sha moyo iñe anakwamena kengeya ku litunga lyenji? Oku kupya ko uanji oukulu nene kengeya kwatongola iñe?' ²⁵ Nehoni anu kenge aamba eci, 'Kunakwamahala kengeya mukonda anashii ombusha wa Shinda sha moyo, Nyambi wa akwathsañulu oo, ou aliyuvile no apa awatundishile mu litunga lya Engepita, ²⁶ kalo mukonda anathzi kukakwamena athzimu ao no kuwakinyamena, athzimu awa akana kulimuka awa anakana kuwapa. ²⁷ Honine uanji wa Shinda sha moyo nga apa unayuumena eli litunga, kuliletela ikuto yoihe ei inañoliwa omu mu buka. ²⁸ Shinda sha moyo onawatukula mu litunga lyo mu kuanjipa, mu uanji, no mu kungwenya nene, ne onawakonjela mu litunga limweya, omu ali lelo.' ²⁹ Enu ei inaholekiwa ya Shinda sha moyo Nyambe wetu yofoci; ambene enu ei ilimukiwa po yetu na anetu ko kukana kupwa, eci tukwame maywi oahe ou mulao.